༄༅། །ཕོ་མཆིན་གྱི་ནད་ལས་ཀན་སར་དང་འབྲས་ནད་ཀྱི་ཁྱད་པར།

སྨན་པ་འབུམ་རམས་པ་དཀར་ཚང་བསྟན་འཛིན་བདེ་བྱེད།

གང་གི་ཐོས་པ་འཆང་བའི་ཡོལ་གོའི་སྦུབས།།

མཚན་སྙན་བདུད་རྩིའི་ཟེགས་མ་རེག་ཙམ་གྱིས།།

དུག་གསུམ་རྒྱུ་འབྲས་དྲུངས་ནས་འབྱིན་མཛད་པ།།

སྨན་པའི་རྒྱལ་པོར་སྒོ་གསུམ་ཕྱག་བགྱིའོ།།

འདི་ནི་དུག་གསུམ་གྱིས་བསྐྱེད་ནད་ངན་དང་། །མི་ཟད་སྙིགས་མར་བདོ་བའི་སྤྱོད་ངན་རྣམས། །སྣ་ཚོགས་སྡུག་བསྔལ་རུ་འཇིངས་དུས་ངན་འདིར། །ཐུགས་རེའི་དཔྱང་ཐག་ད་དུང་དཔྱོངས་བར་མཛོད། །ནད་ཀྱི་མིང་ཙམ་ཐོས་ཀྱང་སྐྱི་གཡའ་ཞིང་། །འཚོ་བྱེད་རྣམས་ཀྱིས་འཚོ་བའི་ཞགས་པ་ལ། །དམ་དུ་འཆང་ཡང་འཛིན་པའི་གདེང་མེད་པ། །ཀྱེ་མ་གཤིན་རྗེའི་ལས་མཁན་ཀན་སར་ནད། །གཅིག་ཏུ་འགྲོ་བའི་བདེ་ལ་དམིགས་པ་ཡིན། །འཚོ་བྱེད་རྣམས་ཀྱིས་འདི་ལ་དཔྱད་པ་དང་། །བརྟག་ཅིང་གསོ་བར་བྱ་བའི་འཁོར་ལོ། །གཞོལ་འདི་ལས་སུ་བབ་བའི་དོན་པོར་སེམས། །དེ་ཡང་བདུད་རྩི་བུམ་པ་ལས། །བསོད་ནམས་མཐུ་ཞན་སྙིགས་དུས་སེམས་ཅན་ལ། །གཞུང་ཆེན་རྣམས་སུ་མ་གྲགས་ནད་སྣ་དང་། །ཕྱོགས་ཙམ་མ་གཏོགས་མ་གསུངས་དུ་མ་འབྱུང། །ཞེས་གསུངས་པ་ལྟར། །དུས་སྙིགས་མར་ཕྱོགས་ཤིང་། མི་རྣམས་སྒོ་གསུམ་གྱི་སྤྱོད་པ་རྣམ་པར་མི་དག་པའི་ཆུ་ཐུར་དུ་བབས་པ་བཞིན་ཆོས་ཉིད་ཀྱིས་གཞོལ་བའི་གནས་སྐབས་འདིར། སྔ་ན་བཅོས་ཐབས་རིམ་པ་ལྟ་ཅི་མིང་ཙམ་དུ་མ་གྲགས་པའི་ནད་ཀྱི་རྣམ་གྲངས་དུ་མ་ཞིག་གིས་འགྲོ་བ་རྣམས་ཚེ་སྲོག་དུས་མིན་དུ་ཕྱག་མས་འདེད་པའི་ཁྲོད་དབྱིན་སྐད་དུ་ཀན་སར་ཞེས་པའི་ནད་ངན་འདི་ལ་རང་རེའི་བོད་ཀྱི་འཚོ་བྱེད་པས་ནད་འདིར་འབྲས་ནད་དུ་འདོད་ཅིང་དེ་འདྲ་གཞུང་ཆེན་རྣམས་སུ་ལུང་དུ་བསྟན་པ་ཡང་ཡོད། ཕྲན་ནས་དེའི་ཐད་ལ་ད་དུང་བསམ་གཞིགས་དང་དཔྱད་པ་དགོས་པའི་གནད་དོན་དུ་མ་གཞིགས་མེད་དམ་སྙམ། དེང་སྐབས་ང་ཚོའི་སྨན་གྱིས་ཀན་སར་ཕལ་ཆེར་གསོ་ཐུབ་པའི་གནས་ཚུལ་ནི་ཡོངས་གྲགས་སུ་གྱུར་ཙང་། ང་ཚོས་མགོ་བཏེགས་ནས་ནད་ངན་དེར་བཅོས་ཐབས་ཡོད་པར་སྨྲ་བ་འདི་ནི་རིས་མེད་ཀྱི་འགྲོ་བ་གྲངས་ལས་འདས་པ་ཞིག་ལ་གཏན་འཁེལ་བྱུང་བ་མང་པོ་ཞིག་ནི་དེང་སྐབས་རིག་གསར་གྱི་བརྟག་ཐབས་བརྒྱུད་དེ་ནད་ངན་དེ་ཉིད་ཡིན་པར་གཏན་འཁེལ་བཞིན་པས། རང་རེའི་འཚོ་བྱེད་རྣམས་ནས་བརྟག་སྟེ་གཞན་ལ་རག་མ་ལུས་པར་ནད་གཞི་དེར་ངོས་བཟུང་ཞིང་ལུང་དུ་བསྟན་པ་ནི་ཉུང་ཉུང་ཡིན། སླད་ནས་གཞན་ལ་རག་མ་ལུས་པར་རང་དབང་དུ་བརྟག་ཐུབ་པར་བརྩོན་པར་འོས་པ་ཞིག་སྟེ། འགྲོ་བའི་ལུས་འདི་འབྱུང་བ་བཞི་ལས་གྲུབ། །གསོ་བྱའི་ནད་ཀྱང་འབྱུང་བ་བཞི་ཡིས་བསྐྱེད། །གཉེན་པོའི་སྨན་ཡང་འབྱུང་བཞིའི་ངོ་བོ་ཉིད། །ལུས་ནད་གཉེན་པོ་བདག་ཉིད་གཅིག་ཏུ་འབྲེལ། །གནོད་བྱ་གནོད་བྱེད་རྟེན་དང་བརྟེན་པར་འབྲེལ། ཞེས་པ་འདི་ཉིད་ལུང་ཙམ་དཔེ་རུ་མ་ལུས་པར་གནོད་བྱ་གནོད་བྱེད་ཀྱི་འབྲེལ་ཚུལ་བོད་ཀྱི་གསོ་བ་རིག་པའི་བལྟ་བ་འདིས་གཞི་བཟུང་ཞིང་། བརྟག་ན་གྲུབ་དོན་ཡོད་པ་ཡིན་པར་ཐེ་ཚོམ་ཅི་ཡོད། 

