བོད་ཀྱི་གསོ་རིག་འཕེལ་རྒྱས་ཀྱི་ཐབས་ལམ་ཡངས་པོར་དབྱེ་བ།

བྱམས་པ་འཕྲིན་ལས་དང་ཐུབ་བསྟན་ཚེ་རིང་།

དེ་ནས་བོད་མེ་གླང་(སྤྱི་ལོ་ ༦༡༧)ལོར་སྐུ་འཁྲུངས་པའི་ཆོས་རྒྱལ་སྲོང་བཙན་སྒམ་པོའི་བླ་ན་མེད་པའི་དགོངས་གཞིའི་མཁྱེན་རླབས་ལ་བརྟེན་ནས་བློ་རྣོ་ཞིང་སྙིང་སྟོབས་ཅན་གྱི་ཆོས་བློན་ཐུ་མི་སམ་བྷོ་ཊ་ཞེས་པ་དེས་འཕགས་ཡུལ་དུ་ཕེབས་ནས་ལེགས་སྦྱར་སྐད་ཡིག་བྱང་ཆུབ་པའི་སློབ་གཉེར་མཛད་པ་དང་། ཕྱིར་བྱོན་ནས་དེ་སྔའི་བོད་ཀྱི་ཡིག་རྙིང་གི་གཟུགས་དང་། སྒྲ་དོན་གང་ལའང་བསྒྱུར་བཅོས་གནང་ནས་ད་ལྟ་ཡོངས་གྲགས་ཀྱི་བོད་ཡིག་འདི་བཞིན་ཆ་ཚང་བའི་ཐོག་ནས་གསར་བཟོ་གཏན་འཁེལ་མཛད་པ་དེས་བོད་མི་རིགས་རང་ཉིད་ཀྱི་རིག་གནས་སྤྱི་དང་སྒོས་སུ་གསོ་རིག་བྱ་གཞག་འཕེལ་རྒྱས་འགྲོ་རྒྱུར་རིན་ཐང་བྲལ་བའི་རྨང་གཞི་བཏོད་ཅིང་། ལྷག་པར་དུ་བོད་ལྕགས་གླང་ (སྤྱི་ལོ་༦༤༡) ལོར་རྒྱ་ནག་ནས་གོང་མ་ཐང་ཐའི་ཛུང་གི་སྲས་མོ་རྒྱ་བཟའ་ཝུན་ཤིང་ཀོང་ཇོ་བོད་ལ་སྲོང་བཙན་གྱི་བཙུན་མོར་ཕེབས་དུས་མེས་རྒྱལ་ནས་ཀྲུང་དབྱི་གསོ་རིག་དང་སྨན་རིག་གི་གཞུང་ལུགས་འཕོན་ཆེན་ཞིག་བསྣམས་ཕེབས་པའི་ནང་ནས་ཀྲུང་དབྱིའི་སྨན་གཞུང་<<སྨན་དཔྱད་ཆེན་མོ་>>ཞེས་པ་དེ་ལོ་ཙཱ་མཁས་པ་རྒྱ་ནག་གི་པཎྜིཏ་ཧ་ཤང་མཧཱ་དེ་ཝ་དང་བོད་ཀྱི་ལོ་ཙཱ་མཁས་ཅན་པཎྜིཏ་དྷརྨ་ཀོ་ཥ་གཉིས་ཀྱིས་བོད་ཡིག་ཏུ་བསྒྱུར་ཅིང་། དེ་བཞིན་འཕགས་ཡུལ་གྱི་སྨན་པ་བྷ་ར་དྷ་ཛ་དང་། རྒྱ་ནག་གི་སྨན་པ་ཧེན་ཝན་ཧང་དེ། ཏ་ཟིག་གི་སྨན་པ་ག་ལེ་ནོས་བཅས་སྨན་པ་གསུམ་བོད་ལ་རྒྱལ་པོའི་སྙུན་གསོ་བའི་ཕྱིར་གདན་དྲངས། རྒྱ་གར་སྨན་པས་རླུང་མཁྲིས་བད་ཀན་གསུམ་དུ་ཕྱེ་བའི་འབུ་ཤག་མ་བུ་ཆེ་ཆུང་དང་། སྦྱོར་བ་མར་གསར། རྒྱ་ནག་གི་སྨན་པས་རྒྱ་དཔྱད་ཐོར་བུ་ཆེ་ཆུང་། ཏ་ཟིག་གི་སྨན་པས་མགོ་སྔོན་བསྡུས་པ་དང་། དེ་ཕོ། རྨ་བྱ། ནེ་ཙོ་གསུམ་གྱི་དཔྱད་སོགས་སོ་སོའི་ཁྱད་ཆོས་དང་མཐུན་པའི་གསོ་དཔྱད་ཀྱི་གཞུང་ལུགས་བསྣམས་ཕེབས་པ་རྣམས་བོད་ཡིག་ཏུ་བསྒྱུར། སྨན་པ་གསུམ་བཀའ་གྲོས་གོ་བསྡུར་གྱིས་ཐུན་མོང་ཐོག་<<མི་འཇིགས་པའི་མཚོན་ཆ་>>ཞེས་པ་བམ་པོ་བདུན་ཡོད་པའི་གསོ་དཔྱད་ཀྱི་གཞུང་གསར་དུ་བརྩམས་ནས་སྲོང་བཙན་ལ་ཕུལ་བས་རྒྱལ་པོ་ཉིད་ཤིན་ཏུ་དགྱེས་ཤིང་། སྨན་པ་གསུམ་ལའང་ཆེད་བསྟོད་མཛད་པ་དང་སྦྲགས་རྒྱ་དཀར་ནག་གི་སྨན་པ་གཉིས་རྒྱལ་པོས་བྱ་དགའ་ཕུལ་ཏེ་རང་རང་གི་ཡུལ་དུ་བཞུད། ག་ལེ་ནོས་སྔར་ཡོད་རྒྱལ་པོ་རང་གི་བླ་སྨན་བློ་གྲོས་བཤེས་གཉེན་གྱི་སྟེང་བླ་སྨན་དུ་དབང་བསྐུར་ནས་དབུས་སུ་བཞུགས་པ་དེས་ <<རོ་བཀྲ་ཆིངས་ཁྲེམས་འཁྲུལ་གྱི་མེ་ལོང་>>དང་། <<ཁྲོམ་གྱི་དབྱེ་བ་དྲུག་པ།>><<མགོ་དཔྱད་མ་བཞི་བུ་དགུ།>><<མདའ་བཅོས་ལེའུ་བཞི་པ།>> སོགས་གསོ་དཔྱད་ཀྱི་བསྟན་བཅོས་མང་པོ་བརྩམས། ཕྱིས་ཁབ་བཞེས་པས་མཚན་མཛོ་རོར་སྨན་པ་ཞེས་འབོད་པ་དང་། སྲས་ཀྱང་གསུམ་བྱུང་བས་ཆེ་བ་གཙང་སྟོད་དུ་བཏང་བས་བི་བྱི་སོགས་ཀྱི་བརྒྱུད་པ་དར། འབྲིང་པོ་གཡོར་པོར་བཏང་བས་ལྷོ་རོང་གི་སྨན་པ་རྣམས་འཕེལ། ཆུང་བ་དབུས་སུ་བཞུགས་པས་སོག་པོ་སྨན་པ་ཞེས་གླེང་། དེ་ལ་བོད་རིགས་བྱིས་པ་བློ་རྣོ་བ་ཁག་གཅིག་སྨན་དཔྱད་སློབ་ཏུ་བཅུག་ནས་ཕྱིས་སྐྱེ་བོ་མཐོ་དམན་ཀུན་ལ་སྨན་དཔྱད་ཀྱིས་ཆོས་ཤིག་ཅེས་བཀའ་བསྒོས་པ་དང་མིང་འཚོ་བྱེད་སྨན་པར་བཏགས། དེའི་གདུང་བརྒྱུད་ཆད་རུང་སློབ་བརྒྱུད་གཉའ་དང་མཐའ་བཞི་སོགས་སྨན་པའི་སློབ་བརྒྱུད་རྣམས་བྱུང་བར་གྲགས། དུས་དེར་རྒྱལ་པོ་ཉིད་ཀྱིས། ལུགས་ཆེན་གསུམ་པོའི་ཚུལ་དག་མ་རྟོགས་ན། །སྨན་པ་ཆེན་པོའི་གྲངས་སུ་མི་འགྲོ་སྟེ། །བདག་དང་གཞན་ལ་ཕན་པར་མི་ནུས་པས། །བར་སྣང་མཁའ་ལ་ཇི་ལྟར་ཐོས་བསྙབ་བཞིན། །ཞེས་གསུངས་ནས་གསོ་དཔྱད་ཐམས་ཅད་ལུགས་སྡེ་ཆེན་པོ་གསུམ་དུ་བསྡུས་ནས་འཆད་པར་མཛད། བྱ་དགའ་ལ་གཙིགས་ཆེན་དགུ་དང་གཙིགས་ཆུང་གསུམ་སྟེ་བཅུ་གཉིས་གནང་།

