༄༅། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཅེས་བྱ་བ་བཞུགས་སོ།།

དང་པོ། རྩ་བའི་རྒྱུད།

གཉིས་པ། བཤད་པའི་རྒྱུད།

གསུམ་པ། མན་ངག་རྒྱུད། 

བཞི་པ། ཕྱི་མ་རྒྱུད།

འགྲོ་བ་མི་རྣམས་ཚེ་རིང་བར་བྱེད་པ་དང། ནད་མེད་བདེ་་བླག་ཏུ་འཚོ་ཞིང་གནས་བར་བྱེད་པའི་ཐབས་མཆོག་ཁྱད་དུ་འཕགས་པ་བོད་གངས་ཅན་གྱི་གསོ་བ་རིག་པའི་རྒྱུད་ཐམས་ཅད་ཀྱི་རྒྱལ་པོ། ལུང་ཐམས་ཅད་ཀྱི་སྤྱི་འགྲེལ། མན་ངག་ཐམས་ཅད་ཀྱི་རྩ་བ། དཔལ་ལྡན་རྒྱུད་བཞིའམ། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཀྱི་ཚིག་དོན་ཕྱིན་ཅི་མ་ལོག་པར་བཤད་པར་བྱ་བ་ལ། སྤྱིར་གསོ་བ་རིག་པ་ནི་འགྲོ་བ་རྣམས་མི་ན་བ་ཡུན་རིང་དུ་གནས་པར་བྱེད་པ་དང། ན་བ་རྣམས་ནད་ཀྱི་སྡུག་བསྔལ་ལས་བྲལ་ཏེ་ནད་མེད་བདེ་བའི་དཔལ་ལ་འགོད་པར་བྱེད་པའི་རིག་པ་ཁྱད་དུ་འཕགས་པ་ཞིག་ཡིན་ཞིང། འདི་ལ་མཁས་པ་རྣམས་ཀྱིས་ཡུལ་ལུང་སོ་སོའི་ཁྱད་ཆོས་དང་མཐུན་པའི་བསྟན་བཅོས་མང་དུ་བརྩམས་པ་ལས། རང་ཅག་ཁ་བ་ཅན་པ་ཉིད་དང་ཉེ་བར་འཚམ་པའི་གསོ་རིག་གི་གཞུང་ཁྱད་པར་དུ་འཕགས་པ། དཔལ་ལྡན་རྒྱུད་བཞི་ཞེས་ཡོངས་སུ་གྲགས་པ་འདི་ཉིད།

མཁས་པ་འགའ་ཞིག་གིས། རྗེ་བཙུན་གཡུ་ཐོག་པ་ཆེན་པོས་ཡན་ལག་བརྒྱད་པ་སོགས་འཕགས་ཡུལ་གྱི་གཞུང་དང། སོ་མ་རྭ་ཛ་སོགས་རྒྱ་ནག་ནས་བསྒྱུར་བའི་གཞུང་དང། འཁོར་ལོ་རྒྱལ་པོའི་བེ་བུམ་སོགས་ཞང་ཞུང་ནས་བསྒྱུར་པའི་གཞུང་རྣམས་ཀྱི་དགོངས་པ་བླངས་ནས་བརྩམས་པར་བཞེད་པ་དང། འགའ་ཞིག་གིས། བདག་ཅག་གི་སྟོན་པ་སྨན་རྒྱལ་གྱི་སྐུར་བཞེངས་ནས་རྗེས་སུ་གནང་བའི་བཀའ་དངོས་སུ་བཞེད་པ་དང། ཡང་འགའ་ཞིག་གིས། བཀའ་དངོས་ཡིན་ཀྱང། སྔོན་སློབ་དཔོན་པདྨས་བསམ་ཡས་དབུ་རྩེར་གཏེར་དུ་སྦས་པ། གྲྭ་མངོན་དབང་ཕྱུག་འབར་གྱིས་ཕྱུང་བའི་གཏེར་མར་བཞེད་པ་སོགས་འདོད་ཚུལ་སྣ་ཚོགས་པ་སྣང་ཡང།

