ལེའུ་སོ་གཅིག་པ། གསོ་བ་པོ་སྨན་པ་བཤད་པ།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །བྱ་བྱེད་སྨན་པའི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས།

སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། །དེ་ལྟར་གསོ་བར་བྱེད་པའི་གསོ་བ་པོ། །བྱ་བ་བྱེད་པ་སྨན་པའི་གནས་བསྟན་པ། །རྒྱུ་དང་ངོ་བོ་དང་ངེས་ཚིག་དང་དབྱེ་བ་དང༌། །ལས་དང་འབྲས་བུ་བཅས་རྣམ་པ་དྲུག་གིས་བསྟན་ནོ། །

དེའང་རྒྱུ་ནི་བློ་ལྡན་བསམ་པ་དཀར་བ་དང༌། །དམ་ཚིག་ལྡན་ཞིང་རྣམ་པ་ཁོག་ཡངས་ཤིང་ངང་རིང་བཟོ་བ་དང༌། །བྱ་བ་ལ་བརྩོན་ནུས་པ་མི་ཆོས་མཁས་དང་དྲུག་ལས། །

དེ་ལ་དང་པོ་བློ་དང་ལྡན་པ་ནི། །བློ་རྒྱ་ཆེ་བ་དང་བློ་ཚབ་ཚུབ་མེད་པར་བརྟན་པ་དང་བློ་ཡི་གཟེག་མའི་ཞིབ་ཅིང་རྣོ་བ་སྟེ་གང་ལའང་ཆགས་ཐོབས་མེད་པ་གསུམ་དང་ལྡན་པས། །གསོ་དཔྱད་མདོ་རྒྱས་མ་ལུས་ཁོང་དུ་ཆུད་པས་བློ་ཆེ་བ། །ལག་ལེན་ཀུན་ལ་ཐོགས་བརྡུགས་ཉམ་ང་མེད་པས་བློ་བརྟན། །སྨན་དཔྱད་ཟས་སྤྱོད་ཐམས་ཅད་རིག་པས་དཔྱོད་ཤེས་པ་ལ་མངོན་ཤེས་ཕྲ་མོ་འཆར་བ་ལ་ནི་བློ་གཟེག་པ། །དེ་ཉིད་རྒྱུ་ཡི་ནང་ནས་མཆོག་ཅེས་བྱའོ། །

གཉིས་པ་ལའང་བསམ་པ་དཀར་བ་བྱང་ཆུབ་སེམས་དང་ལྡན་པ་དང་། །སྦྱོར་བ་དངོས་གཞི་དང་འཇུག་གསུམ་ལས་དང་པོ་ནི། །འགྲོ་བ་ནད་པ་རྣམས་ཀྱི་སྡུག་བསྔལ་མཐོང་བས་སྙིང་རྗེ་དང་དེ་དག་ལ་ཕན་འདོགས་པར་སྤྲོ་ཞིང་ནད་གསོ་བར་དད་པ་དང༌། །ནད་པ་བཟང་ངན་མེད་པར་བྱམས་པར་བལྟ་ཞིང་སྡང་སེམས་མེད་པ་ཞེ་ཐག་པ་ནས་བཏང་སྙོམས་དང་ལྡན་པ་ཡིས། །སེམས་ཅན་ནད་པ་ཀུན་ལ་སྙིང་རྗེ་དང་བྱམས་པ་དང་དགའ་བ་དང་བཏང་སྙོམས་དང་ལྡན་པ་བཞིའོ། །ནད་པ་གསོ་བར་བྱ་བསྙམ་པའི་སྨོན་པ་བྱང་ཆུབ་མཆོག་ཏུ་སེམས་བསྐྱེད་དེ། །དངོས་གཞི་ནད་པ་གསོ་བར་འཇུག་པ་ལ་སེམས་བསྐྱེད་དང་་ཚད་མེད་བཞིའི་སྒོས་ནས་ཉམས་སུ་བླང༌། །ནད་གསོ་བར་འཇུག་པ་ལ་ཡང་གསོ་ཚུལ་རྣམས་རྒྱལ་བའི་གསུང་ཡིན་སྙམ་པས་བསྟོད་ཅིང་བསྔགས་པ་དང་ཚུལ་དེ་ལྟ་བུ་ནི་རང་གཞན་ཐམས་ཅད་ལ་ཕན་པ་དང་མྱུར་དུ་ནི་སངས་རྒྱས་ཐོབ་པ་དེ་རྒྱུའི་གཙོ་བོ་ནི་འདི་ཉིད་ཡིན་པར་བལྟ་ཞིང་མཇུག ནད་པ་སོས་ནས་ཟང་ཟིང་གི་ཡོན་བྱུང་ཡང་ལེགས་མ་བྱུང་ནའང་འཁོན་འཛིན་མེད་པར་དགེ་བ་འདི་ཉིད་སེམས་ཅན་ཐམས་ཅད་ཀྱི་དོན་དུ་བྱང་ཆུབ་ཐོབ་པར་བསྡོ་བས་རྒྱས་བཏབ་བོ། །

ཚུལ་དེ་ལྟ་བུ་ལྡན་པས་ནད་པ་གསོ་བར་སླ་ཞིང་འཚོ་བ་མང་ལ་རང་ཉིད་ལ་འདི་ཕྱི་གཉིས་ཀར་ཕན་པའི་གྲོགས་སུ་འགྱུར་རོ། །དམ་ཚིག་དང་ལྡན་པ་ནི་བློ་བཞག་རྣམ་པ་དྲུག་དང་། །བཟུང་བྱ་གཉིས་དང་ཤེས་བྱ་གསུམ་དུ་བཤད་དོ། །དེའང་དང་པོ་སློབ་དཔོན་གྱི་གསུང་དང་གསོ་དཔྱད་དང༌། །མཆེད་དང་ནད་པ་དང་རྣག་ཁྲག་རྣམ་དྲུག་ལ། །སློབ་དཔོན་ལ་སངས་རྒྱས་སུ་ངོས་བཟུང་ལ་གསུང་ནི་དྲང་སྲོང་གསུང་དང་རྒྱལ་བའི་བཀའ་རྒྱུད་ལྟ་བུ་དང༌། །མཆེད་གྲོགས་ནི་སྤུན་དང་ནད་པ་རང་གི་བུ་ཚ་ལྟ་བུར་བཟུང་ལ་ནད་པའི་རྣག་ཁྲག་ལ་བཙོག་དམེ་མེད་པར་རང་ཉིད་ཁྱི་ཕག་ལྟ་བུར་ནི་འཐུང་བར་བྱའོ། །དེ་ལྟར་བློ་བཞག་པ་ཡི་དམ་ཚིག་དྲུག་བསྲུང་བྱ། །

