༄༅། །སེམས་ཅན་གྱི་འཇིག་རྟེན་བཤད་པ།

༈ གཉིས་པ་ནང་སེམས་ཅན་གྱི་འཇིག་རྟེན་བཤད་པ་ལ་གཉིས། སྐབས་འདིར་བཤད་པའི་སེམས་ཅན་གྱི་ལུས་འགྲུབ་པའི་རིམ་པ་བསྟན་པ་དང་། དེ་ལྟར་གྲུབ་པའི་ལུས་ལ་བརྟེན་པའི་ཆོས་བཤད་པའོ།།

སེམས་ཅན་གྱི་ལུས་གྲུབ་པའི་རིམ་པ།

དང་པོ་ལ་གསུམ། གང་གིས་སྐྱེ་བ་ལེན་པའི་ལེན་པ་པོ་བར་དོའི་རྣམ་གཞག་བཤད་པ་དང་། བར་དོ་འགགས་པའི་རྣམ་ཤེས་ཁུ་ཁྲག་གི་དབུས་སུ་འཇུག་ཚུལ་བཤད་པ་དང་། དེ་ལྟར་ཞུགས་པ་ལས་མངལ་དུ་འཕེལ་ཚུལ་སོགས་བཤད་པའོ།།

བར་དོའི་རྣམ་གཞག་བཤད་པ།

དང་པོ་ནི། མཛོད་ལས། སྔོན་དུས་སྲིད་འབྱུང་ཤ་ཚུགས་ཅན། །ཞེས་དང་། རིགས་མཐུན་ལྷ་མིག་དག་པས་མཐོང་། །ཞེས་དང་། དབང་པོ་ཀུན་ཚང་ཐོགས་མེད་ལྡན། །ཞེས་བར་དོའི་ལུས་རྡུལ་ཕྲ་རབ་ཚོགས་པའི་གཟུགས་དག་དེའི་བྱད་དབྱིབས་སོགས་གཟུགས་ཀྱི་སྐྱེ་མཆེད་དུ་བཤད་ཅིང་། མངོན་པ་ཀུན་བཏུས་ལས་ཀྱང་། གང་དུ་སྐྱེ་བར་འགྱུར་བ་དེའི་བྱད་གཟུགས་སོ་ཞེས་བར་དོའི་བྱད་གཟུགས་གཟུགས་ཀྱི་སྐྱེ་མཆེད་དུ་བཤད་ལ། འགྲེལ་ཆེན་གྱི་མཆོག་མི་འགྱུར་གྱི་མདོར་བསྡུས་ལས། འཆི་བའི་དུས་སུ་ལྔའི་བདག་ཉིད་ཀྱི་ས་བོན་དེ་ཉིད་ངེས་པར་འབྱུང་ངོ་། །སླར་ཡང་རྨི་ལམ་གྱི་ལུས་བཞིན་དུ་བག་ཆགས་ཀྱི་ལུས་སྟོང་པ་རྡུལ་ཕྲ་རབ་ཀྱི་ཚོགས་སྤངས་པ་མ་འགགས་པ་སྟེ་ལས་ཀྱི་བག་ཆགས་ལས་བྱུང་བའི་བག་ཆགས་ཀྱི་ལུས་མ་འགགས་པ་དེ་ཉིད་ཀྱིས་སླར་ཡང་རྡུལ་ཕྲ་རབ་ཚོགས་པའི་བདག་ཉིད་ཀྱི་ལུས་འཛིན་ནོ།།

ཞེས་བར་དོའི་ལུས་རྡུལ་ཕྲ་རབ་ཀྱི་ཚོགས་སྤངས་པ་ཡིན་པར་གསུངས་ཤིང་། མཁས་པ་[ཀུ་མཱར]ཆེན་པོ་དག་གིས་ཀྱང་བར་དོའི་ལུས་ཆོས་ཀྱི་སྐྱེ་མཆེད་པའི་གཟུགས་ཡིན་པར་གསུངས་སོ། །དེ་ལྟར་སྒྲས་ཟིན་ལ་མི་མཐུན་པར་གསུངས་པ་དེ་དག་ལུགས་སོ་སོ་བར་བྱེད་དམ། དུས་འཁོར་ནས་གསུངས་པ་འདི་ཉིད་སྔོན་དུས་ཀྱི་སྲིད་པའི་ལུས་ལྟ་བུའི་རྡུལ་ཕྲ་རབ་མེད་པ་ལ་དགོངས་ཞེས་འཆད་དམ་བརྟག་པར་བྱའོ།།

ཉིང་མཚམས་སྦྱར་ཚུལ་བཤད་པ།

༈ གཉིས་པ་བར་དོ་འགགས་པའི་རྣམ་ཤེས་ཁུ་ཁྲག་གི་དབུས་སུ་འཇུག་པའི་ཚུལ་བཤད་པ་ལ་གཉིས། གང་འཇུག་པའི་འཇུག་པ་པོའི་རྣམ་ཤེས་ངོས་གཟུང་བ་དང་། དེ་ཇི་ལྟར་འཇུག་པའི་ཚུལ་དངོས་སོ།།

འཇུག་པ་པོའི་རྣམ་ཤེས་ངོས་གཟུང་བ།

དང་པོ་ནི། བར་དོ་འགག་བཞིན་པའི་སེམས་ནི་ཤིན་ཏུ་ཕྲ་བའི་སེམས་འོད་གསལ་གྱི་སེམས་ཡིན་ལ། སེམས་དེ་དང་མངལ་དུ་ཉིང་མཚམས་སྦྱར་མ་ཐག་པའི་སེམས་དེ་སྐད་ཅིག་སྔ་ཕྱིར་བྱུང་བའི་སྒོ་ནས་མངལ་དུ་ཞུགས་མ་ཐག་པའི་སེམས་དེ་ཡང་ཤིན་ཏུ་ཕྲ་བའི་འོད་གསལ་གྱི་སེམས་ཉིད་ཡིན་ནོ།། དེ་ཡང་དེ་འདྲ་བའི་སེམས་དེ་ལྷན་ཅིག་སྐྱེས་པའི་བདེ་བ་དང་མཚུངས་ལྡན་དུ་གནས་ལ། སེམས་དེ་ལ་ཀུན་གཞི་རྣམ་ཤེས་ཞེས་བྱ་ཞིང་ལྷན་སྐྱེས་ཀྱི་སེམས་ཞེས་ཀྱང་བྱ་སྟེ། ནང་ལེའི་བཅོ་ལྔ་པའི་འགྲེལ་ཆེན་ལས། འདིར་རེ་ཞིག་མངལ་དུ་རྣམ་ཤེས་ནི་ཀུན་གཞི་རྣམ་པར་ཤེས་པ་སྟེ་བདེ་བ་དམ་པའི་ཡེ་ཤེས་སོ།། ཞེས་དང་། ཡང་དེ་ཉིད་ཀྱི་འཕྲོ་ལས། མ་དང་ཕ་དང་ཀུན་གཞི་རྣམ་པར་ཤེས་པ་བདེ་བའི་གནས་སྐབས་གཅིག་ཡིན་པའི་ཕྱིར་རོ།། ཞེས་གསུངས་པས་སོ།། འོ་ན་འདིར་མངལ་དུ་ཞུགས་མ་ཐག་པའི་སེམས་ལ་ཀུན་གཞི་རྣམ་ཤེས་ཞེས་བཤད་པ་འདི་དང་། རྣམ་ཤེས་ཚོགས་བརྒྱད་དུ་བཞེད་པ་རྣམས་ཀྱིས་ཀུན་གཞིར་བཤད་པའི་ཀུན་གཞི་རྣམ་ཤེས་ལ་ཁྱད་པར་ཅི་ཡོད་ཅེ་ན། དེ་ཡང་སྤྱིར་མངལ་དུ་ཞུགས་མ་ཐག་པའི་སེམས་འདི་ལ་འདོད་པ་མི་འདྲ་བ་མང་སྟེ། མངོན་པ་མཛོད་ལས། སྐྱེ་བའི་སྲིད་པ་ཉོན་མོངས་ཅན། །ཞེས་ཡིད་ཀྱི་ཤེས་པ་ཉོན་མོངས་ཅན་དུ་བཤད་ལ། མངོན་པ་ཀུན་ལས་བཏུས་ལ་སོགས་པར་རྣམ་ཤེས་ཚོགས་བརྒྱད་དུ་འདོད་པ་རྣམས་ཀྱིས་ཀུན་གཞི་རྣམ་ཤེས་སུ་བཤད་ཅིང་། དེ་མ་བསྒྲིབས་ལུང་མ་བསྟན་དུ་འདོད་པ་དང་། དེ་ཡང་ཚོར་བ་བཏང་སྙོམས་ཉིད་དང་མཚུངས་ལྡན་དུ་འདོད་དེ། དུས་ཀྱི་འཁོར་ལོ་སོགས་སྔགས་བླ་མེད་པ་རྣམས་དགོངས་པ་མཐུན་པར། སེམས་རང་བཞིན་གྱིས་འོད་གསལ་བ་འཁོར་འདས་ཐམས་ཅད་ཀྱི་གཞིར་གྱུར་བ་བར་དོ་ཤི་བའི་འོད་གསལ་དེ་ཉིད་དེ། དེ་ལ་ཀུན་གཞི་ཞེས་འགྲེལ་ཆེན་དུ་གསུངས་ཤིང་། འཆི་བའི་འོད་གསལ་ལ་ཡང་ཀུན་གཞི་ཞེས་གསུངས་ཏེ། སྒྲུབ་ལེའི་བདུན་པའི་འགྲེལ་ཆེན་ལས། དེ་ལྟར་ཁམས་ཀྱི་ཚོགས་མྱུར་དུ་རྣམ་པར་ཉམས་ཏེ་དེ་ནས་སེམས་དེ་མུན་པའི་མཐའི་མེ་སྟེ་ཞེས་པ་ནམ་མཁའི་ཁམས་རྣམ་པ་ཐམས་ཅད་པའི་གཟུགས་ཡུལ་དང་རྣམ་པར་བྲལ་བ་དབུས་ཀྱི་ས་ལ་ཀུན་གཞི་རྣམ་པར་ཤེས་པ་གཞག་པར་བྱའོ།། ཞེས་གསུངས་པས་སོ།།

དེ་ལྟར་ན་རྒྱུད་འགྲེལ་འདིར་མངལ་དུ་ཉིང་མཚམས་སྦྱར་མ་ཐག་པའི་སེམས་དང་འཆི་བའི་འོད་གསལ་གྱི་སེམས་ལ་ཀུན་གཞི་རྣམ་ཤེས་སུ་གསུངས་ཀྱང་ཡིད་ཀྱི་རྣམ་ཤེས་ལས་དོན་གཞན་པའི་རྣམ་ཤེས་ཚོགས་བརྒྱད་དུ་བཞེད་པ་རྣམས་ཀྱིས་བཤད་པ་ལྟར་གྱི་ཀུན་གཞི་རྣམ་ཤེས་ནི་མ་ཡིན་ཏེ། དེ་དག་གིས་བཤད་པ་ལྟར་གྱི་ཀུན་གཞི་རྣམ་ཤེས་ཡིན་ན། མ་བསྒྲིབས་ལུང་མ་བསྟན་དང་། ཚོར་བ་བཏང་སྙོམས་ཁོ་ན་དང་མཚུངས་ལྡན་དང་དམིགས་རྣམ་མི་གསལ་བ་ཡིན་པས་ཁྱབ་པ་སོགས་ཀྱི་ཁྱད་པར་གྱི་ཆོས་དུ་མ་དང་ལྡན་པ་ཡིན་དགོས་ཤིང་། བར་དོ་འགགས་མ་ཐག་པའི་རྣམ་ཤེས་དང་འཆི་བའི་འོད་གསལ་གྱི་སེམས་ནི་དགེ་བའི་སེམས་སུ་འགྱུར་བ་ཡོད་ཅིང་། ཚོར་བ་ནི་བདེ་བ་དང་མཚུངས་ལྡན་དུ་འབྱུང་བ་དང་། དམིགས་རྣམ་ནི་སྟོང་སང་གི་ངང་ནས་ནམ་མཁའི་ཁམས་རྣམ་པ་ཐམས་ཅད་པའི་གཟུགས་ཡུལ་དང་རྣམ་པར་བྲལ་བ་ཞེས་གསུངས་པ་ལྟར་གྱི་དམིགས་རྣམ་གསལ་བ་ཡིན་པས་སོ། །དེ་ལྟར་ན་སེམས་དེ་ཉིད་ལ་ཀུན་གཞི་ཞེས་གསུངས་པ་ནི་འཁོར་འདས་ཀུན་འབྱུང་བའི་གཞི་ཡིན་པ་ལ་དགོངས་ནས་གསུངས་པ་ཡིན་གྱི་ངོ་བོ་ནི་ཡིད་ཀྱི་རྣམ་ཤེས་ཉིད་ཡིན་ཏེ། ཡེ་ཤེས་ལེའུའི་འགྲེལ་ཆེན་ལས། འདིར་ཇེ་ལྟར་མངལ་འཛིན་པ་ནི་བྱང་ཆུབ་ཀྱི་སེམས་ཀྱི་རྟེན་དང་བཅས་པའི་ཡིད་ཀྱི་རྣམ་པར་ཤེས་པ་གཅིག་པུ་ཞེས་བྱང་སེམས་དཀར་དམར་གྱི་རྟེན་དང་བཅས་པའི་ཡིད་ཀྱི་རྣམ་པར་ཤེས་པ་ཁོ་ན་མངལ་འཛིན་པའི་རྣམ་ཤེས་སུ་གསལ་བར་གསུངས་པས་སོ།།

