ཞེས་མན་ངག་རྒྱུད་ཞུས་པའི་ལེའུ་གསུངས་ཚར་བའི་རྗེས་ཐོག་དེ་མ་ཐག་པ་དེ་ནས་ཡང་སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་ཞེས་བོས་ཏེ་དྲང་སྲོང་ཆེན་པོ་འཁོར་དང་བཅས་པ་ལེགས་པར་ཉོན་ལ་ཡིད་ལ་ཟུངས་ཤིག དང་པོ་ནད་ཐམས་ཅད་སྐྱེད་པའི་གཞི་ཉེས་གསུམ་གསོ་པའི་སྐབས་བསྟན་པ་ལའང་རླུང་དང་མཁྲིས་པ་དང་བད་ཀན་གསུམ་དུ་བཤད་པར་བྱའོ། །དེ་ལ་ཞེས་བྱ་བ་ནི་ངེས་པར་གཟུང་བའི་དོན་ཏེ་དེ་ཡང་ཉེས་པ་གསུམ་དེ་ནང་ནས་ཀྱང་ལུས་ནད་དང་བཅས་པ་དེ་ལས་རླུང་ནི་ནད་ཀུན་འཁྲུག་པའི་རྒྱུ་ཡིན་ཏེ།