སྐྱེ་དབྱིབས། འདི་ནི་སྔོ་ལྡུམ་གྱི་རིགས་ཏེ། རྩ་བ་མཁྲེགས་ལ། སྡོང་པོ་དང་ཡལ་ག་སྤུ་ཞིབ་ཅན་འཁྱིལ་ཏེ་ཡོད་པ། ལོ་མ་སྒོང་དབྱིབས་ཡིན་པ་དང༌། འབྲས་བུ་ནི་སྔོ་ལྗང་རིལ་རིལ་དང་ཟླུམ་པོ་ཐོགས་ཤིང་རིམ་བཞིན་མདོག་སེར་པོ་དང་སྨིན་ཚར་རྗེས་དམར་པོ་འབྱུང་བར། ཚ་བའི་ཡུལ་དུ་དུས་ཚིགས་བཞི་གར་སྐྱེ་ཞིང༌། གཙོ་ཆེར་འདེབས་འཛུགས་བྱེད་ཅིང་སྤྱོད་ཁྱབ་ཆེ་བས་ཤེས་སླའོ༌།

བེད་སྤྱོད། འབྲས་བུ་གཙང་མ་བཀྲུས་ཏེ། སོས་པ་རྗེན་པར་ཟ་བ། ཚལ་མཉམ་བརྔོ་བ། ཁུ་ཐང་བཟོ་བའམ་སི་པན་མཉམ་དམར་འདུར་བཟོ་ཆོག

རོ་དང་ངོ་བོ། རོ་སྐྱུར་ལ་མངར། ངོ་བོ་བསིལ།

ཕན་ནུས། ཁྲག་གསོ། ཚ་བ་ཞི་བར་བྱེད། ཁ་སྐོམ་པ་སེལ། རྨ་ཁྲག་གཅོད། མ་ཞུ་བ་ཞུ་བར་བྱེད། མིག་གི་མཐོང་ཤུགས་གསོ། ཁྲག་ཤེད་མཐོ་བའི་ནད་བཅས་ལ་ཕན།

དོ་སྣང༌། རྗེན་པས་པགས་ནད་ཆུ་སེར་དང་མགོ་ནད་རིགས་ལ་གནོད་ཅིང༌། ཚོད་མས་ཁྲག་མཁྲིས་ཚ་བའི་ནད་ལ་གནོད་པ་ཡིན།