            དེ་ནས་དུས་རབས་བརྒྱད་པའི་ནང་བོད་རྒྱལ་མེས་ཨག་ཚོམ་མམ་ཁྲི་ལྡེ་གཙུག་བརྟན་གྱིས་བོད་ཀྱི་གསོ་རིག་དར་རྒྱས་འགྲོ་རྒྱུར་ཐུགས་དགོངས་བཞེས་ནས་རྒྱ་ནག་དང་། རྒྱ་གར། བལ་ཡུལ། ཁ་ཆེ། དོལ་པོ་སོགས་ནས་ཕྱོགས་རིགས་ཀྱི་སྨན་པ་མཁས་པ་དགུ་བོད་ལ་གདན་དྲངས་ཏེ་ཡུལ་ལུང་སོ་སོའི་སྨན་དཔྱད་ལག་རྩལ་བརྒྱུད་སྤེལ་སྔར་ན་མ་གྲགས་པ་ཞིག་མཛད་པ་དང་། ལྷག་པར་དུ་བོད་ལྕགས་ཁྱི་ (སྤྱི་ལོ་༧༡༠) ཁྲང་རྔན་ནས་གོང་མ་ཐང་ཀའོ་ཛུང་གི་སྲས་མོ་གྱིམ་ཤིང་ཀོང་ཇོ་ཞེས་པ་སྲས་འཇང་ཚ་ལྷ་དབོན་གྱི་བཙུན་མོར་བསུས་སྟབས་ཡང་བསྐྱར་ཀྲུང་དབྱི་གསོ་རིག་དང་སྨན་རིག་སོགས་ཀྱི་གཞུང་ལུགས་མང་པོ་ཞིག་བོད་ལ་བསྣམས་ཡོད་པ་རྣམས་རྒྱ་ནག་གི་སྨན་པ་ཧ་ཤང་མཧཱ་ཀྱིན་ད་དང་། རྒྱ་ཕྲུག་གར་མཁན། བོད་ཀྱི་རྩིས་སྨན་མཁས་པ་ཁྱུང་པོ་ཙེ་ཙེ་དང་། ཁྱུང་པོ་དམ་ཚུགས། ལྕོག་ལ་སྨོན་འབར་སོགས་ཀྱིས་བོད་ཡིག་ཏུ་བསྒྱུར་ཅིང་། དེ་དུས་བསྣམས་ཕེབས་པའི་སྨན་གཞུང་གི་ནང་ནས་<<སྨན་དཔྱད་ཟླ་བའི་རྒྱལ་པོ་>>ཞེས་པ་(འདི་རྒྱ་གར་ནས་བསྒྱུར་བ་དང་རྒྱ་ནག་ནས་བསྒྱུར་བ་སོགས་བཞེད་པ་མི་འདྲ་བ་མཆིས་རུང་) ཆོས་རྒྱལ་ཁྲི་སྲོང་ལྡེ་བཙན་གྱི་སྐབས་རྒྱ་ནག་གི་བེ་ཅི་ཧངྐ་མཧཱ་ལ་དཔེ་ཞུས་ཏེ་ནང་པའི་པཎྜི་ཏ་ཧཱ་ཤང་མཧཱ་ཡ་ན་དང་། བོད་ཀྱི་ལོ་ཙཱ་བ་མཁས་ཅན་བཻ་རོ་ཙ་ན་གཉིས་ཀྱིས་རྒྱ་སྐད་ནས་བོད་སྐད་དུ་བསྒྱུར་བའི་སྨན་གཞུང་དེ་ཉིད་ཤིང་པར་བརྐོས་ནས་ད་ལྟའི་བར་དུའང་བརྒྱུད་འཛིན་བྱས་ཡོད་པས་སྨན་གཞུང་དེའི་ནང་སྐྱེ་དངོས་སྨན་དང་། སྲོག་ཆགས་སྨན། གཏེར་ཁའི་སྨན་རིགས་བཅས་ཡོད་ལ། ད་དུང་ནད་རིགས་སྣ་ཚོགས་ལ་ཕན་པའི་སྨན་སྦྱོར་ཁྱད་དུ་འཕགས་པ་མང་དག་ཅིག་ཀྱང་ཡོད་པས་བོད་ཀྱི་གསོ་རིག་ལོ་རྒྱུས་ཐོག་ཉར་ཚགས་བྱས་པའི་སྨན་གཞུང་སྔ་ཤོས་ཀྱི་གྲས་ཤིག་ཡིན།

ཕྱོགས་མཚུངས་རྒྱལ་པོ་ཉིད་ཀྱིས་ཁྲོམ་གྱི་ཡུལ་ནས་མཁས་པ་ཆེན་པོ་ག་ལེ་ནོས་ཀྱི་གདུང་རྒྱུད་ལས་བྱུང་བའི་བི་ཇི་ཙན་པ་ཤི་ལ་ཧ་བྱ་བ་དཔོན་སློབ་དང་བཅས་པ་བོས་ནས་ཉམས་སད་པའི་སླད་དུ་རྒྱལ་པོས་སྙུན་རྫུ་བཏབ་སྟེ་བརྟག་ཏུ་བཅུག་པས་ཇི་ལྟ་བ་བཞིན་ཐིངས་ནས་ཁ་དམར་གསལ་བས་རྒྱལ་པོ་ངོ་མཚར་ཞིང་དགྱེས་ཆེ་ནས་སྔར་ཡབ་མེས་ཀྱིས་གྲགས་པའི་ “བཀའ་གཙིགས་བཅུ་གཉིས་” སྟེང་། ང་ནི་མགོ་ནག་ཡོངས་ཀྱི་ལྷ་ཡིན་ཞིང་། །དེས་ཀྱང་རྗེ་རུ་འཁུར་བས་ལྷ་རྗེར་ཐོགས། །ཞེས་བསྣན་པའི་ “བཀའ་གཙིགས་བཅུ་གསུམ་” ཞེས་པ་བསྒྲགས་ཤིང་བཀས་བསྒོས་ནས་བླ་སྨན་དུ་དབང་བསྐུར། མཁས་དབང་དེས་<<རྒྱུད་ཤེལ་གྱི་མེ་ལོང་>>སོགས་སྨན་གཞུང་མང་པོ་བརྩམས། ད་དུང་རྒྱ་ནག་གི་དྲང་སྲོང་གིས་མཛད་པའི་<<རིན་ཆེན་དབྱིག་>>ལེའུ་བདུན་ཅུ་པ་དང་། དྲང་སྲོང་རྒྱུན་ཤེས་ཀྱིས་མཛད་པའི་<<བྱང་ཁོག་ཁྲེམས་ཀྱི་མདོ་>>སོགས་རྒྱ་དཀར་ནག་ནས་དར་བའི་གསོ་རིག་སྐོར་གྱི་སྨན་གཞུང་མང་པོ་བོད་སྐད་དུ་བསྒྱུར་ཐོག་རྒྱལ་པོ་ལ་ཕུལ་ནས་དེ་རྣམས་གཅིག་ཏུ་བསྡུས་ཏེ་ཟ་འོག་གི་སྒྲོམ་བུར་བཞུགས་པ་ལས་ <<བླ་དཔྱད་ཀྱི་གཞུང་འཚོ་བའི་མདོ་>> ཞེས་གྲགས། དེ་རྗེས་ཙན་པ་ཤི་ལ་ཧས་སྲིད་བསྐྱངས་ནས་བི་ཇིའི་གདུང་རྒྱུད་མུ་མཐུད་སྤེལ་བར་མཛད་ཅིང་། སློབ་བརྒྱུད་ལ་ཡང་སྟོང་གཞེར་མེས་པོ་དང་། བྲང་ཏི་རྒྱལ་མཉེས་མཁར་ཕུག  