ཁུ་ཁྲག་གི་དབུས་སུ་འཇུག་ཚུལ་བཤད་པ།

༈ གཉིས་པ་བར་དོ་འགགས་པའི་རྣམ་ཤེས་ཁུ་ཁྲག་གི་དབུས་སུ་འཇུག་ཚུལ་བཤད་པ་ནི། སྤྱིར་སེམས་ཅན་གྱི་སྐྱེ་གནས་ལ་མངལ་སྐྱེས། དྲོད་གཤེར་སྐྱེས། སྒོང་སྐྱེས། རྫུས་སྐྱེས་དང་བཞིར་ངེས་པ་ལས་རྫུས་སྐྱེས་ནི་མཛོད་ལས། དམྱལ་བ་རྣམས་དང་ལྷ་རྣམས་དང་། །སྲིད་པ་བར་མ་རྫུས་ཏེ་སྐྱེ། །ཞེས་དམྱལ་བ་དང་ལྷ་དང་བར་དོ་ཡིན་ན་རྫུས་སྐྱེས་ཡིན་པས་ཁྱབ་པ་དང་། ཡི་དྭགས་མངལ་ནས་སྐྱེ་བའང་ཡིན། །ཞེས་ཡི་དྭགས་ལ་མངལ་སྐྱེས་དང་རྫུས་སྐྱེས་གཉིས་སུ་ཡོད་པ་དང་མི་དང་དུད་འགྲོ་རྣམ་པ་བཞི། །ཞེས་མི་དང་དུད་འགྲོ་ལ་སྐྱེ་གནས་བཞི་ག་ཡོད་པར་བཤད་ཅིང་། དུད་འགྲོ་ལ་སྐྱེ་གནས་བཞི་འཆད་པའི་ཚེ་ཁམས་ལེའི་བཞི་པའི་འགྲེལ་ཆེན་ལས། དུད་འགྲོ་སྐྱེ་གནས་རྣམ་པ་བཞི་དང་ཞེས་པ་ལ་སྒོང་ལས་སྐྱེས་པ་ནི་མཁའ་ལྡིང་ལ་སོགས་པ་སྟེ་རླུང་གི་སྐྱེ་གནས་སོ། མངལ་ནས་སྐྱེས་པ་ནི་གླང་པོའི་དབང་བོ་ལ་སོགས་པ་སྟེ་མིའི་སྐྱེ་གནས་སོ། །དྲོད་གཤེར་ལས་སྐྱེས་པ་ནི་སྲིན་བུ་དང་ཕྱེ་མ་ལེབ་དང་གྲོག་སྦུར་ལ་སོགས་པ་སྟེ་ཆུའི་སྐྱེ་གནས་སོ། །རྫུས་ཏེ་སྐྱེས་པ་ནི་ལྗོན་ཤིང་ལ་སོགས་པ་སྟེ་སའི་སྐྱེ་གནས་སོ། །དེ་བཞིན་དུ་རྫུས་ཏེ་སྐྱེས་པ་ཆེན་པོ་ནི་རོའི་སྐྱེ་གནས་སོ་ཞེས་གསུངས་སོ། དེ་ལ་ཁ་ཅིག་[རྗེ་བཙུན་ཀུ་མར་མ་ཏི།]ན་རེ། ལྗོན་ཤིང་ལ་སོགས་དུད་འགྲོའི་སྐྱེ་བར་སྡུད། །འདི་ནི་གཅེར་བུ་པ་ཡི་གཞུང་བཟང་ཡིན། །ཞེས་དགག་པ་མཛད་ནའང་། འདི་ནི་ལྗོན་ཤིང་དང་ལྷུན་པོ་སོགས་དུད་འགྲོའི་སྐྱེ་གནས་སུ་བསྡུད་པ་མིན་གྱི། འོ་ན་ཇི་ལྟར་ཡིན་སྙམ་ན། དཔལ་དུས་ཀྱི་འཁོར་ལོའི་དགོངས་པ་ནི་ཆོས་ཐམས་ཅད་ཁམས་ལྔའམ་དྲུག་ཏུ་སྦྱར་ནས་འཆད་པ་ཡིན་ལ། སྐབས་འདིར་ཡང་སྐྱེ་གནས་བཞི་ཁམས་ལྔ་དང་སྦྱོར་བའི་ཆེད་དུ་རྫུས་སྐྱེས་ལ་རྫུས་སྐྱེས་ཙམ་པོ་བ་ཅིག་དང་རྫུས་སྐྱེས་ཆེན་པོ་གཉིས་སུ་ཕྱེ་ནས། རྫུས་སྐྱེས་ཙམ་པོ་བ་དེ་སའི་ཁམས་དང་སྦྱོར་བ་དང་། ཡོངས་སུ་གྲགས་པའི་རྫུས་སྐྱེས་རྣམས་ལ་རྫུས་སྐྱེས་ཆེན་པོ་ཞེས་བྱས་ཏེ། རོ་ཞེས་པ་ནམ་མཁའི་ཁམས་དང་སྦྱར་བའི་ཕྱིར་དུ་གཙོ་བོར་ས་ལས་སྐྱེས་པའི་ལྗོན་ཤིང་ལ་སོགས་པ་ལ་རྫུས་སྐྱེས་ཞེས་བཤད་པ་ཡིན་གྱི། ལྗོན་ཤིང་སོགས་དུད་འགྲོའི་སྐྱེ་བར་སྟོན་པ་ཡིན་ནོ། །མི་ལ་སྐྱེ་གནས་བཞི་ཡོད་པའི་སྒོང་སྐྱེས་ནི་གནས་བརྟན་གྲགས་དང་ཉེ་བའི་གྲགས་ལྟ་བུའོ། །དྲོད་གཤེར་སྐྱེས་ནི་རྒྱལ་པོ་སྤྱི་བོ་སྐྱེས་ལྟ་བུའོ། རྫུས་སྐྱེས་ནི་སློབ་དཔོན་འཕགས་པ་ལྷ་ལྟ་བུ་རྣམས་ཡིན་ནོ།།

དེ་ལྟར་ན་སྐྱེ་གནས་ལ་ཡང་བཞི་དང་། ནང་སེམས་ཅན་ལ་ཡང་རིགས་དྲུག་གམ་ལྔ་ལ་སོགས་པ་ཡོད་ཀྱང་། ནང་གཏན་ལ་འབེབས་པ་ནང་གི་ལེའུ་འདིར་གཙོ་བོར་ཚེ་དེ་ཉིད་ལ་མཆོག་གི་དངོས་གྲུབ་འགྲུབ་པའི་ཕྱིར་དུ་ལམ་རིམ་པ་གཉིས་སྒོམ་པའི་རྟེན་གྱི་གང་ཟག་ཁམས་དྲུག་ལྡན་གྱི་མིའི་ལུས་མངལ་སྐྱེས་ཉིད་གཏན་ལ་འབེབས་པ་ཡིན་ལ། དེ་ཡང་དགོས་པ་གང་གི་ཕྱིར་དུ་གཏན་ལ་འབེབས་ན། བསྐྱེད་པའི་རིམ་པ་དང་རྫོགས་པའི་རིམ་པའི་ལམ་གྱི་སྦྱང་གཞི་དང་། རྫོགས་རིམ་གྱིས་གང་ལ་གནད་དུ་བསྣུན་པའི་གཞི་རྟོགས་པའི་དོན་དུ་གཏན་ལ་འབེབས་པ་ཡིན་ནོ།།

དེ་བས་ན་མངལ་སྐྱེས་ཁམས་དྲུག་ལྡན་གྱི་མིའི་ལུས་འགྲུབ་ཚུལ་སོགས་བཤད་པར་བྱ་སྟེ། དེ་ཡང་ཕ་མ་གཉིས་སྙོམས་འཇུག་བྱས་པ་ལས་བྱུང་བའི་ཁུ་ཁྲག་གི་དབུས་སུ་བར་དོ་འགགས་པའི་ཡིད་ཀྱི་རྣམ་ཤེས་ཤིན་ཏུ་ཕྲ་བའི་འོད་གསལ་གྱི་སེམས་ཀུན་གཞིའི་མིང་ཅན་དེ་ཞུགས་པའི་ཁུ་ཁྲག་རྣམ་ཤེས་གསུམ་མའི་མངལ་འདྲེས་པ་ལས་སེམས་ཅན་གྱི་ལུས་འགྲུབ་པ་ཡིན་ལ། དེ་འདྲའི་ཁུ་ཁྲག་རྣམ་ཤེས་གསུམ་འདྲེས་པའི་གོང་བུ་དེ་མའི་གསང་བའི་པདྨའི་སའི་ཁམས་ཀྱིས་འཛིན་པར་བྱེད། ཆུའི་ཁམས་ཀྱིས་སྡུད་པར་བྱེད། མེའི་ཁམས་ཀྱིས་སྨིན་པར་བྱེད། རླུང་གི་ཁམས་ཀྱིས་འཕེལ་བར་བྱེད། ནམ་མཁའི་ཁམས་མངལ་གྱི་སྟོང་པའི་ཆ་དེས་འཕེལ་བའི་གོ་སྐབས་འབྱེད་པར་བྱེད་དོ། །མངལ་གྱི་ཁུ་ཁྲག་རྣམ་ཤེས་འདྲེས་པ་དེའི་ཁམས་ལྔ་རྣམས་ཀྱི་ཡང་སའི་ཁམས་ཀྱིས་ལྕི་ཞིང་སྲ་བར་བྱེད། ཆུས་གཤེར་བ་ཉིད་བྱེད། མེས་སྨིན་པར་བྱེད། མ་འོངས་པ་ན་འབྱུང་བར་འགྱུར་བའི་རླུང་བཅུའི་ས་བོན་དུ་གྱུར་པའི་ཁུ་ཁྲག་རྣམ་ཤེས་གསུམ་འདྲེས་པའི་རླུང་གི་ཁམས་ཀྱིས་ཁུ་ཁྲག་རྣམ་ཤེས་གསུམ་འདྲེས་པའི་ལུས་དེ་འཕེལ་བར་བྱེད། དེའི་ནམ་མཁའི་ཁམས་དེས་ལུས་དེ་འཕེལ་བའི་གོ་སྐབས་འབྱེད་པར་བྱེད་དོ། །སྐབས་འདིར་འཕེལ་བར་བྱེད་པའི་རླུང་ལ་འདིའི་འགྲེལ་ཆེན་ལས། རབ་མཆོག་རྣམ་པ་བཅུའི་རླུང་སྲོག་ལ་སོགས་པ་དག་ནི་ས་བོན་འདིའི་ལུས་ལ་འཕེལ་བར་བྱེད་དོ། །ཞེས་གསུངས་པ་ནི་བཤད་མ་ཐག་པ་ལྟར་གྱི་རླུང་བཅུའི་ས་བོན་ལ་བྱེད་དགོས་ཏེ། སྐབས་འདིར་རླུང་བཅུའི་རྟེན་གྱི་རྩ་ཡང་གྲུབ་པ་མེད་ན་རླུང་བཅུ་མ་གྲུབ་པ་ལྟ་ཅི་སྨོས་པས་སོ། །ཡང་སྐབས་འདིའི་རྣམ་པ་བཅུའི་རླུང་ཞེས་པ་ནང་གི་ཕྱིའི་རླུང་མའི་ལུས་ཀྱི་རླུང་ལ་བྱེད་གསུང་པ་ནི་འགྲེལ་ཆེན་ལས། ས་བོན་རང་གི་ཁམས་ཀྱི་བྱ་བ་གསུངས་པ་ཞེས་ས་བོན་ཁུ་ཁྲག་རང་གི་རླུང་ལ་བཤད་པ་དང་འགལ་ལོ།།

