སྨན་རྩིས་དྲ་བ། - མ་ཤ

མ་ཤ།

ལ་ཕུག

ལོ་ཀི།

མ་ཤ།

མིང་གཞན། མོན་སྲན་གྲེའུ། kidney bean 菜豆

སྐྱེ་དབྱིབས། འདི་ནི་འབྲུའི་སྡེ་སྲན་མའི་རིགས་ཤིག་སྟེ། སྡོང་རྐང་ཕྲ་ལ་རིང་བ་སྤུ་ཞིབ་ཅན་གཞན་ལ་འཁྲིལ་ནས་སྐྱེ་བ། ལོ་མ་སྒོང་གཟུགས་ལྗང་ལ་འཇམ་པ་གསུམ་རེ་སྦྲེལ་ཏེ་ཡོད་པ། མེ་ཏོག་ཁ་མདོག་དཀར་པོ་དང་སེར་པོ་འཆར་བ་ནས་རིམ་བཞིན་དམར་སྐྱར་འགྱུར་བ། གང་བུ་ལྗང་སྐྱ་རིང་ཞིང་ཅུང་ཕྲ་ལ་གུག་པའི་ནང་དུ་འབྲས་བུ་ཟླུམ་འཇོང་ལེབ་ཞད་ཅན ༥ ནས་ ༡༠ ཙམ་བར་འདོགས་པར། ཁ་མདོག་དམར་ནག་དང༌། དཀར་པོ། ནག་པོ། ཁམ་སེར་སོགས་ཁྲ་དང་ཐིག་རིས་ཡོད་པ་ཅི་རིགས་འབྱུང་བ་ཞིག་ཡིན། རྒྱ་གར་དང་རྒྱ་ནག བོད་ཀྱི་ལྷོ་ཁུལ་སོགས་ཀྱི་ཞིང་ཁར་སྐྱེ་ཞིང༌། རྒྱ་གར་བྱང་ཕྱོགས་ཁུལ་དུ་གཙོ་ཆེར་སྔོ་ཚལ་ཆེད་འདེབས་འཛུགས་བྱེད་ཀྱི་ཡོད།

བེད་སྤྱོད། གང་བུ་སོས་པ་གཙང་འཁྲུ་བྱས་ཏེ། བཙོ་བའམ་བརྔོ་གཡོ་བྱེད་ཆོག་ལ། འབྲས་བུ་སྐམ་པོ་ཆུར་ཞག་གཅིག་སྦངས་ཏེ་བཙོ་སྐོལ་གྱིས་སྲན་ཐུག་གམ་ལྡ་ལི་ཡང་བཟོ་རུང༌།

རོ་དང་ངོ་བོ། རོ་བསྐ་ལ་མངར། ངོ་བོ་སྙོམས་ལ་སྣུམ་པ།

ཕན་ནུས། རླུང་སེལ། ཟུངས་སྟོབས་དང་ཁུ་བ་འཕེལ་བར་བྱེད།

དོ་སྣང། བད་ཀན་དང་མཁྲིས་པའི་ནད་རིགས་ལ་གནོད། འབྲས་བུ་སྐམ་པོ་མཁྲེགས་ཤིང་ལྕི་བས་འཇུ་དཀའ་བ་ཡིན།