༄༅། །བོད་ལུགས་གསོ་བ་རིག་པའི་སྨན་སྦྱོར་གྱི་གལ་གནད་སྙིང་བསྡུས།

སྨན་རམས་པ་སྤེན་པ་ཚེ་རིང་།

སྤྱོད་འཇུག་ལས།

སེམས་ཅན་ནད་པ་ཇི་སྙེད་པ། །

མྱུར་དུ་ནད་ལས་ཐར་གྱུར་ཅིག །

འགྲོ་བའི་ནད་ནི་མ་ལུས་པ། །

རྟག་ཏུ་འབྱུང་བ་མེད་པར་ཤོག །

དང་པོ།    བོད་ལུགས་གསོ་བ་རིག་པའི་ཡ་གྱལ་སྨན་སྦྱོར་རིག་པ་ནི་རྩ་ཆེའི་གདམས་པ་ཞིག་དང་དེང་ཉམ་ཐག་ནད་པར་ཕན་རླབས་ཧ་ཅང་ཆེན་པོ་འབྱུང་བཞིན་ཡོད་སྟབས། ཉམས་པ་སོར་ཆུད་དང་མི་ཉམས་གོང་འཕེལ་དུ་གཏོང་རྒྱུར་འབད་རྩོལ་ལྷོད་མེད་བྱ་དགོས་པ་ནི་གལ་འགངས་ཆེ་བའི་གནད་དོན་ཞིག་ཏུ་མཐོང་།