            རྒྱུ་རྐྱེན་ལ་དཔྱད་པ། དེང་སང་ཀན་སར་དུ་གྲགས་པའི་ནད་འདིའི་རྒྱུ་རྐྱེན་ནི་གོང་དུ་བཤད་པའི་མི་རུང་བའི་སྤྱོད་ངན་རྣམས་ཀྱིས་རྐྱེན་བྱས་ཤིང་། དེས་གནོད་བྱ་ཁམས་རྣམས་ཀྱི་མེ་དྲོད་ཀྱི་མཐུ་ཉམས་པ་ལས་མ་ཞུ་བ་བྱུང་སྟེ་རིམ་པས་བསྐྱེད་པ་ཞིག་ཡིན། དེ་ཡང་མན་རྒྱུད་ལས། སྡེ་བཞི་གཅོང་གི་རྩ་བ་མ་ཞུ་བ།། ཞེས་གསུངས་པ་ལྟར་ཡིན། དེ་ལྟ་བུའི་མ་ཞུ་བ་དེ་ལ་སྙིགས་མ་མ་ཞུ་བ་དང་དྭངས་མ་མ་ཞུ་བ་གཉིས་སུ་ཕྱེ་དགོས་པ་ལས་ཁ་ཟས་ཟོས་པ་རྣམས་ཕོ་བར་འཚངས་ནས་སྒྲེག་པ་ཡང་ཡང་འབྱུང་བ་ཁོ་ནའི་དོན་མ་ཡིན་ཞིང་། ཡང་རྒྱུད་ལས། ངོ་བོས་དབྱེ་ན་སྙིགས་མ་དྭངས་མ་གཉིས།།  ཞེས་གསུངས་པའི་ཕྱིར་ཏེ། དེ་ལྟ་བུ་རྣམ་པ་གཉིས་ལས་འདི་ཉིད་ནི། དྭངས་མ་མ་ཞུ་བ་ཞེས་པ་ཐོག་མར་ཕོ་བར་གནས་པའི་མེ་དྲོད་གསུམ་གྱིས་ལེགས་པར་མ་ཞུ་བ་ལས་དྭངས་མའི་རྩ་མིག་རྣམས་སུ་སྙིགས་མ་འདྲེས་ནས་དེ་ཉིད་མཁྲིས་པ་མདངས་སྒྱུར་སོགས་མཆིན་པའི་མེ་དྲོད་གསུམ་གྱིས་ཟུངས་ཁྲག་ཏུ་སྨིན་པར་མ་ནུས་པའི་དངོས་པོ་དེ་ལ་བྱ་ཞིང་། སྙིགས་མ་དྭངས་མའི་རྩ་མིག་ཤོར་བ་ཡིས། །མདངས་སྒྱུར་མཁྲིས་པས་ཟུངས་ཁྲག་མ་སྨིན་ཏེ། །ཡུན་རིང་མཆིན་གནས་དྭངས་མ་མ་ཞུ་ཡིས། །ཞེས་གསུངས་པས་སོ།། དེ་ལྟ་བུའི་དྭངས་མ་མ་ཞུ་བ་དེ་ལ་རང་གནས་མཆིན་པར་གནས་ཚེ་དྭངས་མ་མ་ཞུ་བ་གསར་པ་དང་། ཡུན་རིང་ན་དྭངས་མ་མ་ཞུ་བ་རྙིང་པར་འགྱུར་ཞིང་། དེ་ལས་གཅོང་ཆེན་སྡེ་བཞི་པོ་བསྐྱེད་པ་ཡིན་ཏེ། རྒྱུད་ལས། ཡུན་རིང་མཆིན་གནས་དྭངས་མ་མ་ཞུ་ཡིན།། རྙིངས་ནས་དྭངས་མ་འདྲིལ་ཟགས་བྱེར་འགྱིངས་བཞི།། ཞེས་གཅོང་ཆེན་སྡེ་བཞི་དང་། ཡང་གཅོང་གི་སྐོར་ལ་གསལ་བྱེད་སྒྲོན་མེའི་རྒྱུད་ལས། བད་མཁྲིས་ལྷེན་