གཉིས་པ་བཟུང་བྱ་གཉིས་ནི་སྨན་གྱི་རིག་འཛིན་དང་ཆ་བྱད་རྣམས་ནི། །བཀའ་སྲུང་རྣམས་ཀྱི་ཕྱག་ཆ་ལྟ་བུར་མི་བྲལ་བར་བཟུང་ཞིང་བསྲུང༌། །

གསུམ་པ་ཤེས་བྱ་གསུམ་ནི་སྨན་རྣམས་དགོས་འདོད་འབྱུང་བའི་ནོར་བུ་དང་ནད་གསོ་ནུས་པའི་བདུད་རྩི་དང༌། །གཙང་མ་དཀོན་མཆོག་གསུམ་ལ་མཆོད་རྫས་ལྟ་བུ་ཤེས་པར་བྱ་བ་གསུམ་ཡིན་ཏེ། །དེ་ཡང་དགོས་འདོད་འབྱུང་བའི་ནོར་བུར་ཤེས་པར་བྱ། །ནད་རྣམས་སེལ་བའི་བདུད་རྩིར་ཤེས་པར་བྱ། །ཕུད་ཀྱིས་རིག་འཛིན་མཆོད་པའི་ཕྱིར་མཆོད་རྫས་སུ་ཤེས་པར་བྱའོ། །

དང་པོ་སྨན་གྱི་རིན་པོ་ཆེའི་རིགས་དང་སྨན་རྒྱུ་ཐམས་ཅད་དེ་བཙལ་ལ་བཅང༌བར་བྱ། །གཉིས་པ་སྨན་རྣམས་ལེགས་པར་སྦྱར་ལ་བྱིན་གྱིས་བརླབ་པ་ནི་འདི་ལྟ་སྟེ། །རང་ཉིད་སངས་རྒྱས་སྨན་གྱི་བླ་མ་བཻཌཱུརྱ་འོད་རྒྱལ་པོ་དང༌། །སྨན་གྱི་སྣོད་ནི་བདུད་རྩི་ལྷུང་བཟེད་དངོས་སུ་བསམ་ལ། །སྨན་བླ་དྲང་སྲོང་རྣམས་ཀྱིས་ཤིས་པ་བརྗོད་པར་བསམ་ལ་འདི་སྐད་དོ། །

འཚོ་བར་མཛད་པ་སྨན་པའི་རྒྱལ་པོ་བདུད་བཞི་བཅོམ་ཞིང་ཡོན་ཏན་མཐའ་ཡས་པ་དང་ལྡན་པས་མྱ་ངན་ལས་འདས། །འགྲོ་བའི་དུག་འདོད་ཁྲོ་གཏི་མུག་གསུམ་ལས་གྱུར་བའི་ནད་སེལ་བ་སངས་རྒྱས་སྨན་གྱི་བླ་མ། །སྐུ་མདོག་མཐིང་ག་བཻཌཱུརྱ་ཡི་འོད། །མཆོག་གི་སྤྲུལ་པའི་སྐུ་ལ་མཚན་བཟང་སོ་གཉིས་དང་དཔེ་བྱད་བཟང་པོ་བརྒྱད་ཅུ་དང་ལྡན་པ། །འགྲོ་བའི་རླུང་མཁྲིས་བད་ཀན་རྐྱང་པའི་ནད་དང་ལྡན་འདུས་ཀྱིས་གདུངས་པ་ལ། །ནད་ཐམས་ཅད་ཀྱི་གཉེན་པོ་ཕྱག་གཡས་ན་ཨ་རུ་ར་རྣམ་རྒྱལ་དང་། །ཕྱག་གཡོན་ན་འཆི་མེད་བདུད་རྩིའི་ལྷུང་བཟེད་པར་པུ་བསྣམས་པ། །བཻཌཱུརྱ་ཡི་འོད་ལ་ཕྱག་འཚལ་ལོ། །རིག་པའི་གནས་མཆོག་བཅོ་བརྒྱད་ཐུགས་སུ་ཆུད། །རོལ་མོ་དང་། འཁྲིག་ཐབས། འཚོ་ཆིས། གྲངས་ཅན། སྒྲ། གསོ་དཔྱད། ཆོས་ལུགས། བཟོ། འཕོངས། གཏན་ཚིགས། རྣལ་འབྱོར། ཐོས་པ། དྲན་པ། སྐར་མའི་དཔྱད། རྩིས། མིག་འཕྲུལ། སྔོན་རབས། སྔོན་འབྱུང་རིག་པ་རྣམས་ཏེ། མཛོད་རང་འགྲེལ་དུ། རོལ་མོ་འཁྲིག་ཐབས་འཚོ་ཆིས་གྲངས་དང་སྒྲ། གསོ་དཔྱད་ཆོས་ལུགས་བཟོ་འཕོངས་གཏན་ཚིགས་རིགས། རྣལ་འབྱོར་ཐོས་པ་དྲན་པ་སྐར་མའི་དཔྱད། རྩིས་ཡིག་འཕྲུལ་འཁོར་སྔོན་རབས་སྔོན་འབྱུང་རིགས། འདི་དག་རིག་པའི་གནས་ཆེན་བཅོ་བརྒྱད་ཡིིན། ཞེས་གསུངས་པ་དང་མཐུན་པར་འདུལ་བ་ལུང་། སྐྱེ་རབས་རྒྱ་ཆེར་འགྲེལ་བར། བྱེ་བྲག་རྟོགས་བྱེད་སོགས་ལས་ཀྱང་གསལ་པོར་བཤད། སྔགས་རྙིང་མའི་བདུད་རྩི་བམ་པོ་བརྒྱད་པར། དུས་རིག་པ་དང་། བཅུད། སྒྲ བཟོ། ལས། གསོ་བ། ཚེ། ལམ། ཡིད། བྱང་ཆུབ། ཤེས་རབ། ཡུལ། སྨན། སྐྱེ་བ། སྐྱེས་གནས། འཆི་བ། སྔགས། བྱང་ཆུབ་རིག་པ་སོགས་བཤད་པ་སྔ་ཕྱིའི་འགྲེལ་བྱེད་པ་ཕལ་ཆེར་གོང་དུ་བཤད་པ་ཉིད་མཁས་པ་རྣམས་ཀྱི་ཀྱང་བཞེད་མཐུན་པ་ཡིན་ནོ། །ཚེ་ལ་དབང་བའི་བཅུད་ལེན་དངོས་གྲུབ་བརྙེས། །མངོན་ཤེས་སྙིང་རྗེས་འགྲོ་མཆོག་སྟེ་མིའི་ལུས་ཅན་གྱི་འདུ་བ་སྙོམས་པར། །དྲང་སྲོང་རིག་འཛིན་རྣམས་ལ་ཕྱག་འཚལ་ལོ། །