བོད་ལུགས་སྨན་སྦྱོར་རིག་པར་རྩ་ཆེའི་གདམས་པ་ཞེས་བརྗོད་དགོས་དོན་ནི། དེང་འཛམ་གླིང་ཡུལ་གྲུ་གང་སར་བོད་སྨན་ཞེས་བརྗོད་སྐབས་ཚང་མས་དགའ་མོས་དང་བསྟོད་བསྔགས་བྱེད་ཡུལ། གཞན་ལ་ངོམས་སུ་ཆོག་པ་གྱུར་པ་ནི་མཁས་གྲུབ་གཉིས་ལྡན་གྱི་སྔོན་བྱོན་མཁས་དབང་རྣམ་པའི་བཀའ་དྲིན་ཉག་ཅིག་ཡིན་པ་ནི་བརྗོད་མི་དགོས་པ་ཞིག་ཡིན། དེར་མ་ཟད་དུས་རབས་ཉེར་གཅིག་པ་ཚན་རིག་གི་རྩལ་ནུས་ཚད་མཐོར་སླེབས་པའི་དུས་སུ་ཡང་ནད་ཀྱིས་མནར་བའི་སྐྱེ་འགྲོ་མང་པོར་རང་རེའི་བོད་སྨན་གྱིས་ཕན་རླབས་ཁུངས་སྐྱེལ་ར་སྤྲོད་ཐུབ་པ་ཐོན་གྱི་ཡོད་པ་དེང་དངོས་སུ་མཐོང་རྒྱུ་ཡོད་པ་ནི་གཟི་བརྗིད་ཡིན། འདི་ལྟ་བུའི་རིག་པའི་ལྟ་གྲུབ་བམ་གཞི་བཅོལ་སའི་རྩ་བ་ལྟ་བུ་ནི་འབྱུང་བ་ལྔ་དང་། རོ་དྲུག ནུས་པ་བརྒྱད། ཡོན་ཏན་བཅུ་བདུན། རོ་སྦྱོར་ནུས་སྦྱོར་སོགས་སྨན་རྫས་སོ་སོའི་གནས་ལུགས་ཤེས་པའི་སྒོ་ནས་སྨན་གྱི་སྦྱོར་སྡེབ་སྟོང་ཕྲག་མང་པོ་གཏན་ལ་ཕབ་ཡོད་པ་ནི་རང་རེ་རྗེས་འཇུག་པ་རྣམས་ཀྱི་བསོད་ནམས་ཀྱི་བགོ་སྐལ་དུ་ཐོབ་པའི་ནོར་བུ་རིན་ཐང་བྲལ་བ་ཞིག་རེད་སྙམ། རྩ་ཆེའི་གཞུང་ལུགས་འདི་ལྟ་བུ་ཉམས་པ་སོར་ཆུད་དང་མི་ཉམས་གོང་འཕེལ་ཐོག་བསམ་གཞིགས་བྱེད་སྐབས་འདས་པའི་དུས་རབས་དང་བསྡུར་ན་ཉམས་ཆག་གི་རྣམ་པ་ཞིག་མཐོང་བཞིན་འདུག གང་ལགས་ཞུ་ན། གནའ་སྲོལ་ལྟར་བྱས་ན་གསོ་བ་རིག་པའི་སྨན་པ་ཞིག་ལ་དགེ་བའི་བཤེས་གཉེན་མདུན་ནས་ནད་ཐོག་བརྟག་དཔྱད་དང་། སྨན་རྫས་སྨན་སྦྱོར་སོགས་ཆ་ཚང་བ་ཞིག་སྦྱོང་རྒྱུའི་གོ་སྐབས་ཡོད། འོན་ཀྱང་དེང་གི་དུས་སུ་གསོ་བ་རིག་པའི་སྨན་པ་རྣམས་མཐོ་སློབ་སྒྲིམ་པའི་དུས་སུ་གཞུང་ལུགས་སྦྱོང་རྒྱུ་གཙོ་བོ་དང་ལག་ལེན་སྐོར་ཧ་ཅང་ཉུང་ཉུང་ཡིན། སྨན་སྦྱོར་ཐོག་ལག་ལེན་དེ་བས་ཉུང་བ་ཡོད། མཐོ་སློབ་ཐོན་རྗེས་ལག་ལེན་དངོས་ནང་འཇུག་སྐབས་ཕལ་ཆེ་བ་བརྟག་དཔྱད་སྨན་པ་བྱེད་ཀྱི་ཡོད། ཉམས་ཞིབ་དང་སྨན་རྫས། སྨན་སྦྱོར་ཐོག་འཇུག་མཁན་ནི་ཉུང་ཤས་ཤིག་ཡིན། དེ་ཡང་ལག་ལེན་གཅིག་ཐོག་རིགས་གཅིག་རྐང་འཛིན་བྱེད་མཁན་ཧ་ཅང་དཀོན་ པོ་ཆགས་ཡོད། དེར་བརྟེན་སྨན་སྦྱོར་གཞུང་ལུགས་འདི་ཉིད་ཉམས་པ་སོར་ཆུད་དང་མི་ཉམས་གོང་འཕེལ་དུ་གཏོང་རྒྱུར་དངོས་སུ་ལག་བསྟར་བྱེད་སྐབས་ཧ་ཅང་ཁག་པོ་ཆགས་ཡོད། རྒྱུ་མཚན་ནི་སྒེར་པ་རེ་ཟུང་གིས་འདི་ལྟ་བུའི་རྒྱ་ཆེ་བའི་གཞུང་ལུགས་ཤིག་ཡར་རྒྱས་གཏོང་ཐབས་མེད་པ་ཞིག་ཡིན། འདི་ལྟ་བུའི་ལས་རིགས་ནི་གསོ་བ་རིག་པའི་བསྟི་གནས་འགྲོ་ཕན་བོད་ཀྱི་སྨན་རྩིས་ཁང་ལྟ་བུ་ཞིག་ནས་ལོ་མང་གི་འཆར་གཞི་ཡོད་པའི་སྒོ་ནས་མི་སྣ་གསོ་སྐྱོང་གི་ནུསཤུགས་ལ་བརྟེན་ནས་ལག་བསྟར་བྱེད་དགོས་པ་ཡིན། སྤྱི་ལོ་ ༢༠༡༢ ལོར་ཚོགས་པ་བཞི་མཉམ་རུབ་ཀྱི་ཐོག་ནས་དྷ་རམ་ས་ལར་གསོ་བ་རིག་པའི་ཚོགས་ཆེན་ཞིག་བསྐོང་ཚོགས་གནང་བའི་ནང་ཕྲན་ནས་བོད་ལུགས་གསོ་བ་རིག་པའི་སྨན་སྦྱོར་ཇི་ལྟར་ཡར་རྒྱས་གཏོང་ཐབས་སྐོར་གཏམ་བཤད་བྱ་རྒྱུའི་གོ་སྐབས་གནང་པའི་ནང་བསམ་འཆར་རྒྱས་པ་ཞིག་ཞུས་ཡོད་ཀྱང་ད་ཆ་ལོ་བཅུ་གཉིས་རྗེས་བོད་ལུགས་སྨན་སྦྱོར་རིག་པ་ཡར་རྒྱས་གཏོང་རྒྱུའི་འཆར་གཞི་དང་ལག་བསྟར་གནང་མཁན་གང་དུ་ཡང་མཐོང་རྒྱུ་མེད་པའི་ཁར་ད་ཆ་ཨ་ཡུ་ཤི་(Ayush) ངོས་ནས་ཁྲིམས་དང་སྒྲིག་གཞི་མང་པོ་ཞིག་བཟོ་འཆར་འོག་བོད་ལུགས་སྨན་སྦྱོར་རིག་པའི་གནས་སྟངས་གང་འདྲ་ཞིག་ཆགས་ཡོང་ངམ་སྙམ་པའི་བློ་འཚབ་དང་དོགས་གཞི་ཞིག་འབྱུང་བཞིན་ཡོད་སྟབས། བོད་མི་རིགས་ཀྱི་རིག་གཞུང་ཞིག་ཡིན་པའི་ཆ་ནས་གོང་རིམ་ནས་གཙོས་པའི་མཐོ་དམན་ཚང་མས་ནུས་པ་མཉམ་སྤུངས་ཀྱི་སྒོ་ནས་རིག་པ་སྒྲིམ་པའི་དུས་ལ་འབབ་ཡོད། དེ་ལྟར་མ་ཡིན་པར་ད་ལྟའི་གནས་སྟངས་ལྟར་ཚོགས་སྡེ་དང་སྒེར་སོགས་གང་ཡིན་རུང་རང་རང་སོ་སོའི་སྨན་གྱི་ཐོན་བསྐྱེད་བྱ་རྒྱུ་ཁོ་ནར་རིག་པ་བསྒྲིམས་ཏེ་བོད་ལུགས་སྨན་སྦྱོར་རིག་པ་སྤྱི་ཡོངས་ཀྱི་གནས་སྟངས་ཇི་ལྟར་ཆགས་ཀྱི་ཡོད་མེད་མཉམ་རུབ་ཀྱི་འགན་འཁུར་ཐོག་དགོངས་བཞེས་གནང་མཁན་མེད་ཚེ་མ་འོངས་པར་བརྟག་དཔྱད་སྨན་པ་རྣམས་ལ་མེད་དུ་མི་རུང་བའི་དགོས་མཁོ་སྨན་གྱི་མཐུན་རྐྱེན་ཚད་ལྡན་ཞིག་མཁོ་སྤྲོད་བྱ་རྒྱུ་ཙམ་ཡང་ཁག་པོ་ཆགས་ཉེན་ཡོད་པས། གལ་ཏེ་དེ་ལྟར་བྱུང་ན་གནས་སྟངས་ཇི་ལྟར་ཆགས་མིན་ཐོག་ཚང་མ་བློ་འཚབ་བྱེད་དགོས་པ་ཞིག་ཡིན།