དང་ལྕགས་དྲེག་གཅོང་གི་སྡེ། འཁྲུ་སྐྱུག་འབྲས་དང་སུར་ཡ་གཅོང་གི་སྡེ། དྲེག་གྲུམ་ཆུ་སེར་ཐིག་ནག་གཅོང་གི་སྡེ། འོར་དང་སྐྱ་རྦབ་དམུ་སྐྲན་གཅོང་གི་སྡེ། སྡེ་བཞི་ཟུང་བརྒྱད་ཕྲ་མོ་བཅུ་དྲུག་གོ། ཞེས་དང་། ཟུར་མཁར་བའི་བྱེ་རིང་ལས། གོང་གི་ལུང་དྲངས་པ་གཉིས་ལ་ཚིག་དོན་གཉིས་ཀར་ཁྱད་པར་ཅུང་ཟད་ཡོད་པས་མཁས་པ་རྣམས་ཀྱིས་དཔྱད་པར་མཛད་དགོས། གསལ་བྱེད་སྒྲོན་མེའི་རྒྱུད་ཀྱི་གཅོང་སྡེ་བཞི་ནི་གོང་གསལ་ནད་རྣམས་བཞི་ཚན་རེར་སྡེ་རེར་ངོས་བཟུང་བ་དང་། གཉིས་ཚན་ལ་ཟུང་བརྒྱད་དང་། རེ་རེར་བགྲང་བའི་ཕྲ་མོ་བཅུ་དྲུག་ཏུ་ཐ་སྙད་མཛད་པར་སྣང་། རྒྱུད་ཀྱི་དགོངས་པ་གཅོང་སྡེ་བཞི་ནི་གོང་གསལ་འདྲིལ་ཟགས་བྱེར་འགྱིངས་བཞི་པོ་ཡིན་ཞིང་། དེ་དང་མཚུངས་པར་དེའུ་དམར་བས་བཞེད་དེ། འདྲིལ་དང་ཟགས་དང་བྱེར་དང་འགྱིང་། །གཅོང་སྡེ་བཞི་ཞེས་བཤད། ཅེས་གསུངས་པས་སོ།། དེ་ལས་ནང་གསེས་རྣམ་གྲངས་བཅུ་དྲུག་ཏུ་དབྱེ་བ་ཡིན་ཏེ། འདྲིལ་བས་སྐྲན་གྱི་རིགས་ཀུན་དང་། ཟགས་པས་སྐྱ་རྦབ་དང་དམུ་ཆུ། བྱེར་བས་དུག་མཛེ་མེ་དབལ། འོར་ནད། འབྲས། སུར་ཡ། དྲེག གྲུམ་བུ། མཁྲིས་པ་མིག་སེར། རྐང་འབམ། འགྱིངས་བས་བད་ཀན་སྨུག་པོ་རྒྱས་པ། གབ་པ། གཞན་ཡང་མཆེར་ནད་མཐའ་དག་བསྐྱེད་པའི་རིགས་ལ་དབྱེ་ན་བཅུ་དྲུག་ཏུ་བཞེད། མན་ངག་རྒྱུད་ལས། འདྲིལ་བས་སྐྲན་རྣམས་སྐྱེད་པ་སྟེ། །ཟགས་པས་སྐྱ་རྦབ་དམུ་ཆུ་སྐྱེད་པར་བྱེད། །བྱེར་བས་དུག་མཛེ་མེ་དབལ་འོར་དུ་ལྷུང། །འབྲས་དང་སུར་ཡ་དྲེག་དང་གྲུམ་བུ་དང་། །མིག་སེར་རྩ་སྐྲན་རྐང་འབམ་དུ་མར་འགྱུར། །འགྱིངས་པས་སྨུག་པོ་རྒྱས་གབ་མཆེར་པའི་ནད། །ནད་རྣམས་ཕལ་ཆེར་དྭངས་མ་མ་ཞུས་སྐྱེད། །ཅེས་གསུངས་པས། གོང་གི་དབྱེ་བ་འདྲེན་ཚུལ་དང་སྡེ་ཚན་དུ་བསྡུ་ཚུལ་མི་འདྲ་བ་ཤིན་ཏུ་མང་བར་སྣང་། འོན་ཀྱང་དྭངས་མ་མ་ཞུ་བས་ཀན་སར་གྱི་ནད་བསྐྱེད་པར་ཤེས་ནུས་ཤིང་། དེང་སང་ཟས་རིགས་འགའ་རེ་དང་རྫས་སྒྱུར་གྱིས་རྫས་འགའ་ཞིག་གིས་བསྐྱེད་པར་སྨྲ་བ་ནི་ཕྱོགས་རེ་ཙམ་དུ་བསམ་མོ། །གཞན་ཡང་སྐྲན་ནད་ཀྱི་རྒྱུ་ནི་མ་ཞུ་བ་དང་ཁྲག་མཁྲིས་རླུང་སོགས་ལས་འབྱུང་བར་བཤད་ལ། མན་རྒྱུད་ལས། རྒྱུ་ནི་མ་ཞུ་བད་ཀན་ཁྲག་མཁྲིས་རླུང་། །སྲིན་དང་ཆུ་སེར་སྤུ་ལས་འབྱུང་བ་ཡིན། །ཞེས་དང། དེ་བཞིན་འབྲས་སྐྱེད་བྱེད་ནི། འགྲམས་པ་དང་འཁྲུགས་པ་སོགས་ཀྱིས་ཁྲག་མ་ཞུ་བར་འགྱུར་བ་དང་། ཁ་ཟས་གང་ཟོས་པ་རྣམས་མེ་དྲོད་རྣམ་གསུམ་གྱིས་མྱག་བཞུ་དྭངས་སྙིགས་ཕྱེ་མི་ནུས་པར་རིམ་བཞིན་མ་སྨིན་པར་སྙིགས་མ་དེ་དྭངས་མའི་གནས་སུ་སོང་བས་ཁྲག་ངན་རྣམས་རླུང་གིས་བསྒྲིལ་ནས་བསྐྱེད་པ་ཡིན་ཏེ། ཡང་རྒྱུད་ལས། རྒྱུ་ནི་འགྲམས་འཁྲུགས་ཁ་ཟས་མ་སྨིན་པས།། ངན་ཁྲག་རྒྱས་ཏེ་རླུང་གིས་བསྒྲིལ་ནས་འབྱུང་།། ཞེས་སོགས་ཀྱིས་ལེགས་པར་རྟོགས་ནུས་པ་ཡིན་ནོ།། གྲུབ་པའི་འབྲས་བུ་ལ་དཔྱད་པ། དེ་ལྟར་གོང་དུ་སྙིགས་མ་མ་ཞུ་བས་རྒྱུ་བྱས་ནས་བསྐྱེད་པའི་འབྲས་བུ་གཅོང་སྡེ་བཞི་པོ་དེ་ལས་ཀན་སར་ནི་འདྲིལ་བ་དང་བྱེར་བ་གཉིས་ཀྱི་ཆར་གཏོགས་པར་སེམས་ཏེ། དང་པོ་སྐྱེད་བྱེད་ཀྱི་རྒྱུ་དེ་གཉིས་ཁྱབ་བྱེད་རླུང་གིས་གནས་གཞན་ཏུ་གཏོར་ཞིང་བྱེར་བ་ལས་གནས་བྱེ་བྲག་པ་ཞིག་ཏུ། རླུང་གིས་བསྒྲིལ་ནས་སྨིན་པ་འགྱུར་བ་ནི་དེང་སང་ཀན་སར་གྱི་ནད་རྟགས་འགའ་ཞིག་གིས་ཤེས་ནུས་ཤིང་། འདྲིལ་བ་ཐམས་ཅད་ཀན་སར་ཡིན་པ་ནི། འདྲིལ་བས་སྐྲན་རྣམས་སྐྱེད་པར་བྱེད་པ་སྟེ། ཞེས་གསུངས་པ་དེ་ཉིད་ལུང་ཙམ་མ་ཡིན་པར་གནས་ཀྱི་