དེ་ལྟར་ཕྱག་འཚལ་བའི་མཐུས་སྨན་འདི་ཉིད་ལྷ་རྣམས་ཀྱི་ནི་བདུད་རྩི་ལྟ་བུ་དང༌། །ཀླུ་རྣམས་ཀྱི་ནི་གཙུག་ནོར་ལྟ་བུ་དང༌། །དྲང་སྲོང་རྣམས་ཀྱི་བཅུད་ལེན་ལྟ་བུར་ནི། །ཁྱེད་ལ་སྨན་འདི་ཉེ་བར་གནས་གྱུར་ཅིག །རླུང་མཁྲིས་བད་ཀན་བཞི་བརྒྱ་རྩ་བཞིའི་ནད། །ཚེ་ལ་བར་དུ་གཅོད་པ་ཞི་བ་དང༌། །གནོད་པའི་བགེགས་རིགས་སྟོང་ཕྲག་བརྒྱད་ཅུ་དང༌། །ཡེ་འབྲོག་སུམ་བརྒྱ་དྲུག་ཅུ་ལ་སོགས་པ། །བསམས་པའི་བར་དུ་གཅོད་པ་ཞི་བར་མཛོད། །

ཨོཾ་བཀྲ་ཤིས་པའི་དོན་ན་མོ་ཕྱག་འཚལ་ལོ་བྷ་ག་ཝ་ཏེ་བཅོམ་ལྡན་འདས་བྷཻ་ཥ་ཛྱེ་སྨན་གྱི་གུ་རུ་བླ་མ་བཻ་ཌཱུརྱ་པྲ་བྷ་བཻཌཱུརྱ་འོད་ཀྱི་རཱ་ཛཱ་ཡ་རྒྱལ་པོ་ལ། ཏ་ཐཱ་ག་ཏཱ་ཡ་དེ་བཞིན་གསེགས་པ་ཨརྷ་ཏེ་དགྲ་བཅོམ་པ་སམྨྱཀྶཾཡང་དག་པ་བུདྡྷཱ་ཡ་སངས་རྒྱས་ལ། ཏདྱ་ཐཱ་འདི་ལྟ་སྟེ། ཨོཾ་བཀྲ་ཤིས་བྷཻ་ཥ་ཛྱེ་སྨན་པ། བྷཻ་ཥ་ཛྱེ་སྨན་པ། མཧཱ་བྷཻ་ཥ་ཛྱེ་སྨན་པ་ཆེན་པོ། བྷེ་ཥ་ཛྱེ་རཱ་ཛཱ་ཡ་སྨན་པའི་རྒྱལ་པོ་ལ། ས་མུངྒ་ཏེ་ཡང་དག་འཕགས་ཏེ་སྭཱ་ཧཱ་གཞི་ཚུགས། །བདུན་བཟླས་སྨན་དེ་བདུད་རྩིར་བསམས་ཏེ་སྨན་ཕུད་རིག་འཛིན་མཆོད། །རང་གིས་ཀྱང་ཅུང་ཟད་མྱང་བ་དངོས་གྲུབ་བླངས་པས་རང་གི་ནད་གདོན་བསལ། །དེའང་ནད་པས་བསྟེན་པས་འཆི་བ་སོས་པར་ཡང་བསམ་པ་ལྟར་བྱས་ལ། །དམ་ཚིག་ལྡན་ཞིང་བྱིན་འབེབས་བཀྲ་ཤིས་ལ་བསོད་ནམས་འབྱུང༌། །

བཞི་པ་རྣམ་པ་བཟོ་བ་ལུས་ངག་ཡིད་དང་གསུམ། །ལག་པ་བདེ་ཞིང་བཟོ་བས་སྨན་དཔྱད་ལ་གང་དགོས་པའི་ཡོ་བྱད་བཟོ་ལ་མཁས། །ངག་ཚིག་སྙན་པས་ནད་པ་སྤྲོ་བ་སྐྱེད་ནུས་པ། །རིག་པ་བཀྲ་བས་ཡིད་ལ་མ་རྨོངས་གསལ། །དེ་ཤེས་བཟོ་རྣམས་ཀུན་གྱི་དཔོན་དུ་འགྱུར། །

ལྔ་པ་བྱ་བ་ལ་བརྩོན་བདག་དང་གཞན་གཉིས་ཏེ། །དང་པོ་བདག་ཉིད་ཀྱི་བྱ་བ་ཐོག་མར་བརྩོན་པ་རྒྱུ་ལ་བསླབ། །དེ་རྗེས་རྐྱེན་བསྟེན་གྲོགས་བཟང་པོ་ལ་བརྩོན་པར་བྱ་གཞུང་དང་ལག་ལེན་ཐམས་ཅད་གོམས་པར་བྱ་ཞིང་མཐར་དབྱུང༌དགོས་སོ། །

དང་པོ་རྒྱུ་ནི་ཡི་གེ་འདྲི་བ་དང་ཀློག་པ་མཐའ་རུ་ཕྱིན་པར་བསླབ། །ཇི་སྐད་དུ། སླབ་པ་ཀུན་གྱི་གཞི་འཛིན་ཅིང་། རིག་བྱེད་སྨྲ་བ་རྣམས་ཀྱི་རྒྱུ། མིང་ཚིག་བརྗོད་པ་ཀུན་གྱི་གཞི། །ཡི་གེའི་སྦྱོར་བ་བཤད་པར་བྱ། ཞེས་གསུངས་སོ། ཡོན་ཏན་གྱི་ཆོད་དང་མི་ཆོད་དེ་ལ་བརྟེན་པར་སྣང༌། །