གཉིས་པ།  གོང་གསལ་གནད་དོན་གྱི་རྩ་བ་ལྟ་བུ་ནི་སྨན་སྦྱོར་སྨན་པའི་ངོས་འཛིན་དང་རིགས་གཅིག་རྐང་འཛིན་གྱི་མི་སྣ་ཇི་ལྟར་གསོ་སྐྱོང་བྱེད་ཚུལ་ལ་རགས་ལུས་པར་བརྟེན། རང་རེ་བཙན་བྱོལ་སྤྱི་ཚོགས་ནང་སྨན་སྦྱོར་སྨན་པ་ཚད་ལྡན་ཞིག་གསོ་སྐྱོང་ཐད་འཐུས་ཤོར་གྱི་རྣམ་པ་ཞིག་མཐོང་བས་བསམ་གཞིགས་ནན་པོ་བྱེད་དགོས་པའི་དུས་ལ་འབབ་འདུག་སྙམ།

དེང་རབས་སྨན་ལུགས་དང་ཨ་ཡུར་ཝེ་དྷ་སོགས་གནའ་སྲོལ་སྨན་ལུགས་ནང་སྨན་སྦྱོར་སྨན་པའི་ངོས་འཛིན་དང་ལག་འཁྱེར་སོགས་ཁ་གསལ་ངོས་འཛིན་ཡོད། འོན་ཀྱང་རང་རེའི་བོད་ལུགས་གསོ་བ་རིག་པའི་སྨན་སྦྱོར་སྨན་པ་ཞེས་བརྗོད་སྐབས་ངོས་འཛིན་དང་དབྱེ་འབྱེད་ཇི་ལྟར་ཡིན་མིན་ཁ་གསལ་མེད་པ་ནི་འཐུས་ཤོར་དང་རྗེས་ལུས་ཀྱི་རྣམ་པ་ཞིག་ཡིན། ཕྲན་ལྟ་བུ་སྨན་སྦྱོར་སྨན་པ་རྒན་གྲས་ཤིག་ཡིན་ཁུལ་དུ་བྱས་ཀྱང་མཐོ་སློབ་ཐོན་རྗེས་སྨན་སྦྱོར་གྱི་ལས་རིགས་སུ་ཞུགས་པའི་བརྒྱུད་རིམ་ནང་དགེ་བའི་བཤེས་གཉེན་དང་རྒན་གྲས་ཁག་གི་མདུན་ནས་མཐོང་བརྒྱུད་ཀྱི་ཉམས་མྱོང་རིམ་གསོག་བྱས་མཐར་སྨན་སྦྱོར་སྨན་པའི་ངོས་འཛིན་ཐོབ་པ་ལས་སྨན་སྦྱོར་གྱི་མཐོ་སློབ་བསྒྲིམས་ཏེ་སྨན་སྦྱོར་གྱི་གཞུང་ལུགས་དང་ལག་ལེན་ཁག་ཁྲིད་རྗེས་སྨན་སྦྱོར་སྨན་པའི་ལག་འཁྱེར་ཐོབ་པ་ཞིག་ཆགས་མེད། ད་ལྟའི་ཆར་ཡང་སྨན་སྦྱོར་སྨན་པ་རྣམས་ཀྱི་གནས་སྟངས་གཅིག་གྱུར་ཆགས་ཡོད་སྟབས་ཁྲིམས་དང་སྒྲིག་གཞི་གང་གི་ཆ་ནས་རྩ་བ་ལྟ་བུ་དེ་ལ་སྐྱོན་ཤོར་གྱི་རྣམ་པ་ཞིག་ཡོད། དེ་མཚུངས་སྨན་སྦྱོར་སྨན་པ་གསོ་སྐྱོང་ཐད་ཅུང་ཟད་ཞུས་ན། གསོ་བ་རིག་པའི་སྡེ་ཁག་འགྲོ་ཕན་བོད་ཀྱི་སྨན་རྩིས་ཁང་ལྟ་བུ་ནས་སྨན་སྦྱོར་སྨན་པ་ཚད་ལྡན་གསོ་སྐྱོང་དང་ལྷ་རབ་བྱུང་ན་སྨན་སྦྱོར་རིགས་གཅིག་རྐང་འཛིན་གྱི་སྨན་པ་མི་ཉུང་བ་ཞིག་དགོས་པ་ནི་བོད་ལུགས་སྨན་སྦྱོར་རིག་པའི་གཞུང་ལུགས་དང་ལག་ལེན་ཐོག་ཉམས་ཞིབ་དང་བཟོ་རྩལ་ཡར་རྒྱས་སོགས་ཀྱི་ཐོག་ཇི་ལྟར་གོམ་པ་སྤོས་ཀྱང་མི་རབས་གོང་མ་རྣམས་ཀྱི་མཐོང་བརྒྱུད་ཀྱི་ལག་ལེན་ཆ་ཚང་བ་ཞིག་ལྡན་པ་དགོས་པས། སྨན་སྦྱོར་གྱི་སྨན་པ་རྒན་གཞོན་བར་གསུམ་ཆ་ཚང་བ་ཞིག་གཅེས་ཉར་དང་གསོ་སྐྱོང་བྱེད་དགོས་པ་ནི་བོད་ལུགས་སྨན་སྦྱོར་རིག་པ་ཡར་རྒྱས་གཏོང་རྒྱུའི་རྨང་གཞི་ལྟ་བུ་ཆགས་ཡོད་ཀྱང་། ཚང་མས་མཐོང་ཆོས་སུ་གྱུར་པ་ནི་འགྲོ་ཕན་བོད་ཀྱི་སྨན་རྩིས་ཁང་ནང་ད་ལྟ་ཕྱག་ལས་གནང་བཞིན་པའི་སྨན་སྦྱོར་སྨན་པ་བགྲེས་གྲས་གང་ཙམ་ཡོད་པ་རྣམས་ནད་པ་བརྟག་དཔྱད་སོགས་ལས་རིགས་གཞན་གྱི་ཐོག་བཀོད་བསྒྲིགས་གནང་བ་ལས་གང་ལ་སྦྱངས་པ་དེ་ལ་མཁས་ཟེར་བའི་དཔེ་ལྟར་མིག་སྨན་མིག་ཐོག་ཏུ་ཕན་པའི་ལས་འགན་བཀོད་བསྒྲིགས་ཤིག་གནང་མེད་པ་ནི་འཛིན་སྐྱོང་དང་རིག་གཞུང་སྡེ་ཚན་གཉིས་ཀའི་འཐུས་ཤོར་གྱི་རྣམ་པ་ཞིག་ཡིན།