ཁྱད་པར་གང་དུ་སྐྲན་ཡོད་ཀྱང་སྲ་འདྲིལ་གོང་བུའི་རྣམ་པ་ཅན་རེག་མཐོང་མྱངས་པ་ལས་ཀྱང་རྟོགས་པ་ཡིན་ཏེ། དེང་སྐབས་སྨན་པ་འགས་བུད་མེད་ཀྱི་ནུ་མའི་ནང་དང་། མངལ་སོགས་ལ་སྲ་འདྲིལ་གྱི་རྣམ་པ་ཅན་མཐོང་བ་ཐམས་ཅད་ནུ་མའི་ཀན་སར་དང་། བུ་སྣོད་ཀྱི་ཀན་སར་དུ་ངོས་བཟུང་བ་ནི་འཐད་པར་མཐོང་སྟེ། གལ་ཏེ་འདྲིལ་བ་དེ་དག་དེང་སང་རིག་གསར་གྱིས་དཔྱད་པའི་ཀན་སར་ཡིན་ཀྱང་རང་ལུགས་ནས་གསུངས་པའི་འབྲས་ནད་ཀྱི་མཚན་ཉིད་མ་ཚང་བས་ཞན་ཆ་སྣང་སྟེ། འབྲས་ནད་ཡིན་ན་སོས་བཅོས་མ་བྱས་པར་ལུམས་སོགས་གཉེན་པོ་གཞན་གྱིས་ཞི་བར་མི་ནུས་པ་ཞིག་དགོས་ཏེ། མན་རྒྱུད་ལས། སྐྲངས་པོ་སྲ་བརྟན་ན་ཟུག་ཆུང་བ་ལ། །ལུམས་འདུལ་ཀུན་གྱིས་ཞི་བར་མི་འགྱུར་བའོ།། ཞེས་པ་འདི་འབྲས་ཀྱི་ངོ་བོ་གཏན་ལ་འབེབས་པའི་གཏན་ཚིག་ཡིན་པར་སེམས། གཞན་དུ་སྐྲན་དང་། སྲིན་རོ་འདྲིལ་བ། རྣག་འཐུམ་སོགས་སྲ་འདྲིལ་གི་རྣམ་པ་མཐོང་ཚད་ལ་འབྲས་ནད་དུ་སྨྲ་བར་མི་བྱའོ། །དེང་སང་རིག་གསར་གྱིས་བརྟག་སྟེ་ཀན་སར་ཞེས་པའི་ནད་རྟགས་འགའ་ཞིག་ནི་སྐྲན་གྱི་ནད་རྟགས་དང་ཤིན་ཏུ་འདྲ་བར་སྣང། སྤྱིར་སྐྲན་ལ་སྙིགས་མ་མ་ཞུ་བའི་ཟས་སྐྲན་དང་། བེ་སྣབས་འདྲིལ་བ། ལྷེན་སྐྲན། སྤུ་འདྲིལ་བ་སྤུ་སྐྲན། སྲིན་བུ་འདྲིལ་བའི་སྲིན་སྐྲན། ཆུ་སེར་འདྲིལ་བའི་ཆུ་སྐྲན། རྣག་སྐྲན་བཅས་བཅུ་གཅིག་སྟེ་འདྲིལ་བ་རྒྱུས་དབྱེ་ན་བཅུ་གཅིག དེ་དག་ཀྱང་གནས་ཀྱི་དབྱེ་ན་ཧ་ཅང་མང་བར་གྱུར་ཞིང། མན་རྒྱུད་ལས། དབྱེ་བ་བད་ཀན་ཟས་ལྷེན་རྡོ་ཡི་སྐྲན།། རླུང་གི་ལྷིང་སྐྲན་ཁྲག་མཁྲིས་རྩ་སྐྲན་དང་།། སྤུ་སྲིན་ཆུ་སྐྲན་རྣག་སྐྲན་བཅུ་གཅིག་གོ། ཞེས་རིགས་ཀྱི་དབྱེབ་དང་། གནས་ནི་གློ་སྙིང་མཆིན་དྲི་མཆིན་མཆེར་མཁལ།། མཁྲིས་པ་ཕོ་ལོང་རྒྱུ་མ་ལྒང་པ་མངལ།། ཞེས་གནས་ཀྱི་དབྱེ་བ་གསུངས་ཤིང་། གང་ཡང་སྲ་འདྲིལ་གྱི་རྣམ་པ་ཅན་ཡིན་ན་དེ་དག་འབྲས་ནད་མ་ཡིན་ཏེ་སྐྲན་ཙམ་ཡིན་པས་སོ།། དེ་དག་ལས་མངལ་སྐྲན་ཁོ་ན་ལའང་། ཚབས་སྐྲན་ཆུ་བུར་ཅན་སོགས་དབྱེ་བ་དགུ་རུ་འགྱུར་བ་ཡིན་ཏེ། མན་རྒྱུད་ལས། རྩ་སྐྲན་ས་བོན་སྐྲན་དང་ཟ་ཁུ་དགུ།། ཞེས་དང་། དེ་དག་ནི་ཟླ་མཚན་དང་ཟ་ཁུ་བུ་བཙས་རྗེས་ཀྱི་ཁྲག་དང་ཆུ་སེར། གཞན་ཡང་སྐྱེས་པའི་ས་བོན་མངལ་དུ་ལུས་པ་སོགས་རླུང་གིས་བསྒྲིལ་ནས་བསྐྱེད་པ་ཡིན་ཏེ། དེ་ཉིད་ལས། ཟླ་མཚན་ཆུ་སེར་རླུང་གིས་བསྒྲིལ་བ་ལས། ཚབས་སྐྲན་ཞེས་དབྱེ་བ་དགུ་རུ་འགྱུར།། ཞེས་གསུངས་ཤིང་། དེས་ན་རིག་གསར་གྱིས་གཏན་ལ་ཕབ་པའི་མངལ་གྱི་ཀན་སར་ཐམས་ཅད་མངལ་འབྲས་ཡིན་པ་མ་ཁྱབ་བསམ། རྒྱུད་ལས་གསུངས་པའི་ཆུ་བུར་ཅན་སོགས་མངལ་སྐྲན་རྣམས་ཀྱི་ནད་རྟགས་ཕལ་ཆེར་དང་། ལྷག་པར་རྩ་སྐྲན་ནད་རྟགས་ཟླ་མཚན་འབྱམས་པའམ་འཁྱིག་ཅིང་རེས་འགའ་ཟླ་མཚན་ཆུ་སེར་དུ་འབབ་པ་དང་། རྒྱུ་ཞབས་སུ་ལྷག་པར་ལྡང་དུབ་ན་བ། ཁ་ཟས་འཇུ་དཀའ་ཞིང་ལུས་ཤ་ཇེ་སྐེམ་དུ་འགྲོ་བ་དང་། ལུས་ཀྱི་མདོག་ནག་ཏུ་འགྲོ་ཞིང་སྨད་བཤལ་ཞིང་ཚིགས་གཞི་སྐྲངས་པ་དང་། ལུས་ཀྱི་ཤ་རུས་ཀུན་འཁོལ་བ་ལྟར་ན་ཟུག་གཏོང་ཞིང་མངལ་དུ་བྱིས་པ་ཆགས་པ་ལྟར་སྲ་འདྲིལ་གྱི་རྣམ་པ་ཡོད་པ་ཡིན། དེ་ཉིད་ཚ་གྲང་གི་བསྡོངས་ཟླའི་ཁྱད་པར་གིས་རྩ་ཆུར་རྟགས་ངེས་མེད་བསྟན་ཡང་། སྤྱིར་ཆག་རྩ་ཞན་ཞིང་ཞར་བ་དང་། རེས་འགའ་ངེས་མེད་དུ་སྡོད་ཅིང་འཕར་འཕྲོར་འདར་བ་སོགས་འབྱུང་བ་དང་། ཆུ་མདོག་མ་ངེས་ཀྱང་རེས་ངན་ཞིང་རེས་མི་བྲོ་བ་དང་། ཆུ་ལ་སྐྲན་ཐིག་འབྱུང་ཞིང་སྤྲིས་མ་དུམ་བུར་ཆད་པ་སོགས་ཀྱི་རྟགས་ཡོད་པ་ནི