མངལ་དུ་ལུས་འཕེལ་ཚུལ་བཤད་པ།

༈ གསུམ་པ་དེ་ལྟར་ཞུགས་པ་ལས་མངལ་དུ་འཕེལ་ཚུལ་སོགས་བཤད་པ་ནི། དེ་ལྟ་བུའི་མངལ་བཟུང་བ་ནས་མཐར་འཆི་བའི་བར་ནི་ཁྱབ་འཇུག་གི་འཇུག་པ་བཅུ་དང་སྦྱར་ནས་གསུངས་ཏེ། དེ་ཡང་ཁྱབ་འཇུག་གི་འཇུག་པ་བཅུ་ནི་ཉ་ལ་སོགས་པའི་ལོ་རྒྱུས་རྣམས་ཡིན་ལ་དེ་རྣམས་ནི་རིམ་པ་བཞིན་དུས་ཀྱི་དབང་གིས་སྔོན་རིག་བྱེད་བཞི་རྒྱ་མཚོའི་ནང་དུ་ནུབ་པ་ཁྱབ་འཇུག་གིས་ཉ་རུ་སྤྲུལ་ཏེ་བཏོན་པ་དང༌། དེ་བཞིན་དུ་རུས་སྤལ་གྱི་གཟུགས་ཀྱིས་འཇིག་རྟེན་བཏེག་ནས་རྒྱུན་དུ་གནས་པ་དང་། ཕག་རྒོད་ཀྱི་གཟུགས་ཀྱིས་ཚངས་པའི་འཇིག་རྟན་མན་ཆད་མནན་པ་དང་། སྨད་མི་ལ་སྟོད་སེང་གེའི་གཟུགས་ཀྱིས་ལྷ་མིན་གྱི་དབང་པོ་འགྲོ་སྐྱོབ་གསེར་ཅན་ལྟོ་དྲལ་ནས་བསད་པ་དང་། མིའུ་ཐུང་དུ་སྤྲུལ་ནས་ལྷ་མིན་སྟོབས་ལྡན་གོམ་པ་གསུམ་གྱི་ས་སླང་ཞེས་བསླུས་པ་དང༌། ཛ་མཱད་ཨགྣིའི་བུ་དགྲ་སྟ་རཱ་མར་སྤྲུལ་ཏེ་རྒྱལ་རིགས་སྲིད་སྒྲུབ་ལ་སོགས་པ་བསད་ནས་རྒྱལ་སྲིད་མེད་པར་བྱས་པ་དང་། རྒྱལ་པོ་ཤིང་རྟ་བཅུ་པའི་བུ་རཱ་མ་ཎར་སྤྲུལ་ནས་རང་གི་ཆུང་མ་སྲིན་པོ་ལང་ཀ་མགྲིན་བཅུས་ཕྲོགས་པས་སྤྲེའུ་ཧ་ལུ་མཛུཉལ་གྲོགས་བཅོལ་ཏེ་སྲིན་པོ་བཏུལ་བ་དང་། ནག་པས་རྩོད་པའི་དུས་སུ་སེམས་ཅན་གྱི་དོན་བྱས་པ་དང་། སངས་རྒྱས་ཤཱཀ་ཐུབ་ཏུ་སྤྲུལ་ནས་སྔོན་རྒྱལ་རིགས་བསད་པའི་སྡིག་པ་སྦྱངས་པ་དང་། རིགས་ལྡན་བྲམ་ཟེའི་བུ་ཀཱིརྟི་ཙེ་ཞེས་བྱ་བ་མ་འོངས་པ་ན་འབྱུང་བས་སེམས་ཅན་མང་པོ་བཏུལ་བའི་མཐར་དུས་ལོག་པ་རྟོགས་པར་འགྱུར་བའོ།།

འཇུག་པ་ཕྱི་མ་གཉིས་ལ་མཆོག་མི་འགྱུར་གྱི་མདོར་བསྡུས་ལས་འདི་ལྟར་དུ་བཤད་དེ། ཁྱབ་འཇུག་གམ་ནོར་ལྷའི་འཇུག་པ་དགུ་པ་སངས་རྒྱས་ནི་ཁྱབ་འཇུག་གིས་སངས་རྒྱས་ཤཱཀ་ཐུབ་ཏུ་སྤྲུལ་ནས་དགོས་པ་སྔོན་ལྷ་མ་ཡིན་གྱི་ཕྱོགས་སུ་གནས་པ་ནོར་ལྷས་གཡུལ་དུ་མ་བསྣུན་ཞིང་མ་བསད་པ་སངས་རྒྱས་ཀྱི་དུས་སུ་དམངས་རིགས་ལ་སོགས་པར་གྱུར་བ་རྣམས་དམྱལ་བར་འགྲོ་བའི་དོན་དུ་བྱ་བ་གཡོ་ཐབས་ཀྱིས་མཆོད་སྦྱིན་གྱི་ཆོས་སུན་འབྱིན་པར་འགྱུར་བས་ན་རྒྱས་བའི་ཚིག་བྷཱར་ཏ་དང་གླུའི་ཚིག་དང་རིག་བྱེད་ཀྱི་ཚིག་རྣམས་རྣམས་སུན་འབྱིན་པར་འགྱུར་རོ། །དེ་རྣམས་སུན་ཕྱུང་སྟེ་དེ་ནས་དམངས་རིགས་ལ་སོགས་པ་དེ་རྣམས་ལ་ཕྱིན་ཅི་ལོག་གི་ཆོས་སྟོན་པར་འགྱུར་བ་ནི་འདི་ལྟ་སྟེ་སྦྱིན་པའི་ཕ་རོལ་ཏུ་ཕྱིན་པ་དང་ཞེས་པ་ནས་མི་དགེ་བ་བཅུའི་ལས་ཀྱི་ལམ་རྣམས་མི་བྱའོ་ཞེས་པའི་བར་ཕ་རོལ་ཏུ་ཕྱིན་པ་བཅུ་དང་། ཚད་མད་བཞི་དང་། མི་དགེ་བ་བཅུ་སྤོང་བ་སོགས་ཕྱིན་ཅི་ལོག་གི་ཆོས་ཀྱི་རྣམ་གྲངས་འདི་རྣམས་བསྟན་པ་ཉིད་ཀྱིས་དམངས་རིགས་ལ་སོགས་པ་རྣམས་བག་ཆགས་སད་པར་བྱས་ནས་སྐྲ་བྲེགས་ཏེ་གོས་ངུར་སྨྲིག་འཛིན་པའི་དགེ་སློང་རྣམས་སུ་བྱེད་པར་འགྱུར་ཏེ། དེ་ལྟར་གྱུར་པའི་དམངས་རིགས་ལ་སོགས་པ་སྔོན་ལྷ་མ་ཡིན་གྱི་ཕྱོགས་སུ་གནས་པ་ནོར་ལྷ་ཁྱབ་འཇུག་གིས་གཡུལ་དུ་མ་སྨིན་ཞིང་མ་བསད་པ་དེ་རྣམས་ཀྱིས་བྲམ་ཟེ་རྣམས་སུན་འབྱིན་པ་བྱས་ནས་དམངས་རིགས་སོགས་དེ་རྣམས་དམྱལ་བར་འགྲོ་བ་ན་འགྱུར་བ་གང་ཡིན་པ་དེས་ན་ཁྱབ་འཇུག་གིས་སངས་རྒྱས་སུ་སྤྲུལ་པའི་དུས་སུ་དམངས་རིགས་ལ་སོགས་པར་གྱུར་པ་སྔོན་ལྷ་མ་ཡིན་གྱི་ཕྱོགས་ན་གནས་པ་དེ་རྣམས་དམྱལ་བར་འགྲོ་བའི་དོན་དུ་ཁྱབ་འཇུག་གིས་སངས་རྒྱས་སུ་སྤྲུལ་པའི་གཡོ་སྒྱུ་འདི་བྱས་པ་ཡིན་ནོ།།

འཇུག་པ་བཅུ་པ་རིགས་ལྡན་ནི་ཤམ་བྷལའི་ཡུལ་དུ་ནོར་ལྷ་ཁྱབ་འཇུག་བྲམ་ཟེའི་བུ་གྲགས་པར་གྱུར་ནས་རྡོའི་རྟ་ལ་ཞོན་ཏེ་ཀུ་ཤའི་རང་བཞིན་གྱི་མདུང་རྣམས་ཀྱིས་ཀླ་ཀློ་ཐམས་ཅད་བསད་ནས་གསེར་མང་པོའི་མི་རྡའི་མཆོད་སྦྱིན་བྱས་ཏེ། སླར་ཡང་ས་གཞི་བྲམ་ཟེའི་རང་བཞིན་དུ་བྱེད་པར་འགྱུར་རོ། །ཞེས་གསུངས་ཤིང་། འཇུག་པ་ཕྱི་མ་འགྲེལ་ཆེན་དུ་བཀོད་པ་འདི་གཉིས་ནི་སྔོན་གྱི་རིག་བྱེད་ཀླག་པ་ལ་མེད་པར་གསུངས་ཏེ། འགྲེལ་ཆེན་ལས། དེ་ལྟར་མི་འཐད་པའི་ཚིག་དུ་མ་རྣམས་ནི་གདུག་པའི་བྲམ་ཟེ་རྣམས་ཀྱིས་སངས་རྒྱས་བྱུང་བའི་དུས་སུ་བཀོད་པ་སྟེ་སྔོན་གྱི་རིག་བྱེད་ཀླག་པ་ལ་མེད་དོ། །ཞེས་གསུངས་པ་ལྟར་རོ། །དེ་ལྟར་ན་ཁྱབ་འཇུག་གི་འཇུག་པ་བཅུ་ནི་ཇི་སྐད་དུ། ཉ་དང་རུས་སྦལ་ཕག་པ་དང་། །མི་ཡི་སེང་གེ་མིའུ་ཐུང་དང་། །རཱ་མ་གཉིས་དང་ནག་པ་དང༌། །སངས་རྒྱས་ཀཱིརྟི་ཙེ་དང་བཅུ། །ཞེས་འབྱུང་བ་ལྟར་རོ། །དེ་ལྟ་བུའི་ཁྱབ་འཇུག་གི་འཇུག་པ་བཅུ་བཤད་པ་ནི་ནང་ལེའི་འདི་ཉིད་ཀྱི་འགྲེལ་ཆེན་ལས། འདིར་ཕྱི་རོལ་ཏུ་ཉ་ལ་སོགས་པའི་ལོ་རྒྱུས་ཚངས་པའི་དྲང་སྲོང་གདུག་པ་རྣམས་ཀྱིས་བྱིས་པ་རྣམས་བསླུ་བའི་སླད་དུ་བཀོད་པ་གང་ཡིན་པ་དེ་ནི་དམྱལ་བ་འཐོབ་པའི་རྒྱུ་སྟེ་འཆད་པར་འགྱུར་བ་མཆོག་ཏུ་མི་འགྱུར་བའི་ཡེ་ཤེས་གྲུབ་པ་ལས་རྒྱས་པར་བརྗོད་པར་བྱའོ།། ཞེས་ཁྱབ་འཇུག་གི་འཇུག་པ་བཅུའི་ལོ་རྒྱུས་བཤད་མ་ཐག་པ་རྣམས་རྫུན་ཚིག་ཏུ་གསུངས་སོ།།