འདིར་གསོ་དཔྱད་ཀུན་གྱི་རྒྱལ་པོ་དཔལ་ལྡན་རྒྱུད་བཞི་ཞེས་སུ་གྲགས་པ་འདིའི་བྱུང་བ་ཅུང་ཟད་ཙམ་ཞིག་རང་གི་འདོད་ཚུལ་ལྟར་བརྗོད་ན། དེ་ཡང་བོད་ཀྱི་རྒྱལ་རབས་སོ་བརྒྱད་པ་ཆོས་སྐྱོང་བའི་རྒྱལ་པོ་ཆེན་པོ་ཁྲི་སྲོང་ལྡེའུ་བཙན་གྱི་སྐུ་དུས་སུ། གངས་ཅན་སྨན་པའི་རྒྱལ་པོ་གཡུ་ཐོག་ཡོན་ཏན་མགོན་པོ་དེ་ཉིད་ཐུགས་བསྐྱེད་དུས་སུ་སྨིན་ནས་མཁས་པའི་སྙན་གྲགས་ཆེས་ཆེར་རྒྱས། ཆོས་རྒྱལ་ཁྲི་སྲོང་ལྡེའུ་བཙན་གྱི་བླ་ཡི་སྨན་པ་རུ་དབང་བསྒྱུར། སྐབས་དེར་རྗེ་བཙུན་གཡུ་ཐོག་ཆེན་པོས། སྔ་དར་བོད་ཀྱི་གསོ་བ་རིག་པའི་གཞུང་གདམས་རྣམས་རྩ་བ་རུ་བཟུང་། དེའི་ཁར་ཁ་ཆེ་ཟླ་བ་མངོན་པར་དགའ་བ་སོགས་ནས་ཞུས་པའི་མན་ངག་རྣམས་དང་། རྗེ་ཉིད་ཀྱི་ཐུན་མོང་མ་ཡིན་པའི་མྱོང་བྱང་རྣམས་ཀྱིས་བསྣན་ཁ་ཅི་རིགས་པར་མཛད་ནས་<<བདུད་རྩི་སྙིང་པོ་གསང་བ་མན་ངག་གི་རྒྱུད།>>ཅེས་བྱ་བའི་གཞུང་འདི་ཉིད་བརྩམས་པར་མཛད། གཞུང་འདི་ལ་ཁ་ཆེ་ཟླ་བ་མངོན་པར་དགའ་བའི་ཞལ་ལས་གསུངས་པའི་མན་ངག་མང་པོ་ཞིག་གིས་བསྣན་ན་མཛད་པས་མཛད་བྱང་ཡང་། ནུབ་ཕྱོགས་ཁ་ཆེའི་ཡུལ་དུ་རབ་གྲགས་པ། །སློབ་དཔོན་ཟླ་བ་མངོན་པར་དགའ་བ་ཡིས། །ཞེས་པ་སོགས་བཀོད་པར་མཛད།     གནས་སྐབས་རྒྱུད་འདི་སྤེལ་བའི་དུས་ལ་མ་བབས་པར་མཁྱེན་ནས། བསམ་ཡས་ཀ་བ་བུམ་པ་ཅན་དུ་གཏེར་དུ་སྦས་པར་གྲགས།