གསུམ་པ། བོད་ལུགས་གསོ་བ་རིག་པའི་སྨན་རྫས་རིག་པ་ནི་སྨན་སྦྱོར་རིག་པར་མེད་ཐབས་མེད་པའི་ཆ་རྐྱེན་གལ་ཆེ་ཞིག་ཡིན་སྟབས། སྨན་སྦྱོར་སྨན་པ་རྣམས་ལ་གཞུང་དང་ལག་ལེན་གཉིས་ཀའི་ཐོག་སློབ་སྦྱོང་ཚད་ལྡན་ཞིག་སྤྲོད་དགོས་པ་ནི་སྨན་སྦྱོར་རིག་པའི་རྨང་གཞི་ལྟ་བུ་ཡིན། རང་རེའི་སྨན་པ་རྣམས་མཐོ་སློབ་སྒྲིམ་པའི་གནས་སྐབས་སུ་སྔོ་སྨན་དང་ཁྲོག་སྨན་སྦྱོང་རྒྱུའི་གོ་སྐབས་ཅུང་ཟད་ཅིག་ཐོབ་ཀྱི་ཡོད་ཀྱང་མཐོ་སློབ་ཐོན་རྗེས་ཕལ་ཆེ་བ་རང་ཉིད་ཀྱི་ལས་རིགས་དང་འབྲེལ་བ་མེད་སྟབས་ཅུང་ཟད་ཤེས་པ་དེ་ཡང་བརྗེད་འགྲོ་སྐབས་ཕན་ཐོགས་ཡོང་གི་མེད། སྨན་རྫས་ཉམས་ཞིབ་སྡེ་ཚན་ལོགས་སུ་འཛུགས་ཡོད་སྟབས་ལས་རིགས་དེ་ཉིད་ཐོག་སློབ་སྦྱོང་གང་ལེགས་ཐོབ་ཀྱི་ཡོད་ཀྱང་རིགས་གཅིག་རྐང་ འཛིན་གནང་མཁན་ནི་ཆེས་ཉུང་ཤས་ལས་མེད། འོན་ཀྱང་སྨན་རྫས་ངོས་འཛིན་སློབ་སྦྱོང་ཚད་ལྡན་ཐོབ་པའི་མཐར་ཐུག་གི་བེད་སྤྱོད་དེ་སྨན་སྦྱོར་རིག་པ་དང་འབྲེལ་བ་ཆགས་ཀྱི་ཡོད་པར་བརྟེན། སྨན་སྦྱོར་སྨན་པ་རྣམས་ལ་སྨན་རྫས་ངོས་འཛིན་གྱི་སློབ་སྦྱོང་ཚད་ལྡན་ཞིག་སྤྲོད་རྒྱུར་ཤུགས་སྣོན་རྒྱག་ཐུབ་པ་བྱུང་ཚེ་བོད་སྨན་གྱི་སྤུས་ཚད་ལ་ཡང་ཁྱད་པར་ཆེན་པོ་འགྲོ་ངེས་ཡིན་པ་དང་སྨན་རྫས་ངོས་འཛིན་གྱི་མཐོང་བ་བརྒྱུད་པའི་ལག་ལེན་དེ་ཉིད་སྲ་བརྟན་རྒྱུན་འཁྱོངས་སུ་གནས་ཐུབ་པའི་ཐབས་ལམ་བཟང་ཤོས་ཤིག་ཡིན། རྒྱུ་མཚན་ནི་སྨན་སྦྱོར་སྨན་པའི་ལས་རིགས་ནི་སྨན་བཟོ་བསྐྲུན་སྐབས་དུས་རྟག་ཏུ་སྨན་རྫས་ངོས་འཛིན་གྱི་རྣམ་གྲངས་ཐད་བཤད་པའི་རྒྱུད་ལས། རིན་པོ་ཆེའི་སྨན་དང་ས་རྡོའི་སྨན། །ཤིང་སྨན་རྩི་སྨན་ཐང་སྨན་སྔོ་སྨན་དང༌། །སྲོག་ཆགས་སྨན་དང་དབྱེ་བ་བརྒྱད་དུ་བཤད། ཅེས་གསུངས་ཡོད་པ་རྣམས་ཀྱི་ཐོག་བསམ་བློ་གཏོང་བ་དང་བེད་སྤྱོད་བྱེད་དགོས་པ་ཞིག་ཆགས་ཀྱི་ཡོད་སྟབས་ངོས་འཛིན་འཁྲུལ་སོའི་ཐེ་ཚོམ་མེད་པ་ཞིག་དགོས་ངེས་དང་། དེ་བཞིན་སྨན་རྫས་ཐོག་ཉམས་ཞིབ་དང་། བགྲོ་གླེང་། ངོས་འཛིན་གཏན་འབེབས་གནང་རྒྱུའི་གོ་སྐབས་བཟང་ཤོས་དེ་སྨན་སྦྱོར་སྨན་པ་རྣམས་ལ་ཡོད།

བཞི་པ། མདོར་ན་དེང་གི་འགྲོ་ལུགས་དང་མཐུན་པར་བོད་ལུགས་སྨན་སྦྱོར་རིག་པ་འདི་ཉིད་རིགས་གཅིག་རྐང་འཛིན་བྱ་རྒྱུའི་ལམ་སྲོལ་གསར་གཏོད་བྱ་ཐུབ་པ་བྱུང་ཚེ་བོད་སྨན་ཞིབ་འཇུག་དང༌། གསར་གཏོད། བཟོ་རྩལ་ཡར་རྒྱས་གཏོང་རྒྱུ་སོགས་ཀྱི་ཐད་དངོས་སུ་ལག་བསྟར་བྱ་ཐུབ་པའི་མཐུན་རྐྱེན་གལ་ཆེ་ཞིག་ཡིན་པ་མ་ཟད། སྨན་གྱི་ཁྲིམས་ལུགས་དང་མཐུན་པའི་གོམ་སྟབས་སྤོ་རྒྱུར་ཡང་ཕན་རླབས་རྒྱ་ཆེ་ཡོང་རྒྱུ་ཡིན་པ་བཅས་གནས་སྟངས་མང་པོ་ཞིག་ལ་འགྱུར་བ་དང་ནུས་པ་འདོན་ཐུབ་པའི་ཕུགས་བསམ་གལ་ཆེ་ཞིག་ཏུ་འགྱུར་ངེས་ཡིན།