་མན་རྒྱུད་ལས། རྩ་སྐྲན་ལིང་པོ་ཤ་རུས་འཁོལ་ཞིང་ན།། ཞེས་དང་། ཀུན་ཀྱང་བྱིས་པ་ཆགས་ལྟར་སྲ་ཞིང་འདྲིལ། །སྐབས་སུ་སོས་ཞིང་ན་གཟེར་ཆུ་སེར་འཛག། ཅེས་སོགས་གསུངས་པས། དེ་དག་དང་དེང་དུས་ཀན་སར་དུ་གཏན་འབེབས་བྱས་ན་ནད་རྟགས་ཕལ་ཆེར་གཅིག་མཚུངས་ཡོད། དེར་མ་ཟད་གཉེན་པོའི་སྨན་ཡང་ཚ་གྲང་དང་གཉན་ཡོད་མེད་ཀྱིས་བསྒྱུར་བས་ཞི་བར་མི་འགྱུར་བར་གསུངས་དོན་མེད་དུ་འགྱུར་རོ།། དེས་ན་དེ་འདྲའི་སྐྲན་དེ་དག་དེའི་སྐབས་སུ་གཉེན་པོ་མ་སླེབས་པའམ། གཉེན་པོས་བཅོམ་མ་ཐུབ་ན་རིམ་བཞིན་སྨིན་ནས་འབྲས་ནད་དུ་འགྱུར་བ་བདེན་ཡང་། གོང་གསལ་གྱི་ནད་རྟགས་མངོན་པ་ཙམ་གྱིས་འབྲས་ནད་དུ་སྨྲ་བར་ཨེ་རུང་སྙམ། སྤྱིར་དེང་སྐབས་ཀྱི་ནད་གསར་ཐམས་ཅད་ཞྭ་དཔེ་ལམ་ལ་བཀབ་པ་ལྟ་བུ་སྔར་གྱི་གསོ་བ་རིག་པའི་གཞུང་ལུགས་སུ་བསྟན་པ་ཡོད་དགོས་པར་མེད་ཅིང་རྡོ་ཆག་བཙན་སྦྱོར་ལྟ་བུ་ཨུ་ཚུགས་བྱེད་པ་འདི་ལའང་བསམ་བློ་ནང་དུ་བསྐོར་དགོས་པ་ཞིག་ཡིན་པ་ནི་བདུད་རྩི་བུམ་པའི་ལུང་དང་། དེང་སྐབས་དངོས་ཡོད་ཀྱི་གནས་ཚུལ་དུ་མ་ཞིག་གི་ལམ་ནས་ར་འཕྲོད་པར་འགྱུར་ནས་རྣམ་དཔྱོད་ཅན་གི་མཁས་དབང་རྣམས་ཀྱིས་བློ་གྲོས་ཀྱི་རྟ་ཕོ་སྒྲོག་གིས་མ་བཅིང་བར་དོན་དང་མཐུན་པའི་གསོ་བ་རིག་པའི་གནས་ཀྱི་ཐང་ཡངས་པོར་སྐྱོད་ཅིག འདི་ན་རྒྱུད་དང་མན་ངག་རྒྱ་མཚོ་ལས། བདག་བློ་ཀུ་ཤའི་རྩེ་མོའི་བསང་གཏོར་བཞིན། །མྱངས་པས་སླངས་ཤིང་ཅུང་ཟད་དཔྱད་པ་ལས། །བརྒྱ་ཁ་ཆོད་པའི་རྨོངས་སྤོབས་ག་ལ་ཞིག །དགོད་འདི་ལྷག་བསམ་མཐོ་བའི་བ་དན་ཅན། །ལྷོད་མེད་བརྩོན་པའི་དྲི་གཞོན་དང་འགོག་པའི། །འཚོ་བྱེད་སྒྲོལ་བའི་གཟིགས་ཆེན་ཡངས་པོ་ཡིན། །འགྲོ་རྣམས་སྡུག་བསྔལ་མཚོ་ལས་སྒྲོལ་བར་སྨོན།།