རྗེ་བཙུན་གཡུ་ཐོག་ཡོན་ཏན་མགོན་པོ་ཉིད་དགུང་ལོ་ལྔ་བཅུར་ཕེབས་པའི་སྐབས་སུ་སྐུ་འཁོར་བུ་སློབ་དང་བཅས་པ་ཀོང་པོ་སྨན་ལུང་དུ་ཕེབས། དེར་སྨན་གྱི་གྲོང་ཁྱེར་ལྟ་ན་སྡུག་ཅེས་བྱ་བའི་སྨན་གྱི་སློབ་གྲྭ་ཞིག་གསར་དུ་ཕྱག་བཏབ། སྣོད་ལྡན་གྱི་སློབ་མ་རྣམས་ལ། ཉིད་ཀྱིས་མཛད་པའི་<<བུ་དོན་མ>>ཞེས་པའི་བཤད་ཁྲིད་བསྐྱངས། གཞུང་དེ་ཉིད་ནི་གོང་སྨོས་<<བདུད་རྩི་སྙིང་པོ་གསང་བ་མན་ངག་གི་རྒྱུད་>>ལ་གཞི་རུ་མཛད་ནས། སློབ་བུ་རྣམས་ཀྱི་དོན་དུ་མཛད་པ་ཡིན་པས་མཚན་ཡང་བུ་དོན་མ་ཞེས་སུ་གྲགས།

དེ་ནས་བསྟན་པ་ཕྱི་དར་གྱི་སྐབས་སུ་གྲྭ་མངོན་དབང་ཕྱུག་འབར་བས་<<བདུད་རྩི་སྙིང་པོ་གསང་བ་མན་ངག་གི་རྒྱུད་>>ཀྱི་དཔེ་གཏེར་ནས་བཞེས། གནས་བརྟན་དར་མ་གྲགས་དང་། སྟོད་སྟོན་དཀོན་མཆོག་སྐྱབས། གཡུ་ཐོག་གསར་མ་ཡོན་ཏན་མགོན་པོའི་བར་དུ་ཆིག་བརྒྱུད་ཀྱིས་སྤེལ། གཡུ་ཐོག་ཡོན་ཏན་མགོན་པོ་ལ་བཤད་སྲོལ་ཐམས་ཅད་ཀྱི་གཞུང་ལག་ལེན་དང་བཅས་པའི་གདམས་ངག་ཡོངས་རྫོགས་ཀྱི་བཀའ་བབས། <<བདུད་རྩི་སྙིང་པོ་གསང་བ་མན་ངག་གི་རྒྱུད་>>ཉིད་རྩ་བར་བཟུང་། དེའི་སྟེང་དུ་སྙིང་པོ་བསྡུས་པ་རྩ་འགྲེལ་དང་།  དེ་མིན་སྔར་ཡོད་བོད་ཀྱི་སྨན་གཞུང་ལག་ལེན་དང་བཅས་པས་ཁ་བསྐང་། གཡུ་ཐོག་རྙིང་མ་ནས་བཟུང་མི་རབས་བཅུ་གསུམ་བར་བརྒྱུད་པའི་ལག་ལེན་མན་ངག་གིས་ཟུར་བརྒྱན། བདེ་གཤེགས་སྨན་གྱི་བླ་མས་དངོས་སུ་ཞལ་གཟིགས། ལུང་བསྟན། དབུགས་དབྱུང་། སྤྲུལ་པའི་དྲང་སྲོང་རིག་པའི་ཡེ་ཤེས་དང་། ཡིད་ལས་སྐྱེས་གཉིས་ཀྱིས་ཞུ་བ་དང་། ཞུ་ལན་གྱི་ཚུལ་དུ་རྒྱུད་བཞི་ཡོངས་རྫོགས་གསུངས་པ་དག་པའི་གཟིགས་པ་ཉིད་གཞིར་བཞག་སྟེ་བཀའ་དངོས་དང་ཁྱད་པར་མ་མཆིས་པའི་གཞུང་<<བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་>>དམ་དཔལ་ལྡན་<<རྒྱུད་བཞི་>>ཞེས་སུ་གྲགས་པའི་གསོ་དཔྱད་ཀུན་གྱི་རྒྱལ་པོ་འདི་ཉིད་རྩོམ་སྒྲིག་གནང་བ་ཡིན་ནོ།། །།