གཉིས་པ་དེ་རྐྱེན་སློབ་དཔོན་བསྟེན་དགོས་ཏེ་སློབ་དཔོན་གྱི་མཚན་ཉིད་དང༌། །སློབ་དཔོན་དེའང་བསྟེན་པའི་ཐབས་དང་སློབ་དཔོན་བསྟེན་པའི་དགོས་པ་གསུམ་ལས། །དང་པོ་སློབ་དཔོན་གྱི་མཚན་ཉིད་ནི་གཞུང་རྒྱ་ཆེ་བ་དང་ལག་ལེན་ལ་མཁས་པ་དང་མན་ངག་གི་གནད་དང་ལྡན་པ། །ཁྲམ་དང་གཡོ་རྒྱུ་མེད་ཅིང་ངང་རྒྱུད་རིང་བ་གསོག་ཆུང་སྟེ་ནོར་རྫས་ལ་འདོད་པ་ཆུང་བ་དང་སེམས་ཅན་ནད་པར་ཤིན་ཏུ་བརྩེ་བ་ལ་བཀུར་འོས་པའི་སློབ་དཔོན་དེ་འདྲ་བར་བསྟེན་པར་བྱས་ལ། །དེ་ཉིད་བསྟེན་ཐབས་ནི་འཇིག་རྟེན་གྱི་བྱ་བ་རང་འདོད་དོགས་པ་མེད་པར་བློ་རྩེ་སྙིང་ཁོངས་སུ་གཏད་ལ། །ངོ་ལྐོག་མེད་པར་སློབ་དཔོན་གྱི་བྱ་བ་བསྒྲུབ་པར་བྱ། །སྤྱོད་པ་ཐམས་ཅད་སློབ་དཔོན་དེ་ཡི་ཡུལ་དང་བསྟུན། །སློབ་དཔོན་པས་དྲིན་དུ་ཚོར་བས་རང་གི་ངང་རྒྱུད་རྒྱུན་དུ་བསྲིང་བར་བྱ། །དེ་ལྟ་བུའི་དགོས་པ་དེ་ཡོན་ཏན་མྱུར་བར་ལོབས་དང་མཁས་པར་འགྱུར་རོ། །

གསུམ་པ་དེ་ཡང་ཡོན་ཏན་ཤེས་པའི་གྲོགས་པོ་གང་ལ་བརྩོན་པར་བྱ་བ་དང་ཐེ་ཚོམ་ཞུ་བ་དང་དྲི་བ་དང༌། །དཔེར་ན་བཟུང་བ་དང་དེའི་དོན་བསམ་པར་ལེ་ལོ་བྱ་བ་མིན་ཏེ། །ཅི་ཡི་ཕྱིར་ན་དེ་ཉིད་བར་གཅོད་པའི་དགྲ་ཡིན་ནོ། །

བཞི་པ་གཞུང་གདམས་ལ་གོམས་པ་མཐར་དབྱུང་ཞིང་ཚིག་དོན་མཐོང་བ་ཐོས་པ་ཐམས་ཅད་དང་དུ་བླང་བ་སྟེ། །དེ་དག་ཐམས་ཅད་ལ་ཞེན་འདྲིས་བྱ་ཞིང་ཐེ་ཚོམ་སྤོང་བར་བྱེད་དགོས་སོ། །

གཉིས་པ་གཞན་གྱི་བྱ་བ་ལ་བརྩོན་པ་ནི་ནད་པ་དེ། །དེ་དོན་སྨན་དཔྱད་ཟས་སྤྱོད་ལ་ཕྱི་བཤོལ་གྱི་བར་དུ་མ་ཆོད་པར། །དབང་ཆེན་གཞན་གྱིས་བདག་ལ་གྱང་ཐོག་ཏུ་མར་གྱིས་གང་བའི་ཕོར་བ་འདི་བོ་ན་ཁྱོད་རང་གསོད་ཅེས་བསྡིགས་པ་བཞིན་དུ་ནད་པ་དང་དུ་བླངས་ལ། །སྨན་དཔྱད་གང་དགོས་པར་དུས་ལས་མ་འགྱངས་པར་བརྩོན་པས་སྒྲིམས་ལ་འབད་དོ། །

དྲུག་པ་མི་ཡི་ཆོས་ལུགས་མཁས་པར་བྱ་བ་ནི། །མི་ཆོས་པ་དང་དམ་པ་ཐུན་མོང་གསུམ་ལས། །དང་པོ་མི་ཆོས་མཁས་པར་བསླབ་ལ་ཉེ་རིང་དྲག་ཞན་མེད་པར་འབོད་མི་གང་བྱུང་སར་འགྲོ་ཞིང་གཉེན་ཉེ་བའི་སྒོ་ནས་འཇམ་གྱིས་བཙའ་བ་སྟེ་མགུ་བར་བྱེད་པ། །གཞན་དང་མཐུན་པས་རང་དོན་གཞན་ལ་མི་འབྱུང་བའི་ཐབས་དང་ང་རྒྱལ་གྱི་དྲེགས་པ་ཅན་རྣམས་ཀྱིས་འོག་ཏུ་མི་འཛུད་པར་རང་ཚུགས་ཀྱིས་སྨིན་པར་བྱ་ལ་གྱོང་གིས་གཞན་གྱི་ཁེངས་པ་དང་འདོད་སེམས་འདུལ་བ་དང་གསུམ་སེམས་ནང་ལྡན་ན་རང་གཞན་གྱི་འདོད་པ་འགྲུབ་བོ། །

གཉིས་པ་དམ་པའི་ཆོས་ལུགས་བློ་སྣ་དུལ་ཞིང་འགྲོགས་པ་བདེ་བ་དང་། །ཟས་ནོར་ཆོག་ཤེས་དང་ལྡན་པར་གྱུར་ན་རང་གཞན་ཐམས་ཅད་ཕན་ཐོགས་པར་འགྱུར་རོ། །

གསུམ་པ་ཐུན་མོང་ནི་སེམས་ཅན་ཟས་ནོར་གྱི་ཕོངས་པ་རྣམས་ལ་སྙིང་རྗེས་བཟུང༌། །མཐོན་པོ་རྣམས་ཀྱིས་སྔོན་ལ་རང་གིས་མདོ་དོན་ཡང་དག་པར་སྒྲུབ། །དེ་ལྟར་ཚོགས་པ་དྲུག་པོ་དང་ལྡན་ན་འབྲས་བུ་གང་འདོད་པ་འབྱུང་བར་ཐེ་ཚོམ་མེད་དོ། །