བོད་རྒྱལ་ལོ་ ༢༡༥༡ རབ་གནས་ཤིང་འབྲུག་དབོ་ཟླ་བའི་རེས་གཟའ་ཕུར་བུའི་ཉིན་རྒྱལ་ས་ལྡི་ལི་ནི་ཛྭ་མུ་དི་ཡན་ལག་སྨན་ཁང་གི་འགན་འཛིན་སྨན་པ་དཀར་འཚང་བསྟན་འཛིན་བདེ་བྱེད་ནས་ལས་ཞོར་དུ་མཐོང་ཐོས་དྲན་རིག་གི་སྒོ་ནས་དབྱིན་སྐད་དུ་ཀན་སར་དང་མཁས་དབང་གོང་མ་རྣམས་ཀྱི་གསོ་རིག་རྒྱུད་གཞུང་ནས་གསུངས་པའི་འབྲས་ནད་དབར་གི་ཁྱད་པར་དཔྱད་པ། ཕྱི་ལོ་ ༢༠༢༤ ཕྱི་ཟླ་ ༣ པའི་ཚེས་ ༢༡ རེས་གཟའ་ཕུར་བུའི་ཉིན་སྦྱར་བའོ།། །།

དཔྱད་གཞིའི་ཡིག་ཆ།

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད། 

སྨན་དཔྱད་ཟླ་བའི་རྒྱལ་པོ།

མན་ངག་ཡོན་ཏན་རྒྱུད་ཀྱི་ལྷན་ཐབས་ཟུག་རྔུའི་ཚ་གདུང་སེལ་བའི་ཀཏྤཱུ་ར་དུས་མིན་འཆི་ཞགས་གཅོད་པའི་རལ་གྲི།

ཟུར་མཁར་བའི་མན་ངག་བྱེ་བ་རིང་བསྲེལ། 

གསོ་རིག་མན་ངག་མྱོང་བྱང་ཕྱོགས་བསྒྲིགས་མན་ངག་ནོར་བུའི་དོ་ཤལ། 

གསོ་རིག་སྙིང་བསྡུས་སྐྱ་རེངས་གསར་པ། 

བདུད་རྩི་བུམ་པ།

མཐའ་མའི་འདོན་ཐེངས་།: 06.12.2024 ཉིན། 10:15 AM