གོང་ཞུས་ལྟར་བོད་ལུགས་གསོ་བ་རིག་པའི་སྨན་སྦྱོར་སྨན་པ་ཞེས་པའི་ངོས་འཛིན་དེ་སྨན་སྦྱོར་གྱི་ལས་ཀ་བྱེད་པའི་བརྒྱུད་རིམ་ནང་མཐོང་བ་བརྒྱུད་པའི་ལག་ལེན་གང་ཙམ་ཞིག་སྦྱངས་ཏེ་སྨན་སྦྱོར་གྱི་ལས་རིགས་ནང་འཇུག་བཞིན་པ་དང་། སྐབས་རེ་ཡུན་རིང་ནད་ཐོག་བརྟག་དཔྱད་ནང་ཞུགས་པའི་སྨན་པ་གང་ཞིག་སྨན་སྦྱོར་སྨན་པའི་ལས་རིགས་ནང་འཇུག་པ་དང༌། ཡང་ཡུན་རིང་སྨན་སྦྱོར་སྨན་པའི་ལས་རིགས་ནང་འཇུག་པ་གང་ཞིག་བརྟག་དཔྱད་སྨན་པའི་ལས་རིགས་ནང་འཇུག་པ་སོགས་ཕྱི་ཕྱོགས་ནས་བལྟ་སྐབས་ལམ་ལུགས་ཚད་ལྡན་མེད་པ་དང་། དེང་དུས་ཀྱི་འགྲོ་སྟངས་དང་མི་མཐུན་པ་ཡོད་པ་ནི་དུས་ཚོད་དང་མཐུན་པའི་བསྒྱུར་བ་གཏོང་མི་ཐུབ་པའི་སྐྱོན་ཆ་ཞིག་དང་རྗེས་ལུས་ཀྱི་རྣམ་པ་ཞིག་ཡིན། དེར་བརྟེན་གསོ་བ་རིག་པའི་བསྟི་གནས་འགྲོ་ཕན་བོད་ཀྱི་སྨན་རྩིས་ཁང་ལྟ་བུའི་མཐོ་སློབ་ནང་སྨན་སྦྱོར་ཐོག་རིགས་གཅིག་རྐང་འཛིན་བྱེད་ཡུལ་གྱི་སྡེ་ཚན་ལོགས་སུ་འཛུགས་དགོས་པའི་དུས་ལ་སླེབས་ཡོད། དེ་ཡང་དེང་རབས་སྨན་གྱི་ལུགས་དང་ཨཡུར་ཝེ་དྷ་སོགས་སྨན་ལུགས་རྙིང་པ་ཁག་ནས་དཔེ་བླངས་ཏེ་བོད་ལུགས་སྨན་སྦྱོར་རིག་པའི་སློབ་ཚན་གསར་བསྒྲིགས་ཁོངས་སུ་སྨན་སྦྱོར་གྱི་དཔེ་དེབ་གལ་ཆེ་ཁག་གི་བཤད་ཁྲིད་དང་། སྨན་རྫས་ངོས་འཛིན་གྱི་དཔེ་གཞུང་ཁག་གི་བཤད་ཁྲིད། སྨན་རྫས་ངོ་སྤྲོད་ཀྱི་ལག་ལེན་དམར་ཁྲིད། སྨན་རྫས་ཁག་གི་དུག་འདོན་གཡའ་ཕྱིས་དང་སྨན་གྱི་སྦྱོར་སྡེབ་སོགས་ཀྱི་ལག་ལེན་དམར་ཁྲིད། དེ་ཐོག་རྒྱུད་བཞིའི་བཤད་ལུང་དང་ལེའུ་གལ་ཆེ་ཁག་གི་བཤད་ཁྲིད་མདོར་བསྡུས་ཡོད་པ་ལྟ་བུའི་སློབ་ཚན་གཏན་འབེབས་གནང་བའི་སྒོ་ནས་སློབ་ཡུན་དང་སྨན་སྦྱོར་གྱི་གཞུང་ལུགས་ཐོན་པའི་ལག་འཁྱེར་གནང་སྟེ། སྨན་སྦྱོར་རིགས་གཅིག་རྐང་འཛིན་པ་གང་ཙམ་གསོ་སྐྱོང་ཐུབ་པ་བྱུང་ཚེ་ཁྲིམས་ལུགས་དང་མཐུན་པའི་སྨན་སྦྱོར་སྨན་པའི་ངོས་འཛིན་ཞིག་ཐོབ་རྒྱུ་དང་། བོད་སྨན་ཐོག་ཞིབ་འཇུག་དང་གསར་གཏོད། བཟོ་རྩལ་ཡར་རྒྱས་གཏོང་རྒྱུས་མཚོན་པའི་གནས་སྟངས་མང་པོ་ཞིག་ལ་ནུས་པ་འདོན་ཐུབ་ཅིང་། མ་འོངས་པར་བོད་ལུགས་སྨན་སྦྱོར་རིག་པ་ཉམས་པ་སོར་ཆུད་དང་མི་ཉམས་གོང་འཕེལ་དུ་གཏོང་ཐུབ་ངེས་ཡིན་ནོ།