གཉིས་པ་ཉེས་པ་དང་གནོད་བྱ་དང་གཉེན་པོའི་སྨན་གྱི་མཚན་ཉིད་རྣམས། །ཅི་རིགས་ཁོང་དུ་ཆུད་པ་སྨན་པའི་ངོ་བོར་འདོད། །

གསུམ་པ་སྨན་པའི་ངེས་ཚིག་ནད་གསོ་ལུས་ལ་ཕན་ཕྱིར་སྨན་ཞེས་ཕན་པའི་བརྡ་རྙིང་ཡིན། །ནད་ཀྱི་སྟེང་དཔྱད་བྱེད་པ་ལ་དཔའ་བ་དང་འགྲོ་ལ་བུ་གཅིག་པའི་ཕ་ལྟར་སྐྱོབ་ཅིང་། །དེ་ལྟ་བུ་ནི་རྒྱལ་པོ་རྣམས་ཀྱིས་ཀྱང་རྗེ་རུ་འཁུར་བར་བྱེད་པ་སྔོན་སྲོང་བཙན་སྒམ་པོས་རྗེ་རུ་བཀུར་བས་ལྷ་ཡི་རྗེ་བོར་གྱུར་པས་ལྷ་རྗེ་ཞེས་གྲགས་པ་ལྟ་བུའོ། །

བཞི་པ་དེ་ལ་སྨན་པའི་དབྱེ་བ་དེ་སྨན་པ་བླ་ན་མེད་པ་དང༌། །ཁྱད་པར་ཅན་དང་ཕལ་པ་གསུམ་ཡིན་ཏེ། །དང་པོ་བླ་ན་མེད་པའི་དུག་གསུམ་གྱི་རྒྱུ་དང་འབྲས་བུའི་ནད་སེལ་བར་གོང་ན་གཞན་མེད་པ་ནི་སྒྱུ་འཕྲུལ་དྲྭ་བ་ལས། སྨན་པ་ཆེ་མཆོག་གཙོ་བོ་སྟེ། ཟུག་རྔུ་འབྱིན་པ་བླ་ན་མེད། ཅེས་གསུངས་པ་ལྟར་རོ།།

གཉིས་པ་ཁྱད་པར་ཅན་ནི་གཞན་གྱི་ཁམས་སོགས་རིག་པས་མངོན་ཤེས་དང་བྱམས་པ་ལྡན་ཅིང་དྲང་པོར་སྲོང༌བའོ། །

གསུམ་པ་ཕལ་བ་ནི་རྒྱལ་པོས་བཀའ་ཡི་གནང་བ་བྱིན་པའི་རིགས་ཀྱི་བརྒྱུད་པའི་སྨན་པ་དང་སློབ་དཔོན་མཁས་པའི་རྗེས་སུ་སྨན་དཔྱད་སོགས་སྦྱངས་ཤིང་ལས་ལ་གོམས་པའི་སྨན་པ་ནི་འགྲོ་བའི་གཉེན་དུ་གྱུར་པ་ཡིན་ལ་དེ་ཡང་ཇི་སྐད་དུ། སྨན་པ་བློ་ལྡན་ཤེས་རབ་ཅན། རང་གི་ཡོན་ཏན་ཕུན་སུམ་ཚོགས། སྙིང་རྗེའི་སེམས་ཀྱིས་བརླན་པ་ནི། སྨན་པ་ཀུན་གྱི་སྤྱི་རྒྱན་ཡིན། ཞེས་གསུངས་པ་ལྟར་རོ། དེ་ཡང་གཞན་པའི་ཟང་ཟིང་དང་ཁེངས་དྲེགས་ཀྱི་འདོད་པས་འཕྲལ་དུ་སྨན་པའི་ཆ་བཟུང་པ་ནི་སྲོག་གི་གཤེད་མ་ཁོ་ན་ཡིན་ཏེ་སྨན་བླའི་མདོར། །སྨན་པ་སྨན་བག་ཕན་པར་སྦྱོར་བ་ནི། དུས་མ་ཡིན་པར་འཆི་བདག་འཚོང་བར་བྱེད་ཞེས་གསུངས་སོ། །

འོན་ཀྱང་སྨན་པ་མཆོག་དང་ཐ་མར་གྲགས་པ་སྟེ། །དང་པོ་ཕ་མེས་ཀྱི་གདུང་བཙུན་ཞིང་རང་ཉིད་བློ་དང་ལྡན་ཞིང་དམ་ཚིག་ལ་གནས། །གསོ་དཔྱད་ཀྱི་གཞུང་གི་དོན་མཁས་ཅིང་མན་ངག་གནད་དུ་རྡེག་པ། །ལག་ལེན་ལ་ཕྱོགས་པས་གོམས་པའི་ཐོག་ཏུ་གཙོ་བོར་དམ་པའི་ཆོས་ལ་དོན་དུ་གཉེར་ཞིང་ཟང་ཟིང་གི་འདོད་པ་སྤངས་བ། །སེམས་རྒྱུད་དུལ་ཞིང་ལུས་ངག་ཡིད་གསུམ་གྱི་བཟོ་ལས་མཁས་པ་དང་འགྲོ་བ་སེམས་ཅན་ཐམས་ཅད་ལ་བྱམས་སེམས་ཆེ་ཞིང་། །ནད་གསོ་བ་ལ་གཡེལ་བ་མེད་ཅིང་གཞན་གྱི་དོན་ལ་ཇི་ལྟ་བ་རང་དོན་སེམས་པ། །གསོ་དཔྱད་ཀྱི་གཞུང་ལུགས་ཀུན་ལ་རྨོངས་མེད་དེ་ལྟ་བུ་ནི་སྨན་པ་མཆོག་ཡིན་ཏེ། །

རྒྱུ་མཚན་ནི་འགྲོ་བ་ནད་པ་རྣམས་ཀྱི་མགོན་གཅིག་པུ། །རིག་འཛིན་དྲང་སྲོང་རྣམས་ཀྱི་རིང་ལུགས་ཇི་ལྟ་བ་བཞིན་རྒྱུད་པ་འཛིན་པའི་སྲས། །འཚོ་མཛད་སྨན་པའི་རྒྱལ་པོའི་སྤྲུལ་པ་ཡིན་པར་བཤད་དོ། །

གཉིས་པ་དེ་ལྟར་མི་ལྡན་པའི་སྨན་པ་ཐ་མའི་སྐྱོན་ནི་འདི་ལྟ་སྟེ། །རིགས་རྒྱུད་མེད་པའི་སྨན་པ་དེ། །ཝ་ཡིས་རྒྱལ་ས་བཟུང་བ་ལྟར། །ཀུན་གྱིས་སྤྱི་བོར་བཀུར་མི་འགྱུར། །གཞུང་དོན་མི་ཤེས་སྨན་པ་དེ། །དམུས་ལོང་དག་ལ་རྫས་བསྟན་བཞིན། །ནད་ཀྱི་རིགས་དང་དེ་བཅོས་ཐབས་ཤན་མི་ཕྱེད། །གཞུང་དང་མན་ངག་མཐོང་གོམས་མེད་པའི་སྨན་པ་དེ། །ས་རྒྱུས་མེད་པའི་གང་ཟག་ལམ་དུ་ཞུགས་པ་བཞིན། །ནད་རྟགས་དཔྱད་ལ་ཐེ་ཚོམ་འགྱུར། །བལྟ་རེག་དྲི་བའི་སྒོ་ནས་བརྟག་ཐབས་མི་ཤེས་པའི་སྨན་པ་དེ། །མཛའ་བའི་གཉེན་ཤེས་མེད་པ་བྱེས་སུ་འཁྱམས་པ་འདྲ་བས། །ནད་ངོ་ཤེས་པ་གཅིག་མི་འབྱུང༌། །རེག་པ་རྩ་དང་ཆུ་ལ་མི་ཤེས་པའི་སྨན་པ་དེ། །དགྲ་ཡིས་འཇིགས་པ་ཡོད་མེད་བྱ་པས་བྱ་གཏོང་མི་ཤེས་པ་དང་འདྲ་བས། །ཚ་བ་དང་གྲང་བའི་ནད་ཀྱི་འདི་ཡིན་ཅེས་པའི་སྐད་མི་སྟེར། །ནད་འདི་རེད་དང་དེ་བཅོས་པར་ཁ་དམར་མི་ཤེས་པའི་སྨན་པ་དེ། །ཡུལ་མིའི་གཙོ་བོས་སྨྲ་བ་མི་ཤེས་པ་དང་འདྲ་བས། །རང་སྐྱེངས་ཤིང་རྗེས་སུ་གྲགས་པ་ངན་པ་འཕོག །ནད་རྐྱང་པ་ལྡན་འདུས་སྟོབས་ཆེ་ཆུང་རང་རྒྱུད་གཞན་དབང་གནོད་བྱ་ཡུལ་དུས་སོགས་སྦྱར་བའི་བཅོས་ཚུལ་མི་ཤེས་སྨན་པ་དེ། །སྐར་ཁུང་མེད་པའི་མུན་ཁུང་དུ་འབེམ་ལ་མདའ་བརྡེག་པ་དང་འདྲ་བས། །གཉེན་པོ་ནད་ཀྱི་ཐོག་ཏུ་འབབ་པར་མི་འགྱུར་རོ། །ཟས་སྤྱོད་བསིལ་དྲོད་མི་ཤེས་པའི་སྨན་པ་དེ། །རང་སྲིད་དེ་ཤོར་ཏེ་འབངས་དགྲ་ལ་ལོག་པ་དང་འདྲ་བས། །ནད་ཀྱི་སྟོབས་སྐྱེད་པས་ལུས་ཟུངས་ཀུན་འཇོམས། །གཉེན་པོ་ཞི་སྦྱོར་མི་ཤེས་པའི་སྨན་པ་དེ། །ཞིང་པས་སོ་ནམ་བྱེད་མི་ཤེས་པའི་ཞིང་པ་དང་འདྲ་བས། །དམན་པ་དང་ལྷག་པ་དང་ཡང་ན་ལོག་པས་སླར་ཡང་ནད་སྐྱེད་པར་འགྱུར། །རྩ་ལྟོ་སྦྱོང་བྱེད་མི་ཤེས་པའི་སྨན་པ་དེ། །བྱེ་མའི་རི་ལ་ཆུ་འབེབས་པ་དང་འདྲ། །ནད་དང་ལུས་ཟུངས་ཕྱོགས་གཅིག་ཏུ་མ་རུངས་པར་གྱུར་ནས་སྲོག་འཕྲོག་པར་བྱེད། །དཔྱད་ཀྱི་ཆ་བྱད་དང་སྨན་མེད་པའི་སྨན་པ་དེ། །གོ་མཚོན་མེད་པའི་དཔའ་བོ་དང་འདྲ་བས། །ནད་ཀྱི་དགྲ་དཔུང་ཆོམས་མི་འགྱུར། །གཏར་དང་བསྲེག་མི་ཤེས་སྨན་པ་དེ། །འདི་ལ་འདི་ཡོད་མི་སྨྲ་བའི་ནང་ཡན་མེད་པའི་རྐུན་མོ་ནོར་རྫས་དང་མ་འཕྲད་པ་འདྲ། །ནད་དང་དཔྱད་དུ་འཛོལ་བར་འགྱུར་རོ། །

རྒྱུ་མཚན་དེའི་ཕྱིར་སྨན་པ་ངན་པ་རྣམས་ནི། །ནད་གཞི་ཅི་ནི་ལྕི་བ་དང་ཡང་བ་དང་ཚ་གྲང་ལོག་པར་རྟོགས་པ་ཡིས། །གསོ་བ་བྱེད་ལུགས་ལོག་པ་དག་ཏུ་འགྱུར། །འདི་འདྲ་བའི་སྨན་པ་སྟེ་བདུད་ཉིད་སྨན་པའི་ཆ་བྱད་ཅན། །གཤིན་རྗེའི་ཞགས་པ་ལག་ན་ཐོགས་པ་ཡིན་པས་ན། །སྲོག་གི་གཟུ་བ་སྟེ་སྲོག་གཤིན་རྗེའི་ལག་ཏུ་གཏོད་མཁན་ཡིན་པའི་ཕྱིར་དེའང་། །འབྲེལ་བ་མི་བྱ་འཁོར་རྣམས་འཕུང་ངོ༌། །

ལྔ་པ་སྨན་པའི་ལས་ལ་ཐུན་མོང་བ་དང་ཁྱད་པར་གཉིས་ལས། །དང་པོ་ལུས་ངག་ཡིད་ཀྱི་བྱ་བའི་ལས། །ལུས་ཀྱིས་སྨན་དང་ཆ་བྱད་གང་ལ་གང་དགོས་པ་ཐམས་ཅད་ཚོགས་པར་བསག །ནད་ལ་ཕན་པའི་བྱ་བ་གང་ཡིན་དོན་དུ་གཉེར་བར་བྱའོ། །

