དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལས་ལྔ་སྐྱུགས་ལ་སྔོན་འགྲོ་དངོས་གཞི་དང༌། །ཕྱི་རྗེས་བཅད་དང་ཕན་ཡོན་བསྟན་པའོ། །སྔོན་འགྲོ་ནད་གཞི་རུང་དང་མི་རུང་བརྟག །སྦྱོར་བའི་སྔོན་འགྲོ་ཉེ་རིང་རྣམ་གཉིས་བྱ། །མི་རུང་ཟུངས་ཟད་རླུང་ཆེ་ཆུ་རྒྱུ་འགགས། །མིག་འགྲིབ་སྲིན་ནད་གཞང་འབྲུམ་ཤ་དུག་རྒྱས། །རྒས་ཆེས་གཞོན་ཆེས་གདོན་ཅན་རྣམས་ལ་སྤང༌། །རུང་བ་མ་ཞུ་ལྷེན་སྐྲན་ལྕགས་དྲེག་ཆགས། །དུག་དང་གླང་ཐབས་ཁྲག་མཁྲིས་ཕོ་བར་ལྷུང༌། །མགོ་ནད་དང་ག་འགགས་དང་སྲིན་བུ་ལྡོག །