ཞང་ལྷ་མོ་གཟི་གསུམ་གྱི་གཙོས་མང་དུ་བྱུང་ཞིང་། དེ་རྣམས་བླ་སྨན་དུའང་དབང་བསྐུར་བར་གྲགས་སོ། །དེ་ནས་ཙན་པ་ཤི་ལ་ཧ་རང་ཡུལ་དུ་བྱོན་ཁར་སྲས་ལ་གདམས་པ་བེ་བུམ་ནག་པོའི་སྐོར་སོགས་དང་། མགོ་བྱང་ཁོག་ཡན་ལག་འདུ་བ་ཐོར་བུ་དང་བཅས་པའི་བཅོས་ཐབས་རྩ་བའི་མན་ངག་དོན་བརྒྱད་པ་རྣམས་ལ་བི་ཇིའི་པོ་ཏི་ཁ་སེར་དུ་གྲགས་པ་རྣམས་ཕུལ་བ་ལས་<<རྒྱལ་པོའི་བླ་ཡིག་འོད་འབར་>>དུ་གྲགས་སོ།།

དེ་ནས་སྟོད་ལུང་སྐྱིད་སྣར་རྒྱལ་པོ་འདུས་སྲོང་མང་པོ་རྗེའི་བླ་སྨན་པ་གཡུ་ཐོག་ཁྱུང་པོ་རྡོ་རྗེའི་སྲས་སུ་བོད་ས་སྤྲེལ་ (སྤྱི་ལོ་༧༠༨) ལོར་འཁྲུངས་པའི་གཡུ་ཐོག་རྙིང་མ་ཡོན་ཏན་མགོན་པོ་ཞུ་བ་དེ་རིག་པའི་གནས་སྤྱི་དང་། ལྷག་པར་གསོ་རིག་རྒྱ་མཚོའི་ཕ་མཐར་སོན་པས་གྲགས་པ་རྒྱལ་པོ་ཁྲི་ལྡེ་གཙུག་བརྟན་གྱིས་གསན་ཏེ་ཆོས་བློན་ཏ་རག་ཅན་གདན་ཞུ་མཛད་པར་མངགས་སོ། །དེ་ནས་གཡུ་ཐོག་ཆེན་པོས་ཆོས་བློན་དང་འགྲོགས་ནས་བསམ་ཡས་དབུ་རྩེ་རིགས་གསུམ་དུ་ཕེབས་པ་དང་། རྒྱལ་པོ་ཡབ་སྲས་ཀྱིས་ཉམས་སད་པའི་ཕྱིར་དེ་ཡོད་བྲང་ཏི་རྒྱལ་མཉེས་མཁར་ཕུག་ལ་སོགས་པ་བོད་ཀྱི་སྨན་པ་མཁས་པ་རྣམས་དང་རྩོད་དུ་བཅུག་པ་དང་། གཡུ་ཐོག་ཆེན་པོས། བདག་དང་གཞན་གཉིས་རྩོད་པ་བྱེད་པ་ལ། །དཔང་པོ་ཐུབ་པའི་སྨན་པ་བོད་ན་མེད། །བདག་ནི་གསོ་དཔྱད་རྒྱ་མཚོའི་ཕ་རོལ་སོན། །དྲིས་པའི་ལན་ལ་ཐོགས་མེད་ལན་ཡང་འདེབས། །ཞེས་སོགས་གསུངས་པ་དང་། སྨན་པ་ཀུན་གྱིས་བཅོས་མི་ཐུབ་པའི་ནད་པ་ཁག་གཅིག་བཅོས་སུ་བཅུག་པའི་ཚེ་གཡུ་ཐོག་ཆེན་པོ་རྩོད་པ་ལས་རྒྱལ་ཞིང་ནད་པ་དེ་རྣམས་ཀྱང་གསོས་སྟབས་གཞུང་ལུགས་དང་ལག་ལེན་ཅི་ཐད་ནས་ཉམས་སད་དེ་སྙན་གྲགས་ཀྱི་བ་དན་འཕྱར་བས་ན་རྒྱལ་པོ་ཉིད་དགྱེས་ཤིང་དད་པར་གྱུར་ནས་གཡུ་ཐོག་ཆེན་པོ་རྒྱལ་པོ་ཡབ་སྲས་གཉིས་ཀའི་བླ་སྨན་དུ་དབང་བསྐུར་ཞིང་། ཆིབས་སྒ་དང་བཅས་པའི་བྱ་དགའ་སྩལ་ཐོག་ཆེད་བསྟོད་ཀྱི་ཕྱིར་ “བོད་ཡུལ་དབུས་སུ་གཡུ་ཐོག་ཡོན་ཏན་མགོན། །བོད་ཀྱི་རྗེ་འབངས་བསོད་ནམས་དཔལ་དུ་བྱུང་། །སྨན་པ་ཀུན་གྱི་རྗེ་རུ་ཁྱེད་ཁུར་ལ། ཁྱེད་ཀྱི་ཐུགས་རྗེ་ཚ་ཟེར་རྒྱས་པའི་མཐུས། །གསོ་དཔྱད་བསྟན་པ་བོད་དུ་དར་བར་མཛོད། །”ཅེས་པའི་བཀའ་ཡང་སྩལ་བར་གྲགས་སོ། །དེ་ནས་རྒྱལ་པོ་ཁྲི་སྲོང་ལྡེ་བཙན་གྱི་དགོངས་པར་ཡབ་མེས་རྣམས་ཀྱིས་གསོ་རིག་གི་བཀའ་སྲོལ་ལེགས་པར་བཏོད་དེ་དར་རྒྱས་བྱུང་མོད་ཀྱི་ངེད་ཀྱིས་ཀྱང་ཕྱོགས་ཀྱི་སྨན་པ་མང་དུ་བསགས་ནས་སྔོན་ཆད་མ་བསྒྱུར་བའི་རིགས་མཐའ་དག་དར་བར་བྱའོ་དགོངས་ཏེ་ཆོས་རྒྱལ་ཉིད་ཀྱིས་གསེར་མང་པོ་བསྐུར་ནས་ཕྱོགས་མཐའི་སྨན་པ་རྣམས་གདན་འདྲེན་པར་ཕོ་ཉ་མངགས་པ་ལས་ཕྱོགས་རིས་ཀྱི་སྨན་པ་མི་དགུ་སྤྱན་དྲངས་པའི་རྗེས་ཕོ་བྲང་དུ་སྣེ་ལེན་གྱ་ནོམ་པ་བཤམས་ཐོག  དེ་རྣམས་ཀྱིས་སོ་སོའི་སྐད་ལ་བྱང་པའི་ལོ་ཙཱ་བ་དང་བཅས་ནས་ཡུལ་ཁམས་སོ་སོའི་གསོ་དཔྱད་ཀྱི་གཞུང་རྣམས་བོད་ཡིག་ཏུ་བསྒྱུར་དགོས་པའི་འདུན་པ་མཛད་སྟབས་ཕྱོགས་མཐའི་སྨན་པ་སོ་སོས་ཕྱོགས་མཐའ་ནས་དར་བའི་གསོ་དཔྱད་ཀྱི་གཞུང་ཇི་སྙེད་ཅིག་བསྒྱུར་བ་རྣམས་རྒྱལ་པོར་ཕུལ་བས་ཐུགས་ལ་བབས་ཤིང་དགྱེས་པ་དང་འབངས་ལ་ཡང་ཤིན་ཏུ་སྨན་པར་གྱུར་པས་ན། རྒྱལ་པོས་ཆེད་བསྟོད་མཛད་དེ་ “འཚོ་མཛད་སྨན་པར་གྱུར་པ་འདི་རྣམས་ལ། །བོད་འབངས་མགོ་ནག་ཡོངས་ཀྱིས་བཀུར་བར་གྱིས། །ཅི་ཕྱིར་འདི་ནི་ཚེ་སྲོག་སྟེར་བའི་ཕྱིར། །”ཞེས་དང་། “སྨན་པ་ཕ་ཡིན་ནད་པ་སྙིང་རྗེས་སྐྱོང་། །ནད་པ་བུ་ཡིན་ངན་མཚང་ཕྱིར་མ་བརྗོད། །”་ཅེས་སོགས་བཀའ་སྩལ་ཞིང་གཙིགས་ཆེ་བར་གནང་། དེ་ལྟར་བསྒྱུར་བའི་གསོ་རིག་གི་གཞུང་ལུགས་རྣམས་ཕྱོགས་གཅིག་ཏུ་སེང་ལྡེང་གི་གླེགས་ཤིང་དུ་བཞུགས་པ་དེར་ <<རྒྱལ་པོ་བླ་དཔྱད་པོ་ཏི་སྨུག་པོ་>> ཞེས་གྲགས་སོ།།

