དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །དམར་ཁྲིད་ལག་ལེན་མན་ངག་རྒྱུད་འདི་ཡི། །རོ་ཙའི་སྐབས་ལ་ཇི་ལྟར་བསླབ་པར་བགྱི། །རོ་ཙ་ཞེས་པའི་དོན་དེ་གང་ལ་བྱ། །རོ་ཙའི་ནད་དེ་དོན་སྣོད་གང་ལ་གནས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་བཀའ་སྩལ་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། རོ་ཙ་ཞེས་པ་འདོད་པ་སྤྱོད་ནུས་ཤིང༌། །རིགས་བརྒྱུད་བུ་ཚ་སྤེལ་བར་བྱེད་པ་སྟེ། །

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག རོ་ཙའི་ཡན་ལག་བུད་མེད་བཙལ་བའི་ཐབས། །དེ་རྒྱུ་གདོན་དང་འདུ་བ་རོ་ལུས་དང༌། །བུ་རྩི་བཏང་དང་མོ་གཤམ་རྣམ་པ་ལྔ། །དང་པོ་མོ་རྩིས་ཕྱྭ་ལས་བརྟག་པར་བྱ། །ཞི་དང་དྲག་པོ་སྔགས་ཀྱིས་གདོན་དེ་བཅོས། །འདུ་བ་རླུང་མཁྲིས་བད་ཀན་རྣམ་པ་གསུམ། །རླུང་གིས་ཟླ་མཚན་སེར་ལ་དུས་མིན་འཛག །ཧར་པོར་ཡོད་སེམས་སྐབས་སུ་སྡོམ་ཞིང་སྦོ། །མཁྲིས་པས་ཚ་འབྲབ་དུད་ཁུ་རྣག་ཏུ་འབྱུང༌། །