གཉིས་པ་ངག་གི་ལས་ནི་ཁ་དམར་གདགས་པ་སྟེ་ནད་འདི་ཞེས་ལུང་བསྟན་པ། འཚོ་འཆི་རྟོགས་ན་ཁྲོམ་དུ་དུང་འབུད་ལྟ་བུར་ཁ་དམར་གདགས། །གསོ་སླ་བ་ནི་འཚོ་བར་ཁས་བླངས་ནད་གསོ་དཀའ་བ་རྣམས་ཞག་འདི་ན་འཆི་བར་དུས་བཏབ་གཅེས། །ཡན་ལག་བརྒྱད་པ་ལས། ཚེ་ཡི་རིག་བྱེད་ཅེས་བྱ་བ། ཚེ་ཤེས་པ་ལ་གནས་པ་ཡིན། ཞེས་གསུངས་པ་ལྟར་རོ། འཚོ་བའི་ཉམས་ཚོད་མ་ལོངས་ན་སྦྲུལ་ལྕེ་ལྟ་བུར་འཚོ་འཆི་ཡོད་མེད་གཉིས་སུ་གདགས། །འཚོ་འཆི་གཉིས་ལ་ཞོན་ནས་དེ་དག་ལོག་པར་བྱས་ན་གང་བཟང་སྟེང་དུ་བྲོས། །

ཡང་ན་ནད་པའི་བློ་དང་ནད་ངོ་མཐུན་པར་སྣང་བ་ན་དེ་ལྟར་ཡིན་ཞེས་གསལ་གདབ་ཅིང༌། །སྨན་པ་རང་གི་བློ་ཡི་ཆོད་པ་དེའང་ཡུལ་ནད་པ་དང་བསྟུན་པ་དང༌། །བཟང་ངན་གང་ཡང་སྲིད་པའི་སྒོ་མི་བགག་པར་ཚིག་བཙན་པའི་རྫོང་ལ་བྲོས། །འདི་ནད་གཞི་ཤིན་ཏུ་ལྕི་མོད་ཀྱང་མིག་རྒྱང་གྱིས་འཚོ་བ་དང་འཆི་བ་ཡང་བལྟ་དགོས་སོ།།

དེ་ཡང་དང་པོ་ནད་པས་དོགས་པ་དང་སྨན་པས་རྟོགས་པ་གཉིས། །གཅིག་པར་མཐུན་ན་ནད་གཞི་དེ་ཉིད་གསལ་པོར་བརྗོད། །

གཉིས་པ་ནད་པས་དུག་ཏུ་དོགས་པ་ལ། །དེ་ལྟར་མ་ཡིན་པར་ནད་གཞན་ངོས་བཟུང་པ་དེ་ཉིད་ཐོག་ཏུ་མ་བྱུང་ཟེར་བའང་སྲིད་པའི་ཕྱིར། །ལྟར་སྣང་བློ་བསྟུན་ལ་དེར་ནད་ངོས་མིང་བཏགས་ལ་དོན་དུ་ནད་གང་ཡིན་པ་དེ་རང་བཅོས་དགོས་པ་ཡིན་ནོ། །གསུམ་པ་འཚོ་བ་དང་འཆི་བ་ཉེན་ཆེ་དང་ཉེན་ཆུང་རྣམས། །སྨན་པ་ནད་པ་གཉིས་ཀའི་ཀླུང་རྟ་དར་རྒུད་དང་ལས་དབང་འགྲོ་དང་མི་འགྲོ་དང་བསོད་ནམས་ཆེ་ཆུང་དང་རྐྱེན་གྱི་དབང་གིས། །ཇི་འདྲ་ནད་གཞི་ཆུང་ཀྱང་འཆི་བ་མང་ལ་ཇི་འདྲ་ནད་གཞི་ཆེ་ཡང་འཚོ་བའི་ཕྱིར། །འཚོ་བའི་ཁ་དམར་ཧ་ཅང་གསལ་བ་ཁོ་ནར་སྨྲ་མི་བཏུབ་བོ། །ཉེན་ཆེར་ཡོད་ཀྱང་གསོ་རུ་ནི་ཡོད་པར་སྨྲ་བ་དང་། །ཉེན་ཆུང་ཚོར་འདི་ལ་ཡང་བྱ་ར་བསྒྲིམ་དགོས་པར་སྨྲ། །ལར་ཡང་ཀུན་རྫོབ་ཏུ་མི་ཆོས་འཇིག་རྟེན་དག་དང་སྒོ་བསྟུན་པར་བྱའོ། །

གསུམ་པ་རང་གི་ཡིད་ཀྱི་ལས་མ་འཁྲུལ་བར་བརྩོན་པས་བསམ་ཞིང་བརྟག་ལ་དཔྱད་གཞིག་པར་དགོས་སོ། །

གཉིས་པ་ཁྱད་པར་དུ་སྨན་པའི་ལས་ནི་ལྟ་བ་དང་སྒོམ་པ་དང་སྤྱོད་པ་གསུམ་ལས། །དང་པོ་ལྟ་བ་ནི་སྤྱིར་ཆོས་རྣམས་ཀུན་ལ་མཚན་ཉིད་ཡང་དག་དབུ་མར་རྟོགས་པ་དང་། །དེ་བཞིན་དུ་དམན་པའི་མཐའ་དང་ལྷག་པའི་མཐའ་ལོག་པའི་མཐའ་བཅས་སྤངས་པའི། །ཆོས་ཚུལ་ཡང་དག་པ་དབུ་མར་བལྟ་བ་དེ་ནི་ལྟ་བའི་མཆོག་ཡིན་ནོ། །

གཉིས་པ་སྒོམ་པ་ནི་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་བཅས་ཏེ་ཚད་མེད་བཞི་ཡི་ངང་དུ་གནས། །ལོག་པའི་གོལ་ས་གནོད་སེམས་དང་ཞེ་སྡང་དང་ཕྲག་དོག་དང་ཆགས་སྡང་བཞི་རུ་མ་ཤོར་གཅེས། །

