༄༅། །ཕུལ་བྱུང་གདོད་མའི་སྐྱེད་དཀའི་ཐུགས་མཆོག་བརྩེ་བ་ཆེན་པོའི་རྫིངས་ཞུགས་ཏེ།། རླབས་ཆེན་མཛད་པའི་དར་ཆེན་གཡོ་བས་ཟུག་རྔུའི་རྒྱ་མཚོ་མཐར་བརྒལ་ནས། །མི་ཤིགས་སྲོག་གི་རིན་ཆེན་གླིང་སོན་འགྲོ་བའི་ཕན་བདེ་སྩོལ་མཛད་པ། །སྙིགས་མའི་མགོན་པོ་བདེ་གཤེགས་བདུན་དང་ཁྱད་པར་སྨན་གྱི་བླ་དེར་འདུད། །སྣང་མཐའི་ཡེ་ཤེས་སྒྱུ་འཕྲུལ་པད་སྦུབས་སུ། །རྨད་བྱུང་སྤྲུལ་སྐུའི་གར་བསྒྱུར་གངས་ཅན་གྱི། །ཕན་བདེ་འབྱུང་གནས་སངས་རྒྱས་གཉིས་པ་ཆེ། །མཚོ་སྐྱེས་རྡོ་རྗེའི་ཞབས་དེར་སྤྱི་བོས་མཆོད། །བསིལ་ལྡན་པཎ་གྲུབ་རྒྱུ་སྐར་འཕྲེང་བའི་དབུས། །