ལེའུ་བཅུ་བདུན་པ། ཟས་མི་འཕྲོད་པ་སྡོམ་པར་བྱེད་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཟས་སྐོམ་བསྡམ་བྱ་དུག་ལྡན་མི་འཕྲོད་ཟས། །འཕྲལ་དུ་སྲོག་འདོར་ཉེས་པ་འཁྲུག་ཕྱིར་བསྲུང༌། །རྒྱལ་པོའི་ཕོ་བྲང་གི་ཉེ་འཁོར་དུ་སྲོག་འཚོའི་སློབ་དཔོན་ཏེ་སྨན་པ་ཤིན་ཏུ་མཁས་པ་བཞག་པར་བྱའོ། །དེས་ནི་ཟས་སྐོམ་དུག་ལས་ཐར་བར་འགྱུར། དེ་ལྟར་ཡང་སློབ་དཔོན་གྱིས། རྒྱལ་བོའི་ཕོ་བྲང་གི་ཉེ་འཁོར་དུ། སྲོག་འཚོའི་བློ་དཔོན་བཞག་པར་བྱ། །དེ་ལྟར་བྱས་པ་ཐམས་ཅད་དུ། ཐམས་ཅད་ལས་ནི་བསྲུང་བར་འགྱུར་ཞེས་སོ། །

དུག་ལྡན་ཟས་དེ་ཁ་དོག་དྲི་རོ་རང་མདངས་གཞན་དུ་ལྡོག་པ་དང་། །མེར་བསྲེག་ཚེ་དུ་བ་རྨ་བྱའི་མགྲིན་པ་འདྲ་བ་འབྱུང༌། །དེའི་མེ་ལྕེ་ཡང་གཅིག་ཏུ་འཁྱིལ་ཞིང་མེ་སྟག་ཕྲོམ་ཕྲོམ་རྒལ་བ། །མཐོང་ན་བྱ་རོག་གིས་སྐད་དང་ཅོ་འདོན་པ་དང་རྨ་བྱ་དགའ་བའི་རྣམ་འགྱུར་བྱེད་པ། །ཁྱི་ལ་བྱིན་ན་ལྟོ་བ་དྲོས་ནས་སྐྱུག་པ་དང་ཚབས་ཆེ་ན་འཆིའོ། །ཤ་ལ་དུག་ཡོད་ན་རྟག་ཁ་དོག་དམར་ལ་ལྕགས་སྲེག་ཁའང་མི་ལེན་པ་དང་ཤ་བཤགས་པས་རི་བོང་གསོན་པོའི་སྨ་ར་བཅུག་པས་དེ་འཁུམས་ཤིང་འཁྱོགས་པ་དང་། སྦོས་ཤིང་ཆང་དང་སྦྱར་བ་དེ་མིག་ལ་བདུགས་ན་ཚ་ཞིང་འཁྲུག་པར་འགྱུར་རོ། །

དུག་སྟེར་མཁན་གྱི་ཆག་ཚང་པའི་མི་དེ་ཁ་སྐམ་ཞིང༌། །གདོང་པ་རྔུལ་ཞིང་ལུས་འདར་ལ་སྐྲག་ཅིང་འདུག་མི་ཚུགས་པ་དང་། །དུག་ཡོད་པའི་གནོང་བག་གིས་ནི་ཕྱོགས་སུ་བལྟ་བར་བྱེད། །ཤེས་ནས་ཀུན་ལ་གནོད་པར་འགྱུར་ཕྱིར་དོར། །