གསུམ་པ་སྤྱོད་པ་སྤང་བླང་གཉིས་ལས་མི་དགེ་བ་བཅུ་སྤང༌བ་དེ་སྟེང་དུའང་། །ཚུལ་དང་མི་མཐུན་པའི་སྨྱོ་བ་ལྟ་བུ་དང་འཆལ་གཏམ་དང་མི་རིགས་པའི་ཐོ་ཅོ་ཏེ་མང་བ་སྡིག་པ་དང་ངན་སེམས་སོགས་མི་སྤྱོད་པར་དོར་བ། །སླང་བྱའི་སྦྱིན་པ་བཏང་བ་དང་ཚུལ་ཁྲིམས་སྲུང་བ་དང་བཟོད་པ་སྒོམ་པ་དང་བརྩོན་འགྲུས་བརྩམ་པས་སྤྱད་དོ། །

དྲུག་པ་སྨན་པའི་འབྲས་བུ་ནི་གནས་སྐབས་དང་མཐར་ཐུག་གཉིས་ལས། །དང་པོ་གནས་སྐབས་ཀྱི་འབྲས་བུ་ཚེ་འདིར་སྐྱིད་པ་དང༌། །དབང་ཆེ་བ་དང་ལོངས་སྤྱོད་རྒྱས་པ་དགའ་བདེ་ཕུན་སུམ་ཚོགས་པ་ལྡན་པར་འགྱུར་རོ། །

དེ་དག་སྒྲུབ་པར་བྱེད་པ་ནི་སྨན་འདི་ཉིད་ཡིན་པས། །དེ་ཡང་རང་གི་ཡོན་ཏན་མི་ལ་འཕྱར་ཞིང་ཀུན་གྱིས་རྟོགས་པ་དང་། །རང་ལ་འཚེ་བའི་མི་ལའང་ཞེ་སྡང་དང་འཁོན་འཛིན་མེད་པར་སྤུན་ཟླ་བཞིན་བག་ཕབ་ལ། །ཐབས་མཁས་ཀྱིས་འཁོན་ཇི་ལྟར་བྱེད་བརྟག་ཅིང་གདེངས་ཚོད་བླང་ཞིང་དེའི་སྤྱོད་པ་དང་བསྟུན་ལ་བཅོས། །དེ་ལྟར་བྱས་པ་ཡིས་རང་ལ་བསོད་ནམས་དང་ལྡན་ཅིང་སྙན་པའི་གྲགས་པ་ཐོབ་པར་འགྱུར། །རང་གི་ཡིད་ལ་ཇི་ལྟར་འདོད་པའི་ཟས་དང་ལོངས་སྤྱོད་ཐམས་ཅད་ཤུགས་ལས་འབྱུང་བ། །འདི་ལྟ་བུ་འབྱུང་བའི་དུས་ང་རྒྱལ་མི་བྱ་བར་བག་དང་ལྡན་པས་བཙའ་བར་སྟེ་ཡོན་ཏན་ཆུད་མི་ཟ་བའི་ཐབས་ཤེས་བྱ་ཞིང་ནད་པ་སོས་སུ་ཉེ་བར། །བྲིན་པའི་དུས་སུ་རང་གང་དགོས་པའི་ཟས་ནོར་གཏང་རག་ངག་གིས་གཤེར་ཞིང་བླངས་བར་བྱས་ལ། །དེ་ལས་འགྱངས་ན་དྲིན་བྱས་པར་བརྗེད་ནས་དྲིན་བྱས་པའི་ལན་ཙམ་ཡང་མི་ཁྱེར་བའང་ཡོད་དོ། །

གཉིས་པ་མཐར་ཐུག་གི་འབྲས་བུ་ནི་གཡོ་སྒྱུ་དང་འདོད་པ་རྣམས། །རིང་དུ་སྤངས་ནས་ནད་པ་གསོ་བ་ལ་འཇུག་པར་སྐུར་བ་ཡིན། །བླ་ན་མེད་པའི་རྫོགས་པའི་སངས་རྒྱས་ས་ལ་བགྲོད་འགྱུར་ཞེས། །འཚོ་མཛད་སྨན་པའི་རྒྱལ་པོས་བཤད་པ་ཡིན། །ཞེས་གསུངས་ནས་རིག་པའི་ཡེ་ཤེས་དེ་སྨན་པའི་རྒྱལ་པོའི་དབུའི་གཙུག་ཏུ་ཐིམ་པར་གྱུར་ཏོ། །

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་བ་པོ་སྨན་པའི་ལེའུ་སྟེ་སུམ་ཅུ་རྩ་གཅིག་པའོ། །དེ་ལྟར་ལེའུ་གཅིག་ནི་བྱ་བྱེད་སྨན་པའི་གནས་ཏེ་བཅུ་གཅིག་པའོ། །

།དུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བཤད་པའི་རྒྱུད་ཅེས་བྱ་བ་རྫོགས་སོ།། །།

༈ དཔལ་ལྡན་བཤད་པའི་རྒྱུད་ཀྱི་མཆན་བུ་འདི། །

དབུར་སྟོད་༧འབྲི་གུང་འབྲུ་རྒྱལ་སྐྱུར་རའི་རིགས། །

དོན་གྱི་སྨན་པ་ཆོས་ཀྱི་གྲགས་པས་བཏབ། །

དེང་སང་བཤད་པའི་རྒྱུད་ཀྱི་གསོ་རིག་གཞུང་། །

སྤྱི་ཁོག་མ་ཁྲོལ་ལག་ལེན་དམ་དུམ་གྱིས། །

ནད་ལ་ཕན་པ་བསོད་ནམས་སྟེས་དབང་ཡིན། །

མཁས་པར་མ་བསླབས་ཁེང་གྲགས་སྨན་པ་རྣམས། །

རང་ཚུལ་རིག་ན་མཆི་མ་སྙིང་ཁོང་འཁྲུགས། །

ཚུལ་འདི་སོམས་ལ་གཞུང་འདིར་མཁས་པར་སློབས། །

མ་སྦྱངས་སྨན་པས་ས་སྟེང་ཁྱི་ལྟར་གང་། །

འགྲོ་བའི་བསོད་ནམས་སྣུམ་ཟད་མར་མེ་འདྲ། །

འདྲ་འམ་མེ་འདྲ་ཤེས་ལྡན་ཀུན་གྱིས་གཟིགས། །

                                                ཤུབྷཾ།།  །།

མཐའ་མའི་འདོན་ཐེངས་།: 28.05.2019 ཉིན། 12:49 PM