སྤྱི་ལོ་ ༢༠༢༤ ཟླ་ ༦ ཚེས་ ༡༢ ནས་ ༡༤ བར་བཞུགས་སྒར་དྷ་རམ་ས་ལར་འགྲོ་ཕན་བོད་ཀྱི་སྨན་རྩིས་ཁང་ནས་གོ་བསྒྲིགས་གནང་བའི་བོད་ཀྱི་གསོ་བ་རིག་པའི་བགྲོ་གླེང་ཚོགས་ཆེན་སྐབས་ཇི་ལྟར་རེ་བསྐུལ་གནང་དོན་བཞིན་འགྲོ་ཕན་བོད་ཀྱི་ སྨན་རྩིས་མཐོ་སློབ་ཁང་གི་སྐབས་ལྔ་པའི་སློབ་ཁོངས་སྨན་པ་སྤེན་པ་ཚེ་རིང་གིས་གཏམ་བཤད་བྱས་པའི་ཟིན་ཐོར་བཀོད་པ་འདི་ཡང་གསོ་རིག་བསྟན་པ་རྒྱས་པའི་རྒྱུར་གྱུར་ཅིག། ༎

བཀྲ་ཤིས་བདེ་ལེགས།

མཐའ་མའི་འདོན་ཐེངས་།: 06.12.2024 ཉིན། 9:59 AM