དེ་ལྟར་ཕྱི་རོལ་པ་གྲགས་པའི་ཁྱབ་འཇུག་གི་འཇུག་པ་བཅུའི་ལོ་རྒྱུས་རྣམས་རྫུན་ཡིན་ནའང་། འཇུག་པ་བཅུའི་ཐ་སྙད་ཀྱིས་དེ་དང་ཆོས་མཐུན་པར་དང་པོར་མངལ་དུ་ཆགས་པ་ནས་འཆི་བ་ལ་ཐུག་པའི་བར་གསུངས་པ་ཡིན་ལ། དེ་ཡང་རིམ་པ་བཞིན་བཤད་ན་ཐུགས་རྡོ་རྗེ་འཛིན་པའམ་བྱང་ཆུབ་ཀྱི་སེམས་རྗེ་འཛིན་པ་དང་། ཁྱབ་འཇུག་གི་ཐ་སྙད་ཀྱིས་བསྙད་པ་མའི་མངལ་གྱི་པདྨའི་ནང་དུ་ཁུ་ཁྲག་རྣམ་ཤེས་ཚོགས་པ་དེ་ཉིད་ནི་ཉ་རོ་ཧི་ཏ་ལྟར་དམར་བའི་ཉའི་རྣམ་པར་འགྱུར་ཏེ་མངལ་ཆགས་པ་ནས་ཟླ་བ་གཉིས་ཀྱི་བར་ཉའི་གནས་སྐབས་དང་སྦྱར་རོ། །ཉའི་གནས་སྐབས་ཀྱི་ཟླ་བ་དང་པོ་ལ་རྩ་མེད་པའི་ཁུ་ཁྲག་གི་གོང་བུ་ཙམ་མོ།།

ཟླ་བ་གཉིས་པ་ལ་དེའི་སྙིང་ག་འོང་བའི་གནས་སུ་སྲོག་ལ་སོགས་པའི་རླུང་རྣམས་ཀྱི་རྟེན་དུ་འགྱུར་བའི་སྙིང་གའི་རྩ་བཅུ་ཤིན་ཏུ་ཕྲ་བ་དང་། ལྟེ་བ་འོང་བའི་གནས་སུ་ལྟེ་བའི་རྩ་འཁོར་གྱི་རྩ་དྲུག་ཅུ་རྩ་བཞི་ཤིན་ཏུ་ཕྲ་བ་རྣམས་ཀྱི་རྟེན་དུ་འགྱུར་བའི་རྩ་ཤིན་ཏུ་ཕྲ་བ་བཅུ་གཉིས་རྣམས་འཆགས་སོ།།

དེ་ནས་ཟླ་བ་གསུམ་པ་དང་བཞི་པའི་གནས་སྐབས་ཀྱི་མངལ་ན་གནས་པ་ནི་རུས་སྦལ་གྱི་གནས་སྐབས་དང་སྦྱར་རོ།། དེ་ཡང་རུས་སྦལ་ལ་རྐང་ལག་མགོ་དང་བཅས་པའི་ལྔ་འབུར་པོར་ཡོད་པ་བཞིན་དུ། ཟླ་བ་གསུམ་པའི་ཐོག་མ་ནས་མངལ་ན་གནས་པའི་ལུས་དེ་འཕེལ་བ་ལ་རྐང་ལག་དང་གདོང་གི་རྣམ་པ་མཚོན་པ་ཙམ་དུ་ཅུང་ཟད་འབུར་བ་ནས་ཟླ་བ་གསུམ་པ་རྫོགས་པའི་ཚེ་རྐང་པ་ལག་པ་མགྲིན་པ་རྣམས་ཀྱི་མགོ་བོ་མཉམ་པར་རགས་པར་གྱུར་པ་རུས་སྦལ་དང་ཆ་མཚུངས་པར་འགྱུར་རོ།།

དེ་ནས་ཟླ་བ་བཞི་པའི་ཐོག་མ་ནས་བརྩམས་ཏེ་རྫོགས་པའི་བར་ལ་རྐང་པ་དང་ལག་པ་དང་གདོང་དང་མགྲིན་པ་ལ་སོགས་པ་འོང་བའི་འབུར་པོ་ལྔ་རིམ་གྱིས་འཕེལ་ཏེ་རྐང་ལག་གི་ཚིགས་ཆེན་དྲུག་དང་གདོང་དང་མགྲིན་པའི་ཕྱོགས་རྣམས་སུ་ལྷན་ཅིག་སྐྱེས་པ་དང་ལོངས་སྤྱོད་རྫོགས་པའི་རྩ་ཤིན་ཏུ་ཕྲ་བ་རྣམས་འཆགས་སོ།།

དེ་ནས་ཟླ་བ་ལྔ་པ་ནས་ཇི་སྲིད་མ་བཙས་ཀྱི་བར་ཕག་གི་གནས་སྐབས་དང་སྦྱར་རོ།། དེ་ཡང་ཟླ་བ་ལྔ་པ་ལ་ཤ་ལ་བརྟེན་ནས་རུས་པ་སུམ་བརྒྱ་དྲུག་ཅུ་དང༌། ཚིགས་ཆེན་དྲུག་ལས་གཞན་པའི་ཚིགས་རྣམས་དང་། སྐྱེ་མཆེད་རྣམས་འཆགས་པའི་འགོ་རྩོམ་མོ།།

དེ་ནས་ཟླ་བ་དྲུག་པ་ལ་ཤ་དང་ཁྲག་སོ་སོར་ཕྱེད་པར་འགྱུར་ཞིང་། ཚོར་བ་བདེ་བ་དང་སྡུག་བསྔལ་ཡང་རིག་གོ།།

ཟླ་བ་བདུན་པ་ལ་མངལ་ན་གནས་པ་དེས་སྔོན་གྱི་གནས་རྗེས་སུ་དྲན་པར་ཡང་གསུངས་ཏེ། འདིའི་ཐད་ཀྱི་འགྲེལ་ཆེན་ལས། མངོན་པར་ཤེས་པའི་སྟོབས་ཀྱིས་སྔོན་གྱི་གནས་རྗེས་སུ་དྲན་པར་ཡང་འགྱུར་ཏེ་རང་གི་སེམས་ཀྱི་བག་ཆགས་དང་བྲལ་བར་བྱེད་ཅིང་སྲིད་པའི་སྡུག་བསྔལ་ལ་སྨོད་པར་བྱེད་ལ་སངས་རྒྱས་ཀྱི་ལམ་ལ་བསྔགས་པར་བྱེད་དོ།། ཞེས་གསུངས་སོ།།

འོ་ན་འདི་ལྟར་གསུངས་པའི་དགོངས་པ་ཅི། རུས་པ་སུམ་བརྒྱ་དྲུག་ཅུ་ཇི་ལྟར་ཞེ་ན། རུས་པ་སུམ་བརྒྱ་དྲུག་ཅུ་ནི། འགྲེལ་བཤད་དེ་ཁོ་ན་ཉིད་སྣང་བར་བྱེད་པར་དགའ་བོ་མངལ་གནས་ཀྱི་མདོ་དྲངས་པ་ལས། མགོ་ཐོད་རུས་པ་དགུ་འདུས་ཤིང་། །འགྲམ་པའི་རུས་པ་གཉིས་འབྲེལ་ཏེ། །སོ་ནི་སུམ་ཅུ་རྩ་གཉིས་ལྡན། །དེ་ཡི་རྩ་བའང་དེ་བཞིན་ནོ། །རྣ་རྩ་གཉའ་བའི་རུས་པ་དང་། །རྐན་དང་སྣ་ཡི་རུས་པ་དང་། །བྲང་དང་མིད་པའི་རུས་པ་ནི། །བསྡུས་ན་རུས་པ་ཉི་ཤུ་ཡོད། །མིག་ལ་རུས་པ་བཞི་ཡོད་དེ། །ཕྲག་པ་བྱིན་པ་ཟུང་གཉིས་ཡོད། །ལག་པ་གཉིས་དང་སོར་མོ་རྣམས། །བསྡུས་ན་རུས་པ་ལྔ་བཅུ་ཡོད། །ལྟག་རྒྱབ་རུས་པ་བརྒྱད་ཡོད་དེ། སྒལ་ཚིགས་ལ་ནི་སུམ་ཅུ་གཉིས། །འདི་དག་ཀུན་ལ་རྩ་ཡོད་པས། །འདི་ཡི་གྲངས་ནི་ཆ་བཞིར་འགྱུར། །རྩིབས་ལོགས་གཡས་པའི་རུས་པ་ནི། ཚུན་འབྲེལ་བ་བཅུ་གསུམ་ཡོད། །རྩིབས་ལོགས་གཡོན་འབྲེལ་སྐྱེ་བ་ཡི། །རུས་པ་དག་ནི་བཅུ་གསུམ་ཡོད། །རུས་པའི་ལུ་གུ་རྒྱུད་འདི་དག །གསུམ་གསུམ་དག་ནི་ཕན་ཚུན་འབྲེལ། །གཉིས་གཉིས་དག་ནི་ཚིགས་ལྡན་ཏེ། །ལྷག་མ་གཞན་ནི་འབྲེལ་བ་མེད། །གཡས་གཡོན་བརླ་ནི་གཉིས་པོ་ལ བསྡུས་ན་རུས་པ་ལྔ་བཅུ་ཡོད། །ལུས་ནང་འབྲེལ་བའི་རུས་པ་ནི། །བསྡོམས་ན་སུམ་བརྒྱ་དྲུག་ཅུ་ཡོད། །ཅེས་གསུངས་པ་ལྟར་རོ།

མངོན་པར་ཤེས་པའི་སྟོབས་ཀྱིས་སྔོན་གྱི་གནས་རྗེས་སུ་དྲན་པ་ཞེས་སོགས་ཀྱི་དགོངས་པ་ནི་འཆད་པ་པོ་རྣམས་ཀྱིས་འཆད་ཚུལ་ཐ་དད་པར་གྱུར་ཏེ། དེ་ཡང་མཁས་གྲུབ་[དཔའ་ལྡན་བླ་མ་དམ་པ།] ཁ་ཅིག་ནི་འདི་ལྟར་དུ་འཆད་དོ། །ནམ་མཁའི་རྒྱན་ཞེས་བྱ་བའི་མདོ་མཁན་པོ་དཔལ་བརྩེགས་ཀྱིས་མདོ་བཏུས་སུ་དྲངས་པ་ལས། ཞག་བདུན་པ་སུམ་ཅུ་པ་ལ་ཡན་ལག་ཐམས་ཅད་དང་། ཁྲག་དང་། པགས་པ་དང་། བ་སྤུའི་བུ་ག་ཀུན་རྫོགས་པར་འགྱུར་རོ། །དེ་ནས་མའི་ལྟོ་ན་ཁྲག་དང་དྲི་མི་ཞིམ་པའི་ནང་ན་གནས་སོ། །གང་མའི་ལྟོ་ན་གནས་པ་ན་ཚེ་རབས་སྔ་མ་དྲན་ནས་མཆོག་ཏུ་སྐྱོ་བར་འགྱུར་ཏེ། བདག་མའི་ལྟོ་འདི་ནས་ནམ་འབྱུང་ཞིག་གུ། ཕྱིས་མའི་མངལ་དུ་སྐྱེ་བར་མི་འགྱུར་བ་དེ་ལྟ་བུའི་དགེ་བ་དག་ལ་བརྩོན་འགྲུས་དང་ཕ་རོལ་གནོན་པ་བརྟན་པོར་བྱའོ་སྙམ་པ་ལས། བཙས་པ་དང་མའི་ལུས་ཀྱིས་གཟིར་བ་དང་། སའི་རེག་པ་དང་། ལག་པའི་རེག་པ་དང་། དྲི་མ་བཀྲུ་བའི་སྡུག་བསྔལ་ལུས་དང་སེམས་ལ་མཆོག་ཏུ་གནས་པ་དག་གིས་ཚེ་རབས་སྔ་མ་རིལ་བརྗེད་དེ། ཞེས་གསུངས་པ་དྲངས་ནས། ཆོས་ཉིད་ཀྱིས་དེ་ལྟ་བུའི་མངལ་གྱི་དུས་སུ་མངོན་ཤེས་འབྱུང་བ་ཡིན་ཞེས་གསུང་ངོ་།།
བུ་སྟོན་ཐམས་ཅད་མཁྱེན་པ་ནི་མངལ་གྱི་གནས་སྐབས་སུ་རླུང་རྩ་དབུ་མར་དབྱུག་པའི་རྣམ་པ་ལྟར་འབྱུང་འཇུག་མི་བྱེད་པར་གནས་པའི་སྟོབས་ཀྱིས་སྔོན་གྱི་གནས་དྲན་པ་སོགས་མངོན་ཤེས་ཆ་འདྲ་ཙམ་འབྱུང་བ་ལ་དགོངས་པ་ཡིན་ནོ། །ཞེས་གསུང་ངོ་། །ཡང་མཁས་པ་ཁ་ཅིག་ [ཆོས་སྡེ་ཕྱོགས་པ།] ནི་མངལ་གྱི་གནས་སྐབས་དེ་ལྟ་བུའི་ཚེ་དེ་ལྟར་འོང་ཡང་ རྨི་ལམ་དང་འདྲ་བས་ལས་སོགས་པས་མ་ཁྱབ་ཅེས་གསུང་ངོ་། །རྣམ་བཤད་དེ་ཁོ་ན་ཉིད་སྣང་བར་བྱེད་པ་ལས་སྔོན་མ་རྣམས་མངལ་དུ་སྐྱེ་བ་སྤྱི་དང་སྦྱར་ཞིང་། འདི་དག་ནི་སྔོན་གྱི་རྒྱུ་ཁྱད་པར་ཅན་སྔོན་དུ་སོང་བས་མངོན་ཤེས་སོགས་ ཡོན་ཏན་གྱི་ཆོས་དེ་དག་ཚེ་རབས་སྔ་མའི་རྒྱུའི་སྟོབས་ཀྱིས་མངོན་དུ་འགྱུར་བའི་མངལ་གྱི་ཆོས་བྱེ་བྲག་པ་ལ་སྦྱོར་དགོས་པ་འདྲའོ་ཞེས་རྗེ་ཐམས་ཅད་མཁྱེན་པའི་གསུང་ངོ་།། དེ་ཡང་གང་ཟང་ཁྱད་པར་ཅན་དེ་འདྲ་ཡིན་ཡང་ཟླ་བ་དྲུག་གི་བར་དུ་མངལ་དུ་བརྒྱལ་བ་དང་འདྲ་བར་དྲན་པ་མི་འབྱུང་ལ་འཚམས་དེ་ན་འདི་ལྟར་དྲན་པར་འགྱུར་རོ་ཞེས་ཤེས་པར་བྱ་བའི་ཕྱིར་དུ་དེ་ལྟར་སྨོས་པར་ཤེས་པར་བྱའོ་ཞེས་གསུངས་སོ།།