ཁ་ཟས་མི་འཕྲོད་ཟོས་པས་སྦྱར་དུག་མཚུངས། ཞོ་མ་ལངས་དང་ཆང་གསར་མི་འཕྲོད་དེ། །ཉ་ཡི་ཤ་དང་འོ་མ་འཕྲོད་པ་མིན། །དེ་བཞིན་འོ་མ་ཤིང་ཐོག་གཉིས་མི་འཕྲོད། །བྱ་ཡི་སྒོ་ང་ཉ་ཡི་ཤ་མི་འཕྲོད། །སྲན་མའི་ཚོད་མ་བུ་རམ་ཞོ་མི་འཕྲོད། །ཤ་མོ་ཡུངས་ཀར་མར་ལ་བརྔོས་པ་དང༌། །ཁྱིམ་བྱའི་ཤ་དང་ཞོ་བསྲེས་ཟ་བ་དང༌། །སྦྲང་རྩི་མར་ནག་ཆ་མཉམ་འཕྲོད་མི་འགྱུར། །མར་གསར་འཁར་བའི་སྣོད་དུ་ཞག་བཅུ་ལས། །སྐྱེར་པའི་མེ་ལ་ཧ་རི་ཏྲ་ཤ་བསྲེགས། །ཧ་རི་ཏྲ་ཤ་ཞེས་པ་བྱ་ལྗང་ཁུ་སྟེ། ཆ་མཐུན་ཙམ་ནེ་ཙོ་ཡིན་ནོ་ཞེས་སྐྱོགས་ལོས་གསུངས་ཤིང་སྲེག་པ་དང་རི་བོང་ལ་བྱེད་པའང་སྣང་ངོ་། །ཅོང་ཞི་ཟོས་རྗེས་ཤ་མོ་དང་ཁུར་བ་ལྷན་ཅིག་ཟ། །ཞུན་མར་ཟོས་རྗེས་ཆུ་གྲང་འཐུང་བ་དང༌། །ཤ་ལ་དཀར་འོ་མ་སྐྱུར་ཆང་རྩམ་པའི་དྲིས་ཕོག་པ་དང༌། །བཙོས་པའི་རླངས་བསུབས་ཞག་བདུན་ལོན་པ་དང༌། །སྐྱུར་དང་འོ་མ་ལྷན་ཅིག་ཟ་བ་དང༌། །སྔ་མ་མ་ཞུ་ཕྱི་མ་ཟོས་པ་ཡིས། །ཁ་ཟས་མི་འཕྲོད་ཟོས་པས་འཐབ་པ་དང༌། །སྔར་མ་གོམས་པའི་ཟས་དུས་མིན་ཟོས་པས་དུག་ཏུ་འགྱུར། །

རྩོལ་བཅས་སྣུམ་བསྟེན་དྲོད་ཆེ་དར་ལ་བབ། །སྟོབས་ལྡན་གོམས་པར་ཟོས་ལ་གནོད་མི་འགྱུར། །

ཟས་མི་འཕྲོད་པ་དང་འཕྲོད་པའི་ཟས་བསྟེན་ནམ་མི་འཕྲོད་པ་སྤང་བར་བྱེད་པ་ན། །སྐད་ཅིག་མིན་པར་རིམ་གྱིས་འདྲིས་གོམས་སྒོ་ནས་ཆ་ཡིས་བསླབ་པར་བྱ། །འདིར་འགྲེལ་པ་འབུམ་ནག་ཏུ་གྲངས་གོམས་ཞེས་པ་ལུང་དྲངས་ནས་གྲངས་ཀྱི་སྐབས་ཞག་སྟེ། ཤམ་གྱིས་ཁ་ཟས་འཕྲོད་མི་འཕྲོད་བསྟེན་ལུགས་དང་གོམས་ཞེས་པར་ཡང་ཟས་འཕྲོད་ཐོག་མཐའ་བར་གསུམ་དུ་ཆ་ཆེ་ཆུང་གི་བསྟེན་ལུགས་བཤད་ཀྱང་ཐ་སྙད་ཙམ་མ་གཏོགས་དོན་ལ་མི་འཕྲོད་པ་རིམ་གྱིས་གོམས་སུ་བཅུག་པ་ལས་གཞན་པའི་གྲངས་གོམས་མི་དགོས་སོ། །འཕྲོད་པའི་ཟས་ཆ་བཞི་དང་མི་འཕྲོད་པ་ཆ་རེ་རིམ་བཞིན་མི་འཕྲོད་པའི་ཟས་ཆ་བསྐྱེད་དེ་མཐར་ཆ་མཉམ་ཟ་བ་སོགས་གོམས་པར་འགྱུར་བའོ། །རིམ་པར་མིན་པ་འཕྲལ་དུ་སྤང་པའམ་བསྟེན་པར་བྱས་ན་ཉེས་པ་མྱུར་དུ་འཁྲུག་སྟེ། །གནོད་པ་གནོད་བྱའི་བདག་ཉིད་ཉེར་འཁྲུགས་གྱུར་པས། །དེ་བས་ན་ཕན་མེད་གནོད་པར་བྱེད་པ་ཡིན་པས་མཁས་པས་སྤང༌བར་བྱའོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྡམ་པའི་ལེའུ་སྟེ་བཅུ་བདུན་པའོ།། །།

མཐའ་མའི་འདོན་ཐེངས་།: 28.05.2019 ཉིན། 12:11 PM