            ལྷག་ཏུ་རང་ཅག་བོད་སྨན་ཡོངས་ཀྱི་གཙུག་རྒྱན་གཡུ་ཐོག་རྙིང་མ་ཡོན་ཏན་མགོན་པོ་དང་། བརྒྱུད་ནས་བརྒྱུད་ཀྱི་རྒྱལ་པོའི་བླ་སྨན་བྲང་ཏི་རྒྱལ་མཉེས་མཁར་ཕུག་ལ་སོགས་པས་མཐའ་བཞིའི་ཕྱོགས་རིགས་སྨན་པ་རྣམས་དང་གསོ་རིག་སྐོར་ལ་ཕན་ཚུན་ཉམས་མྱོང་མང་པོ་གསུང་རེས་གནང་བ་དང་། ཐ་ན་གནད་དོན་འགའ་ཤས་ཐད་ལ་རྩོད་ལན་གནང་རེས་མཛད་པའི་གནས་ཚུལ་ལ་གཞིགས་ན་དེའི་དུས་སུ་བོད་ཀྱི་གསོ་རིག་ཡར་རྒྱས་གོང་འཕེལ་ཡོང་ཆེད་འཆད་རྩོད་རྩོམ་གསུམ་གྱི་མཛད་འཕྲིན་སྔར་ན་མ་གྲགས་པ་ཞིག་བྱུང་བར་མངོན་ཞིང་། གཡུ་ཐོག་ཆེན་པོ་དང་ཕྱོགས་རིགས་སྨན་པ་ཕན་ཚུན་དྲི་བ་དྲིས་ལན་མཛད་པའི་ནང་གཡུ་ཐོག་ཆེན་པོས། བོད་ཡུལ་སོགས་ལ་གསོ་བ་རིག་པའི་བཀའ་བབས་ཚུལ་སྐོར་དང་། གསོ་དཔྱད་ཡན་ལག་བརྒྱད་པ་དང་། ནད་ཡན་ལག་བརྒྱད་པ། སྨན་ཡན་ལག་བརྒྱད་པ་སོགས་ཀྱི་དྲི་བར་འགྲེལ་བཤད་ཡང་དག་པར་བསྐྱོན་པས་མཐར་ཕྱོགས་རིགས་སྨན་པ་དགུ་པོ་ངོ་མཚར་སྐྱེས་ཏེ་བོད་ན་འདི་ལྟ་བུའི་སྐྱེས་མཆོག་དམ་པ་བཞུགས་པ་ཡ་མཚན་གསུངས་ནས་གཡུ་ཐོག་པ་ལ་བསྟོད་པ་འདི་ཕུལ་ལོ། སྔོན་བསགས་སྦྱངས་པའི་ཡོན་ཏན་རབ་རྒྱས་ཤིང་། །འགྲོ་བ་མགོན་མེད་རྣམས་ཀྱི་མགོན་གཅིག་པུ། །གཡུ་ཐོག་པ་ཞེས་ཟླ་མེད་མཁས་པའི་མཆོག གྲུབ་པའི་གྲགས་སྙན་འབར་བ་ཁྱོད་ཕྱག་འཚལ། །ཁྱད་པར་གསོ་རིག་གཞུང་ལུགས་བསྟན་པའི་སྲོག །ཉམ་ཐག་འགྲོ་བ་ནད་པའི་སྐྱབས་གཅིག་པུ། །བོད་ཡུལ་མུན་པ་སེལ་བའི་ཉི་མ་མཆོག །གཡུ་ཐོག་ཆེན་པོའི་ཞབས་ལ་ཕྱག་འཚལ་ལོ། །ཞེས་གསུངས་ཏེ་ཞབས་སྤྱི་བོར་བླངས་ནས་སྐྱབས་མགོན་དམ་པར་མངའ་གསོལ། ཡང་གཡུ་ཐོག་པ་ཆེན་པོས་རྗེས་སུ་བོད་དུ་ཡང་མཁས་པ་མི་དགུར་གྲགས་པ་རིམ་ཅན་དུ་འབྱུང་བ་དེ་དག་གིས་ཀྱང་རིམ་པར་སོ་སོའི་ཁྱད་ཆོས་དང་བསྟུན་ནས་གསོ་རིག་གི་གཞུང་མང་པོ་རྩོམ་གནང་མཛད་རྒྱུ་ཡིན་པ་མ་འོངས་ལུང་བསྟན་དུ་གསུངས། དམ་པ་དེས་སྔ་ཕྱིར་བལ་ཡུལ་དང་རྒྱ་གར་དུ་ལན་གསུམ་དང་། རྒྱ་ནག་ལ་ལན་གཉིས། དེ་མིན་དབུས་གཙང་དང་། དྭགས་ཀོང་། མངའ་རིས། ཀློ་ཡུལ། ཙཱ་རི་སོགས་ས་གནས་མང་པོར་ཕེབས་ཏེ་སྨན་དཔྱད་ཀྱི་གཞུང་དང་། ལག་ལེན་རྒྱ་ཆེན་པོའི་སྒོ་ནས་འགྲོ་ཕན་རྒྱ་ཆེར་མཛད་ཅིང་། བུ་སློབ་སྟོང་ཕྲག་བརྒལ་བ་གསོ་སྐྱོང་གནང་། ཕྱི་རབས་ཀྱི་དོན་དུ་ལག་ལེན་གསལ་སྒྲོན་དང་། ཉམས་ཡིག་མཐོང་བ་དོན་ལྡན་འཁྲིད་ཡིག་བརྒྱ་དང་རྩ་གཅིག རོ་བཀྲ་དང་བྱང་ཁོག་གསང་དབྱེ། ཐུར་དཔྱད། མེ་བཙའ། གཏར་ག་སོགས་ཀྱི་སྨན་གཞུང་དུ་མ་བརྩམས། ཁྱད་པར་སློབ་མ་རྣམས་ལ་གདམས་ངག་བསླབ་བྱའི་སྙིང་པོ།  ཁྱེད་རྣམས་རང་འདོད་ཁོག་འགྲས་སེར་སྣ་ངན་གཡོ་བོར་ལ་བྱང་ཆུབ་སེམས་ཀྱི་གཞི་བཟུང་། འགྲོ་བ་ནད་པའི་དོན་དུ་གཉེར། མཐོ་གྲོགས་དང་ཁེ་ཚོང་མ་བྱེད་པར་ངག་གློད་མཐའ་ནས་འཁྱོངས། མི་ངོ་ཟས་ངོ་ལ་མ་བལྟ་བར་ནད་ལ་ཕན་པའི་སྨན་དཔྱད་མཛོད། ཕྱོགས་ཆ་ཉེ་རིང་སྤོང་ལ་ཀུན་ལ་ཁྱབ་པའི་སྨན་པ་མཛོད། བདག་བཟུང་གི་གནས་མ་བསྟན་པར་རྒྱལ་ཁམས་འགྲིམ་ལ་ནད་པ་ཕྱོགས་མེད་ལྟོས། ཆེ་བཙུན་གྱི་བླ་སྨན་མ་བྱེད་པར་སྤྲང་ལོང་བརྩེ་བས་སྐྱོང་། ནག་ཆང་ཕྱོགས་སུ་མ་འདོད་པར་དཀར་གསུམ་ལྟོ་ལ་བསྟེན། རྟ་དྲེལ་གཞོན་པ་སྤོང་ལ་ནད་པའི་བྲན་དུ་རྒྱུགས། མི་ཤེས་ཤེས་པར་མ་རློམ་རྒས་ཀྱང་སློབ་གཉེར་མཛོད། མི་སྲོག་ཚོད་ལེན་མ་བྱེད་མི་ཤེས་པ་ངོས་ལོངས། ཞེས་ཀྱང་གསུངས་སོ།། །།

འདི་ནི་ཕྱི་ལོ་ ༢༠༠༠ ལོར་བོད་ལྗོངས་མི་དམངས་དཔེ་སྐྲུན་ཁང་ནས་པར་སྐྲུན་ཞུས་པ་《ཀྲུང་གོའི་གསོ་རིག་ཀུན་འདུས་ལས་བོད་ཀྱི་གསོ་བ་རིག་པ། སྟོད་ཆ།》 ཞེས་པ་ནས་ཟུར་འདོན་ཞུས།།

མཐའ་མའི་འདོན་ཐེངས་།: 20.09.2024 ཉིན། 4:29 PM