གཞན་ཡང་ཟླ་བ་བདུན་རྫོགས་པར་གྱུར་པ་ན་སྨིན་མ་དང་སྐྲ་དང་། མིག་ལ་སོགས་པའི་སྐྱེ་མཆེད་སྔར་ཟླ་བ་ལྔ་པ་ནས་སྐྱེ་བའི་འགོ་བརྩམས་པ་རྣམས་ཡོངས་སུ་རྫོགས་པར་འགྱུར་རོ།། དེ་ཡང་མངལ་དུ་ཞུགས་པ་ནས་བརྩམས་ཏེ་ཟླ་བ་གཅིག་གི་བར་ལ་རྩ་ཅུང་ཟད་ཀྱང་མེད་པ་ཡིན་པ་ལ་ཟླ་བ་གཉིས་པའི་ཐོག་མ་ནས་བཟུང་སྟེ་ཟླ་བ་བཅུ་གཉིས་ཀྱི་བར་ལ་ཞག་རེ་ལ་རྩ་ཉིས་བརྒྱ་ཉིས་བརྒྱ་རེ་སྐྱེ་བས་མངལ་ཆགས་པ་ནས་ཟླ་བ་བཅུ་གསུམ་དང་། རྩ་ཐོག་མར་ཆགས་པ་ནས་ཟླ་བ་བཅུ་གཉིས་ཀྱི་བར་ལ་རྩ་བདུན་ཁྲི་ཉིས་སྟོང་རྫོགས་པར་འགྱུར་ རོ།། དེ་ཡང་དངོས་བསྟན་ལ་ཞག་གསུམ་གང་ཡིན་གྱི་རྣམ་དབྱེ་མི་གསལ་བར་དེ་ཙམ་ཞིག་གསུངས་ཀྱང་འདིའི་ཞག་ཉིན་ཞག་ལ་བྱེད་ན་ཟླ་བ་ཡང་ཉིན་ཞག་སུམ་ཅུ་ལ་ཟླ་བར་བྱས་པའམ། ཟླ་བ་ཚེས་ཟླ་ལ་བྱེད་ན་ཞག་ཀྱང་ཚེས་ཞག་ལ་བྱེད་དགོས་ཏེ། བཅུ་གཉིས་སུམ་ཅུ་པ་བསྒྱུར་བ་དེ་ཉིས་བརྒྱས་བསྒྱུར་བས་བདུན་ཁྲི་ཉིས་སྟོང་འོང་བས་སོ།། སྐྱེ་མཆེད་རྣམས་གྲུབ་པ་དེ་ནས་ཟླ་བ་བརྒྱད་པ་ལ་རུས་པ་རྣམས་ཀྱི་ནང་དུ་རྐང་ཆགས་པར་འགྱུར་ཞིང་། རོ་འཛིན་ནུས་ཀྱི་རོ་འཛིན་ལྕེའི་དབང་པོ་བསྐྱེད་པའི་སླད་དུ་སྔར་ཆགས་ཟིན་པའི་མིག་ལ་སོགས་པའི་སྐྱེ་མཆེད་རྣམས་རྟས་པར་འགྱུར་རོ།། དེ་ནས་རོ་འཛིན་ལྕེའི་དབང་པོ་རོ་འཛིན་ནུས་སུ་སྐྱེས་བའི་དུས་ནས་གཅི་བ་དང་བཤང་བ་རྣམས་ཀྱང་ཟླ་བ་བརྒྱད་པ་དེ་ལ་འབྱུང་བར་འགྱུར་རོ།།

དེ་ནས་མའི་མངལ་ནས་འགྱུར་བ་ནི། འགའ་ཞིག་ཟླ་བ་དགུ་རྫོགས་མ་ཐག་འབྱུང་བ་དང་། ལ་ལ་བཅུ་པ་ལ་འབྱུང་བ་དང༌། ཁ་ཅིག་བཅུ་གཅིག་པ་ལ་འབྱུང་བ་དང་། གཞན་དག་བཅུ་གཉིས་པ་ལ་འབྱུང་བ་སོགས་ཡོད་པའི་ཟླ་བ་ལྔ་པ་ནས་མངལ་ནས་འབྱུང་བའི་བར་ཕག་གི་གནས་སྐབས་དང་སྦྱོར་བ་ནི་ཕག་མི་གཙང་བ་བཤང་བ་སོགས་ཀྱིས་འཚོ་བ་བཞིན་དུ་མངལ་ན་གནས་པ་དེ་ཡང་མའི་བཟའ་བཏུང་གི་དྭངས་མའི་མི་གཙང་བ་ཙམ་ཀྱིས་འཚོ་བའི་རྒྱུ་མཚན་གྱིས་ཡིན་ནོ།། མའི་མངལ་ནས་ཕྱིར་འབྱུང་བ་ནི་མིའི་སེང་གེའི་གནས་སྐབས་དང་སྦྱོར་བ་སྟེ། ཁྱབ་འཇུག་རོ་སྟོད་སེང་གེ་ལ་རོ་སྨད་མིའི་རྣམ་པའི་གནས་སྐབས་སུ་གྱུར་པ་དེས་འགྲོ་སྐྱོབ་གསེར་ཅན་ལྟོ་དྲལ་ནས་བསད་པ་དང་འདྲ་བར་མངལ་ན་གནས་པ་དེ་བཙའ་བའི་ཚེ་མའི་སྐྱེ་གནས་རྣམ་པར་འབྱེད་པའི་ཕྱིར་མིའི་སེང་གེ་ཞེས་བྱའོ།། མངལ་ནས་བཙས་ནས་སོ་མ་སྐྱེས་ཀྱི་བར་ནི་མིའུ་ཐུང་གི་དབྱིབས་ཅན་དུ་ཡོད་པས་མིའུ་ཐུང་གི་གནས་སྐབས་དང་སྦྱར་རོ།། དེ་ཡང་མངལ་དུ་ཆགས་པ་ནས་ཟླ་བ་བཅུ་གསུམ་རྫོགས་པ་ན་རྩ་རྣམས་ཀྱི་འཕེལ་བ་རྫོགས་ཤེང་ཟླ་བ་བཅུ་བཞི་པའི་ཐོག་མ་ནས་ཁམས་དཀར་དམར་འཕེལ་བའི་འགོ་རྩོམ་ལ་རྩ་བདུན་ཁྲི་ཉིས་སྟོང་གི་ནང་ནས་གཉིས་གཉིས་རེ་ཞག་རེ་ལ་ཆད་པའི་འགོ་ཡང་རྩོམ་མོ།།

དེ་ཡང་བུད་མེད་རྣམས་ཀྱི་རྡུལ་འབྱུང་བའི་དུས་ལོ་བཅུ་གཉིས་ཀྱི་བར་དུ་ཁམས་དམར་པོ་རྡུལ་འཕེལ་ཞིང་། ལོ་བཅུ་གཉིས་རྫོགས་པའི་འཚམས་ནས་འཕེལ་བ་གཏོང་ངོ་།། དེ་བཞིན་དུ་སྐྱེས་པ་རྣམས་ཀྱི་ཁུ་བ་འབྱུང་བའི་དུས་ལོ་བཅུ་དྲུག་གི་བར་དུ་ཁམས་དཀར་པོ་ཁུ་བ་འཕེལ་ཞིང་འཚམས་དེ་ནས་ཁུ་བ་འཕེལ་བ་གཏོང་ཞིང་འཆད་དོ། མངལ་ནས་བཙས་པའི་རྗེས་སུ་སོ་སྐྱེས་པ་ནས་ལོ་བརྒྱད་ཀྱི་མཐར་སོ་ ལྷུང་སྟེ་བརྗེ་བའི་བར་ནི་དགྲ་སྟ་ར་མའི་གནས་སྐབས་དང་སྦྱར་རོ།། དེ་ནས་སོ་ལྷུང་སྟེ་བརྗེས་ན་ལོ་བཅུ་དྲུག་ལོན་གྱི་བར་ནི་རྒྱས་པ་རཱ་མ་ཎའི་གནས་སྐབས་དང་སྦྱར་རོ།། ལོ་བཅུ་དྲུག་ལོན་པ་ནས་སྐྲ་དཀར་སྐྱེས་པའི་བར་ནི་ནག་པའི་གནས་སྐབས་དང་སྦྱར་རོ།། སྐྲ་དཀར་སྐྱེས་པ་དེ་ནས་འཆི་བའི་ཉིན་ཞག་གི་བར་ནི་སངས་རྒྱས་ཀྱི་གནས་སྐབས་དང་སྦྱོར་བ་སྟེ། སངས་རྒྱས་ནི་སེམས་ཞི་བ་དང་བརྟུལ་ཞུགས་ངེས་པ་ལ་གནས་པ་བཞིན་དུ་རྒས་པའི་གནས་སྐབས་ལ་ཡང་སེམས་ཞི་བར་གནས་པ་དང་། བུད་མེད་ལ་སྦྱོར་བ་དང་བྲལ་བས་བརྟུལ་ཞུགས་ངེས་པའོ།། འཆི་བའི་གནས་སྐབས་ནི་རིགས་ལྡན་དང་སྦྱོར་བ་སྟེ། རིགས་ལྡན་གྱི་དོན་ནི་ཐམས་ཅད་རིགས་གཅིག་ཏུ་བྱེད་པ་བཞིན་དུ་འཆི་བའི་ཚེ་ཡང་འབྱུང་བ་ཐམས་ཅད་གཅིག་ཏུ་འདྲེས་པའི་ཚུལ་གྱིས་འཆི་བ་ཡིན་པས་སོ།། དེ་ལྟར་ལུས་གྲུབ་བའི་ཚུལ་བསྟན་ཟིན་ཏོ།། །།

ལུས་ལ་བརྟེན་པའི་ཆོས་རྣམས་བཤད་པ།

༈ གཉིས་པ་དེ་ལྟར་གྲུབ་པའི་ལུས་ལ་བརྟེན་པའི་ཆོས་བཤད་པ་ལ་གཉིས། ལུས་ལ་བརྟེན་པའི་ཆོས་སྦྱིའི་རྣམ་གཞག་བཤད་པ་དང་། རྩ་རླུང་ཐིག་ལེའི་རྣམ་གཞག་ཁྱད་པར་དུ་བཤད་པའོ། །

ལུས་ལ་བརྟེན་པའི་ཆོས་སྤྱིའི་རྣམ་གཞག་བཤད་པ།

དང་པོ་ནི། ཁམས་དྲུག་ལྡན་གྱི་གང་ཟག་གི་ལུས་ལ་བརྟེན་པའི་ཆོས་མང་སྟེ། ནམ་མཁའ། རླུང་། མི། ཆུ། ས། ཡེ་ཤེས་ཀྱི་ཁམས་ཏེ་ཁམས་དྲུག་དང་། རྣམ་ཤེས། འདུ་བྱེད། ཚོར་བ། འདུ་ཤེས། གཟུགས། ཡེ་ཤེས་ཀྱི་ཕུང་པོ་སྟེ་ཕུང་པོ་དྲུག་དང་། རྣ་བ། སྣ། མིག། ལྕེ། ལུས། ཡིད་ཀྱི་དབང་པོ་སྟེ་དབང་པོ་དྲུག་དང་། སྒྲ། དྲི། གཟུགས། རོ། རེག་བྱ། ཆོས་ཀྱི་སྐྱེ་མཆེད་དེ་ཡུལ་དྲུག་དང་། གསང་གནས་ཀྱི་དབང་པོ། ངག་གི་དབང་པོ། ལག་པའི་དབང་པོ། རྐང་པའི་དབང་པོ། བཤང་ལམ་གྱི་དབང་པོ། མཆོག་གི་དབང་པོ་སྟེ་ལས་ཀྱི་དབང་པོ་དྲུག་དང་། དྲི་ཆུ་འདོར་བ། སྨྲ་བརྗོད། ལེན་པ། འགྲོ་བ། བཤང་བ་འདོར་བ། ཁུ་བ་འདོར་འཛིན་ཏེ་ལས་དབང་གི་བྱ་བ་དྲུག་དང་། སྲོག་འཛིན་གྱི་རླུང་། མཉམ་གནས། གྱེན་རྒྱུ། ཀླུ། ཐུར་སེལ་ཏེ་རླུང་དྲུག་དང་། སླར་ཡང་དགའ་བའི་རླུང་། རུས་སྦལ། རྩངས་པ། ལྷས་བྱིན། ནོར་ལས་རྒྱལ། ལྷན་ཅིག་སྐྱེས་པའི་དགའ་བའི་རླུང་སྟེ་ཡང་རླུང་དྲུག་དང༌། གཙུག་ཏོར་གྱི་རྩ་འཁོར། སྙིང་གའི་རྩ་འཁོར། མགྲིན་པའི་རྩ་འཁོར། སྨིན་མའི་དབུས་ཀྱི་རྩ་འཁོར། ལྟེ་བའི་རྩ་འཁོར། གསང་གནས་ཀྱི་རྩ་འཁོར་ཏེ་རྩ་འཁོར་དྲུག་དང་། དེ་བཞིན་དུ་རླུང་ཁྲི་ཆིག་སྟོང་དྲུག་བརྒྱ་དང་། རྩ་བདུན་ཁྲི་ཉིས་སྟོང་དང་། གོང་དུ་དགའ་མངལ་གནས་ཀྱི་མདོ་དྲངས་པ་ལྟར་རུས་པ་སུམ་བརྒྱ་དྲུག་ཅུ་དང་། ཚིགས་སུམ་བརྒྱ་དྲུག་ཅུ་ལ་སོགས་པ་རྣམས་སོ།།

དེ་ཡང་དེ་དག་ཐམས་ཅད་ཁམས་དྲུག་གི་རང་བཞིན་གྱི་ཆོས་ལས་མི་འདའ་སྟེ། རྣམ་ཤེས་ཀྱི་ཕུང་པོ་ནས་ཡེ་ཤེས་ཀྱི་ཕུང་པོའི་བར་ཕུང་པོ་དྲུག་ནི་རིམ་པ་བཞིན་ནམ་མཁའ། རླུང་། མེ། ས། ཆུ། ཡེ་ཤེས་ཀྱི་ཁམས་ཀྱི་ཆོས་སོ། །དེ་ཡང་ཕུང་པོ་དྲུག་དང་ཁམས་དྲུག་ཐབས་ཤེས་ཏེ། ཕུང་པོ་དྲུག་ཐབས་དང་། ཁམས་དྲུག་ཤེས་རབ་བོ། །དེ་ཡང་རིམ་པ་བཞིན་སྦྱར་ན་ཡེ་ཤེས་ཀྱི་ཕུང་པོ་དང་ནམ་མཁའི་ཁམས་ཐབས་ཤེས། གཟུགས་ཀྱི་ཕུང་པོ་དང་རླུང་གི་ཁམས་ཐབས་ཤེས། འདུ་ཤེས་ཀྱི་ཕུང་པོ་དང་མེའི་ཁམས་ཐབས་ཤེས། ཚོར་བའི་ཕུང་པོ་དང་ཆུའི་ཁམས་ཐབས་ཤེས། འདུ་བྱེད་ཀྱི་ཕུང་པོ་དང་སའི་ཁམས་ཐབས་ཤེས། རྣམ་ཤེས་ཀྱི་ཕུང་པོ་དང་ཡེ་ཤེས་ཀྱི་ཁམས་ཐབས་ཤེས་སོ། །དེ་བཞིན་དུ་རྣ་བ། སྣ། མིག། ལྕེ། ལུས། ཡིད་ཀྱི་དབང་པོ་རྣམས་རིམ་པ་བཞིན་ནམ་མཁའ། རླུང་། མེ། ཆུ། ས། ཡེ་ཤེས་ཀྱི་ཁམས་ཀྱི་ཆོས་སོ། །སྒྲ། དྲི། གཟུགས། རོ། རེག་བྱ། ཆོས་ཀྱི་སྐྱེ་མཆེད་རྣམས་ནི་རིམ་པ་བཞིན་ཡེ་ཤེས། ས། ཆུ། མེ། རླུང་། ནམ་མཁའི་ཁམས་ཀྱི་ཆོས་སོ། །དེ་ཡང་དབང་པོ་དྲུག་དང་ཡུལ་དྲུག་ཕན་ཚུན་ཡུལ་དང་ཡུལ་ཅན་དུ་སྦྱར་བའི་ཡུལ་དྲུག་ཤེས་རབ་དང་། ཡུལ་ཅན་དྲུག་རང་རང་གི་ཡུལ་ལ་ལྟོས་པའི་ཐབས་སོ། །དེ་བཞིན་དུ་གསང་གནས་སམ་བྷ་ག་དང་རྟགས། ངག །ལག་པ། རྐང་པ། བཤང་ལམ། མཆོག་གི་དབང་པོའི་དུང་ཅན་མ་རྣམས་རིམ་པ་བཞིན་ནམ་མཁའ། རླུང་། མེ། ཆུ། ས། ཡེ་ཤེས་ཀྱི་ཁམས་ཀྱི་ཆོས་སོ། །དྲི་ཆུ་འདོར་བ། བརྗོད་པ། ལེན་པ། འགྲོ་བ། བཤང་བ་འདོར་བ། ཁུ་བ་འདོར་འཛིན་རྣམས་རིམ་པ་བཞིན་ཡེ་ཤེས། ས། ཆུ། མེ། རླུང་། ནམ་མཁའི་ཁམས་ཀྱི་ཆོས་སོ།། དེ་ཡང་ལས་ཀྱི་དབང་པོ་རྣམས་ཐབས་དང་། ལས་དབང་གི་བྱ་བ་རྣམས་ཤེས་རབ་ཡིན་པས་ཐབས་ཤེས་རིམ་པ་བཞིན་སྦྱར་རོ།།

ཡང་སྲོག་འཛིན། མཉམ་གནས། གྱེན་རྒྱུ། ཁྱབ་བྱེད། ཀླུ། ཐུར་སེལ་གྱི་རླུང་རྣམས་ནི་རིམ་པ་བཞིན་ནམ་མཁའ། རླུང་། མེ། ཆུ། ས། ཡེ་ཤེས་ཀྱི་ཁམས་ཀྱི་ཆོས་སོ། །དེ་བཞིན་དུ་དགའ་བའི་རླུང་། རུས་སྦལ། རྩངས་པ། ལྷས་བྱིན། ནོར་ལས་རྒྱལ་བ། ལྷན་ཅིག་སྐྱེས་པའི་དགའ་བའི་རླུང་རྣམས་ཀྱང་རིམ་པ་བཞིན་ནམ་མཁའ། རླུང་། ཆུ། ས། ཡེ་ཤེས་ཀྱི་ཁམས་ ཀྱི་ཆོས་སོ། །དེ་བཞིན་དུ་གཙུག་ཏོར། སྙིང་ག །མགྲིན་པ། སྨིན་དབུས། ལྟེ་བ། གསང་གནས་ཀྱི་རྩ་འཁོར་རྣམས་རིམ་པ་བཞིན་ནམ་མཁའ་རླུང་མེ་ཆུ་ས་ཡེ་ཤེས་ཀྱི་ཁམས་ཀྱི་ཆོས་སོ། །ཡང་ལུས་ཀྱི་ཆ་ཤས་རྐང་པ་དང་ལག་པའི་སོར་མོ་ཉི་ཤུ་པོ་རྣམས་ནི་མཐེ་ཆུང་ནས་མཐེ་བོའི་བར་རིམ་པ་བཞིན་ནམ་མཁའ་རླུང་མེ་ཆུ་སའི་ཁམས་ཀྱི་ཆོས་སོ།།

རུས་པའི་ཆ་ཤས་སོ་རྣམས་ནི་དང་པོར་བྱིས་པ་ལ་སྟེང་དུ་སོ་གཉིས་སྐྱེས་པར་གྱུར་ན་དེའི་ཚེ་སོ་གཡས་པ་སའི་ཁམས་ཀྱི་ཆོས་གཡོན་པ་ཆུའི་ཁམས་ཀྱི་ཆོས་སོ། །དེ་ནས་འོག་ཏུ་སོ་གཉིས་སྐྱེས་པར་གྱུར་པ་ན་དེའི་ཚེ་གཡས་པ་མེའི་ཁམས་ཀྱི་ཆོས། གཡོན་པ་རླུང་གི་ཁམས་ཀྱི་ཆོས་སོ། །དེ་བས་ན་སྟེང་གི་ས་ཁམས་པ་དང་འོག་གི་རླུང་ཁམས་པ་ཐབས་ཤེས། སྟེང་གི་ཆུ་ཁམས་པ་དང་འོག་གི་མེ་ཁམས་པ་ཐབས་ཤེས། དེ་བཞིན་དུ་སླར་ཡང་སྟེང་དུ་སོ་གཉིས་སྐྱེས་པའི་ཚེ་གཡས་མ་མེ་ཁམས་པ་དང་གཡོན་མ་རླུང་ཁམས་པའོ། །ཡང་འོག་ཏུ་གཉིས་སྐྱེས་པའི་ཚེ་གཡས་མ་ས་ཁམས་པ་དང་གཡོན་མ་ཆུ་ཁམས་པའོ། །དེའི་ཡང་སྟེང་འོག་གི་མེ་ཆུ་གཉིས་ཐབས་ཤེས་དང་། ས་རླུང་གཉིས་ཐབས་ཤེས་སོ། །སླར་ཡང་གཡས་གཡོན་གོང་གི་རིམ་པ་བཞིན་རབ་ཏུ་མེ་དང་རླུང་། སྟེང་དུ་ཆུ་དང་སའི་ཁམས་ཀྱི་ཆོས་དེ་ལྟར་སྟེང་འོག་སྔར་བཞིན་སྤེལ་བས་སོ། །སོ་སུམ་ཅུ་རྩ་གཉིས་ཁམས་བཞིའི་ཆོས་སུ་ཤེས་པར་བྱ་ཞིང་ས་རླུང་གཉིས་ཐབས་ཤེས་དང་། མེ་ཆུ་གཉིས་ཐབས་ཤེས་དང་། ནམ་མཁའ་དང་ཡེ་ཤེས་གཉིས་ཐབས་ཤེས་ཡིན་པ་རྣམ་པ་ཐམས་ཅད་པ་ཡིན་ནོ།།

དེ་དག་ཁམས་དྲུག་གི་ཆོས་རྣམས་ཀྱི་ཁ་དོག་ནི་ནམ་མཁའི་ཁམས་པ་རྣམས་ལྗང་གུ །རླུང་གི་ཁམས་པ་རྣམས་ནག་པོ། མེའི་ཁམས་པ་རྣམས་དམར་པོ། ཆུའི་ཁམས་པ་རྣམས་དཀར་པོ། སའི་ཁམས་པ་རྣམས་སེར་པོ། ཡེ་ཤེས་ཀྱི་ཁམས་པ་རྣམས་སྔོན་པོ་སྟེ་འདི་ཡང་རྣམ་པ་ཐམས་ཅད་པ་ཡིན་ནོ། །དེ་བཞིན་དུ་རིགས་དྲུག་དང་སྦྱོར་ན་ཡང་ནམ་མཁའི་ཁམས་པའི་ཆོས་རྣམས་རྡོ་རྗེའི་རིགས་དང་། རླུང་གི་ཁམས་པའི་ཆོས་རྣམས་ལས་ཀྱི་རིགས་དང་། མེའི་ཁམས་པའི་ཆོས་རྣམས་རིན་པོ་ཆེའི་རིགས་དང་། ཆུའི་ཁམས་པའི་ཆོས་རྣམས་པདྨའི་རིགས་དང་། སའི་ཁམས་པའི་ཆོས་རྣམས་འཁོར་ལོའི་རིགས་དང་། ཡེ་ཤེས་ཀྱི་ཁམས་པའི་ཆོས་རྣམས་གྲི་གུག་གི་རིགས་ཡིན་ནོ།། །།

རྩ་རླུང་ཐིག་ལེའི་རྣམ་གཞག་བཤད་པ།

༈ གཉིས་པ་རྩ་རླུང་ཐིག་ལེའི་རྣམ་གཞག་ཁྱད་པར་དུ་བཤད་པ་ལ་གཉིས། རྒྱུད་འབྲེལ་འདིར་བཤད་པའི་རྩ་རླུང་ཐིག་ལེའི་རྣམ་གཞག་བཤད་པ་དང་། འདིར་བཤད་པའི་རྩ་རླུང་གི་རྣམ་གཞག་དང་རྒྱུད་སྡེ་གཞན་ནས་བཤད་པའི་རྩ་རླུང་གི་རྣམ་གཞག་མི་མཐུན་པར་གྱུར་པའི་དོགས་པ་དཔྱད་པའོ།།

རྩ་རླུང་ཐིག་ལེའི་གནས་ཚུལ་བཤད་པ།

དང་པོ་ལ་རྩ་རླུང་ཐིག་ལེ་གསུམ་གྱི་གནས་ཚུལ་བཤད་པ་དང་། རྩ་རྣམས་ཀྱི་ནང་ནས་རླུང་རྣམས་ཀྱི་རྒྱུ་ཚུལ་བཤད་པའོ། །དང་པོ་ལ་རྩའི་གནས་ཚུལ་བཤད་པ་དང་། རླུང་གི་གནས་ཚུལ་བཤད་པ་དང་། ཐིག་ལེའི་གནས་ཚུལ་བཤད་པའོ།།

རྩའི་གནས་ཚུལ་བཤད་པ།

དང་པོ་ནི། རྩ་རྣམས་ཀྱི་གཙོ་བོ་རོ་མ་རྐྱང་མ་དབུ་མ་གསུམ་ནི་ལུས་ཀྱི་གཡས་གཡོན་གྱི་དབུས་དྲང་པོ་ན་གནས་ཤིང་། རྒྱབ་མདུན་གྱི་རྒྱབ་ངོས་སྒལ་ཚིགས་པ་ཕྱོགས་ལ་ཅུང་ཟད་ཉེ་བ་ན་གནས་སོ།། དེ་ཡང་རོ་མ་གཡས་དང་རྐྱང་མ་གཡོན་དང་དབུ་མ་དེ་གཉིས་ཀྱི་དབུས་དྲང་པོ་ན་གནས་ཏེ། གསུམ་གའང་སྟེང་གི་རྩེ་མོ་སྨིན་མའི་མཚམས་དང་། འོག་གི་སྣེ་མོ་རྟགས་སམ་བྷ་གའི་རྩེ་མོ་དང་བཤང་ལམ་གྱི་མཐར་སླེབ་ནས་གནས་སོ།། རྩ་འཁོར་རྣམས་གནས་པའི་ཐད་སོར་རོ་རྐྱང་གཉིས་ཀྱིས་དབུ་མ་ལ་ལུ་གུ་རྒྱུད་དུ་འཁྱུད་པའི་རྩ་མདུད་རེ་ཡོད་ཅིང་། རྩ་གསུམ་གྱི་ལྟེ་བ་ཡན་ཆད་ཀྱི་མིང་གི་རྣམ་གྲངས་ནི་ཉི་མའི་རྩ། དམར་སེར། རས་ནཱ། ཉི་མའི་ལམ་ཞེས་སོགས་ནི་གཡས་ཀྱི་རྩ་རོ་མའི་མིང་གི་རྣམ་གྲངས་སོ།། ཟླ་བའི་རྩ། ཨི་ག་ས། ལ་ལ་ནཱ། ཟླ་བའི་ལམ་ཞེས་སོགས་ནི་གཡོན་གྱི་རྩ་རྐྱང་མའི་མིང་གི་རྣམ་གྲངས་སོ།། སྒྲ་གཅན་གྱི་རྩ། མཆོག་གི་རྩ་ཞེས་སོགས་ནི་རྩ་དབུ་མའི་མིང་གི་རྣམ་གྲངས་སོ།། ལྟེ་བ་མན་ཆད་ཀྱི་རྩ་གསུམ་གྱི་རྐྱང་མ་དང་རོ་མའི་རྩ་རྒྱུན་ལ་བཤད་བའི་རྩ་དང་གཅི་བའི་རྩ་ཞེས་བྱ་ཞིང་། དབུ་མའི་རྩ་རྒྱུན་ལ་དུང་ཅན་མ་དང༌། དུས་མེའི་རྩ་དང་། ཁུ་བ་བབ་པའི་རྩ་དང་། མཆོག་གི་རྩ་ཞེས་བྱ་ལ། དུང་ཅན་མ་དང་དབུ་མ་གཉིས་ཀ་ལ་ཡང་དྷུ་ཏཱི་ཞེས་བྱའོ།།

དེ་ཡང་ཨ་ཝ་དྷུ་ཏཱི་ལ་རོ་རྐྱང་གིས་འཁྱུད་པའི་གནས་ན་རྩ་འཁོར་ཡོད་པའི་རྩ་འཁོར་ནི་དྲུག་སྟེ། གསང་གནས་ཀྱི་རྩ་འཁོར་རྩ་འདབ་སོ་གཉིས་པ་དང་། ལྟེ་བའི་རྩ་འཁོར་རྩ་འདབ་རེ་བཞི་པ་དང་། སྙིང་གའི་རྩ་འཁོར་རྩ་འདབ་བརྒྱད་པ་དང་། མགྲིན་པའི་རྩ་འཁོར་རྩ་འདབ་སོ་གཉིས་པ་དང་། དཔྲལ་བའི་རྩ་འཁོར་རྩ་འདབ་བཅུ་དྲུག་པ་དང་། གཙུག་ཏོར་གྱི་རྩ་འཁོར་རྩ་འདབ་བཞི་པ་རྣམས་སོ།།

དེ་ལ་གསང་གནས་ཀྱི་རྩ་འཁོར་གྱི་རྩ་འདབ་སོ་གཉིས་ནི་རྩ་འཁོར་གྱི་ལྟེ་བ་ལས་གྱེས་པ་ནང་གི་རྩ་འདབ་དྲུག དྲུག་པོ་དེའི་བཞི་ལས་གཉིས་གཉིས་སུ་གྱེས་པས་བརྒྱད་དང་མ་གྱེས་པ་གཉིས་ཏེ་རིམ་གྱི་རྩ་འདབ་བཅུ་བཅུ་པོའི་དྲུག་ལས་གཉིས་གཉིས་སུ་གྱེས་པས་བཅུ་གཉིས། མ་གྱེས་པ་བཞི་སྟེ་ཕྱི་རོལ་གྱི་རྩ་འདབ་བཅུ་དྲུག་གོ། དེ་ཡང་གསང་གནས་ཀྱི་རྩ་འདབ་སོ་གཉིས་སུ་བྱེད་ཚུལ་ནི་རྩ་འཁོར་ལ་རྩ་འདབ་རིམ་པ་གསུམ་ཡོད་པའི་ནང་མ་ལ་དྲུག བར་ལ་བཅུ། ཕྱི་མ་ལ་བཅུ་དྲུག་ཡོད་པ་རྣམས་བསྡོམས་པའི་གྲངས་སོ་གཉིས་སུ་བྱེད་པ་ཡིན་ཏེ། ནང་ལེའི་ཞེ་དྲུག་པའི་འགྲེལ་ཆེན་ལས། གསང་བའི་འདབ་མ་སུམ་ཅུ་རྩ་གཉིས་པ་སྟེ་ཕྱི་རོལ་གྱི་འདབ་མ་བཅུ་དྲུག་རྣམས་ལ་དབྱངས་ཀྱི་རྩའོ།། ནང་གི་འདབ་མ་བཅུ་ལ་ཕུང་པོ་དང་ཁམས་ཀྱི་རྩའོ།། དེ་ལས་ནང་གི་འདབ་མ་རྣམས་ལ་སྟོང་པ་དྲུག་གི་རྩའོ།། ཞེས་རྩ་འདབ་སོ་གཉིས་སུ་བྱེད་ཚུལ་གསལ་བར་གསུངས་པས་སོ།།

ལྟེ་བའི་རྩ་འཁོར་ལ་རྩ་འདབ་དྲུག་ཅུ་རྩ་བཞིར་བྱེད་ཚུལ་ནི་རྩ་འཁོར་གྱི་ལྟེ་བ་ལས་དང་པོར་རྩ་འདབ་བཞིར་གྱེས། དེ་ནས་བཞི་པོ་དེ་རེ་རེ་ལས་གཉིས་གཉིས་གྱེས་པས་བརྒྱད། བརྒྱད་པོ་ཡང་རེ་རེ་ལས་གཉིས་གཉིས་སུ་གྱེས་པས་བཅུ་དྲུག བཅུ་དྲུག་པོ་དེའི་མཚམས་བཞིའི་རྩ་མ་གཏོགས་པའི་བཅུ་གཉིས་པོ་རེ་རེ་ལས་ལྔ་ལྔར་གྱེས་པས་དྲུག་ཅུ་དང་། མཚམས་བཞིའི་རེ་རེ་དང་བཅས་པས་དྲུག་ཅུ་རྩ་བཞིའོ།། འོ་ན་ནང་ལེའི་ཞེ་གཅིག་པའི་འགྲེལ་ཆེན་ལས། ལྟེ་བའི་འཁོར་ལོ་ན་སྙིང་པོར་འདབ་མ་བཞི་པའི་བདག་ཉིད་དོ།། དེའི་ཕྱི་རོལ་དུ་འདབ་མ་བརྒྱད་ཀྱི་བདག་ཉིད་དོ།། དེའི་ཕྱི་རོལ་དུ་འདབ་མ་བཅུ་གཉིས་ཀྱི་བདག་ཉིད་དོ།། ཞེས་འདབ་མ་བརྒྱད་ལ་བཅུ་གཉིས་སུ་གྱེས་པར་གསུངས་པ་མ་ཡིན་ནམ། ཇི་ལྟར་བཅུ་དྲུག་ཏུ་གྱེས་པ་ཡིན་ཞེ་ན། དེའི་ཕྱི་རོལ་དུ་འདབ་མ་བཅུ་གཉིས་ཀྱི་བདག་ཉིད་དོ་ཞེས་པ་ནི་བརྒྱད་ལ་བཅུ་དྲུག་ཏུ་གྱེས་པའི་བཞི་སྟོང་པའི་རྩ་དང་།བཅུ་གཉིས་འཕོ་བའི་རྩ་ཡིན་པས་རླུང་འཕོ་བའི་རྩ་བཅུ་གཉིས་ཀྱི་བདག་ཉིད་ཅེས་པའི་དོན་ཡིན་གྱི། དེ་ལྟ་མ་ཡིན་པར་བརྒྱད་ལས་གྱེས་པ་བཅུ་གཉིས་ཁོ་ན་ཡིན་ན་སྟོང་པའི་རྩ་བཞི་མེད་པར་འགྱུར་བ་དང་། རྩ་འདབ་དྲུག་ཅུ་རྩ་བཞི་ཡང་མ་ཚང་བར་འགྱུར་བས་སོ།། ལྟེ་བའི་རྩ་འཁོར་གྱི་དབུས་དེ་ནས་སོར་ཕྱེད་དང་བཅས་པའི་བཅུ་གཉིས་ཀྱི་སྟེང་ན་སྙིང་གའི་རྩ་འཁོར་གྱི་ལྟེ་བའི་དབུས་གནས་པའི་སྙིང་གའི་རྩ་འཁོར་ནི་རྩ་འདབ་བརྒྱད་པའོ།།

རྩ་འདབ་བརྒྱད་པོ་དེའི་མིང་ནི་ཤར་གྱི་རྩ་འདབ་ལ་སྣར་མ་ཞེས་བྱ་ཞིང་། དེ་བཞིན་དུ་མེ་མཚམས་ཀྱི་འདབ་མ་ལ་ལག་ལྡན་ལྕེ་དང་། ལྷོའི་འདབ་མ་ལ་དམར་སེར་དང་། བདེན་བྲལ་གྱི་འདབ་མ་ལ་རྒྱལ་དང་། ནུབ་ཀྱི་འདབ་མ་ལ་རྒྱལ་བ་དང་། རླུང་གི་འདབ་མ་ལ་ཨ་ལམ་བུ་ཥ་དང་། བྱང་གི་འདབ་མ་ལ་ཨི་ཊ་དང་། དབང་ལྡན་གྱི་འདབ་མ་ལ་ཀུ་ཧཱ་ཞེས་པའོ།། ཡང་སྙིང་གའི་རྩ་འཁོར་གྱི་དབུས་ནས་སྟེང་དུ་སོར་མོ་ཕྱེད་དང་བཅས་པའི་བཅུ་གཉིས་ཀྱི་མཚམས་ན་མགྲིན་པའི་རྩ་འཁོར་གྱི་ལྟེ་བའི་དབུས་གནས་པའི་མགྲིན་པའི་རྩ་འཁོར་ནི་རྩ་འདབ་སོ་གཉིས་པ་སྟེ། དེ་ཡང་དང་པོར་ལྟེ་བ་ལས་རྩ་འདབ་བརྒྱད་དུ་གྱེས་ཤིང་། བརྒྱད་པོ་རེ་རེ་ལས་གཉིས་གཉིས་སུ་གྱེས་པས་རྩ་འདབ་བཅུ་དྲུག བཅུ་དྲུག་པོ་རེ་རེ་ལས་ཀྱང་གཉིས་གཉིས་སུ་གྱེས་པས་སུམ་ཅུ་རྩ་གཉིས་སོ།། དེའི་ཡང་རྩ་འདབ་བཞི་ནི་རླུང་རགས་པ་མི་འབབ་པའི་སྟོང་པའི་རྩའོ།། ཡང་མགྲིན་པའི་རྩ་འཁོར་གྱི་ལྟེ་བའི་དབུས་ནས་སྟེང་དུ་སོར་མོ་ཕྱེད་དང་བཅས་པའི་བཅུ་གཉིས་ཀྱི་མཐའི་དཔྲལ་བའི་གནས་ན་རྩ་འཁོར་གྱི་དབུས་གནས་པའི་དཔྲལ་བའི་རྩ་འཁོར་རྩ་འདབ་བཅུ་དྲུག་པ་སྟེ། དེ་ཡང་དང་པོར་རྩ་འཁོར་གྱི་ལྟེ་བ་ལས་རྩ་འདབ་བརྒྱད་དུ་གྱེས་ཤིང་བརྒྱད་པོ་རེ་རེ་ལས་གཉིས་གཉིས་སུ་གྱེས་པས་བཅུ་དྲུག་གོ། དེའི་ཡང་རྩ་འདབ་གཉིས་ནི་རླུང་རགས་པ་མི་རྒྱུ་བའི་སྟོང་པའི་རྩའོ།། གཙུག་ཏོར་གྱི་རྩ་འཁོར་ན་རྩ་འདབ་བཞི་པའོ།། དེ་ལྟར་ན་རྩ་འཁོར་དྲུག་པོ་དེའི་རྩ་འདབ་ཀྱི་རྩའི་གྲངས་ནི་བརྒྱ་དང་ལྔ་བཅུ་རྩ་དྲུག་གོ། དེས་ན་འདིར་རྩ་འཁོར་དྲུག་དངོས་སུ་བཤད་པ་རྩ་འདབ་ལྷ་གྲངས་སོགས་དང་སྦྱར་བའི་ཆེད་དུ་ཡིན་གྱི་རྩ་འཁོར་ལོ་དྲུག་པོ་དེར་ངེས་པ་ནི་མ་ཡིན་ཏེ། དབང་མདོར་བསྟན་ལས། ལྟེ་གསང་ནོར་བུའི་ཆུ་སྐྱེས་ལ། །ལུས་ངག་སེམས་ནི་འབབ་པ་རྣམས། །ཞེས་ནོར་བུའི་དབུས་ནའང་རྩ་འཁོར་ཡོད་པར་གསུངས་ཤིང་། ནང་ལེའི་ཞེ་ལྔ་པའི་འགྲེལ་ཆེན་ལས། དཔལ་ལྡན་རྩ་ཡི་འཁོར་ལོ་འདི་ནི་རྣམ་པ་མང་པོར་འགྱུར་ཏེ་ཚིགས་ཀྱི་དབྱེ་བ་དུ་མས་སོ།། ཞེས་པ་ནི་འདིར་ལུས་ལ་ཚིགས་ཀྱི་དབྱེ་བའི་གྲངས་སུམ་བརྒྱ་དྲུག་ཅུ་སྟེ་ཚིགས་ཀྱི་དབྱེ་བ་དེ་དག་གིས་རྩའི་འཁོར་ལོའི་དབྱེ་བ་སུམ་བརྒྱ་དྲུག་ཅུར་འགྱུར་ཞིང་སྲོག་ལ་སོགས་པའི་རླུང་གི་བྱ་བའི་དབྱེ་བ་ཡང་དེ་བཞིན་དུ་ཤེས་པར་བྱའོ།། ཞེས་ཚིགས་སུམ་བརྒྱ་དྲུག་ཅུའི་གནས་རེ་རེ་ན་རྩ་འཁོར་དང་། རྩ་འཁོར་གར་ཡོད་ན་རླུང་གི་བྱ་བ་རྣམས་ཀྱང་ཡོད་པར་གསུངས་པས་སོ།། ཡང་འགྲེལ་ཆེན་ལས། ལྟེ་བའི་འཁོར་ལོ་དེའི་སྟེང་དུ་སོར་མོ་ཕྱེད་དང་བཅས་པའི་བཅུ་གཉིས་ཀྱི་སྟེང་སྙིང་གའི་ཕྱོགས་སུ་རྩའི་འཁོར་ལོ་རྩིབས་བརྒྱད་པ་ཞེས་པ་དང་། འདིར་སྙིང་གའི་པདྨའི་སྟེང་དུ་སོར་མོ་ཕྱེད་དང་བཅས་པའི་བཅུ་གཉིས་ཀྱི་མཐར་མགྲིན་པའི་འཁོར་ལོ་ཞེས་པ་དང་། མགྲིན་པའི་པདྨའི་དེའི་ཡང་སྟེང་དུ་སོར་མོ་ཕྱེད་དང་བཅས་པའི་བཅུ་གཉིས་ཀྱི་མཐར་དཔྲལ་བའི་པདྨ་འདབ་མ་བཅུ་དྲུག་ལ་ཞེས་གསུངས་པ་རྣམས་ཀྱི་དོན་ལ་མཁས་པ་ [བུ་སྟོན་ཐམས་ཅད་མཁྱེན་པ།] དག་ལྟེ་བ་ནས་སྙིང་གའི་བར་དང་། སྙིང་ག་ནས་མགྲིན་པའི་རྩ་འཁོར་གྱི་དབུས་ཀྱི་བར་དང་། དེ་ནས་དཔྲལ་བའི་རྩ་འཁོར་གྱི་དབུས་ཀྱི་བར་རྣམས་ལ་མི་ཕལ་པའི་སོར་ཕྱེད་དང་བཅུ་གསུམ་མེད་པར་དགོངས་ཏེ། ཕྱེད་དང་བཅས་པའི་སོར་མོ་བཅུ་གཉིས་ཞེས་པ་སངས་རྒྱས་ཀྱི་ཁྲུ་ཕྱེད་ལ་སོར་ཕྱེད་དང་བཅུ་གསུམ་ཡོད་པའི་དབང་དུ་བྱས་པ་ཡིན་ནོ།། ཞེས་གསུང་པ་ལ་འགྲེལ་བཤད་དེ་ཁོ་ན་ཉིད་སྣང་བར་བྱེད་པ་ལས། འགྲེལ་ཚིག་འདི་རྣམས་ལ་མི་ཕལ་པའི་གཞི་དུས་ལ་སྙིང་གར་ཐུན་ཚོད་ཀྱི་རླུང་རྒྱུ་བའི་རྟེན་གྱི་རྩ་འཁོར་འཆད་པའི་སྐབས་ཡིན་པས་འགལ་བ་སྤོང་ཚུལ་དེ་འབྲེལ་བར་མ་མཐོང་ཞེས་གསུང་པ་དེ་ཁོ་ན་ལྟར་ཡིན་ཞིང་། འགྲེལ་བཤད་ཀྱིས་ནི་ལྟ་བའི་བུག་པ་ཡོངས་ནས་སྙིང་ག་བར་ལ་མི་ཕལ་པའི་རང་སོར་ཕྱེད་དང་བཅུ་གསུམ་མེད་ཀྱང་། ལྟེ་བའི་རྩ་འཁོར་ཕྱིའི་ལྟེ་བའི་བུག་པའི་ཐད་ལས་ཅུང་ཟད་དམའ་བར་ཡོད་པའམ། སྙིང་གའི་རྩ་འཁོར་ཡང་ལྷ་ལ་སོགས་པའི་ཆག་ཚད་ལ་སྙིང་ག་རང་གི་གནས་ལ་ཚད་ཇི་ཙམ་བཤད་པའི་ཚད་དེའི་མ་མཐའི་མཚམས་ན་མེད་ཀྱི་སྙིང་གའི་གནས་ཀྱི་ཡན་མན་ཀྱི་དབུས་དྲང་པོ་ན་རྩ་འཁོར་ཡོད་པས་དེ་འདྲ་ཅིག་གི་སྒོ་ནས་འགལ་སྤོང་དགོས་སམ་སྙམ་མོ་ཞེས་བཤད་དོ།།

དེ་ལྟར་གསུང་པ་གཉིས་ཀས་ཀྱང་ལྟེ་བའི་དབུས་ནས་ནུ་མ་གཉིས་ཀྱི་ཐད་དྲང་གི་དབུས་ཀྱི་སྙིང་གའི་བར་ལ་མི་ཕལ་པའི་སོར་མོ་ཕྱེད་དང་བཅུ་གསུམ་མེད་པར་དགོངས་ནས་འགལ་སྤོང་མཛད་པར་སྣང་ནའང་ལྟེ་བའི་དབུས་རྐེད་པའི་ཐད་ནས་མགྲིན་པའི་བར་ལ་སོར་ཉེར་བཞི། ལྷུན་པོའི་མགྲིན་པ་སྟེ་ལུས་ལ་སོར་དྲུག་གོ་ཞེས་གསུངས་པ་ལྟར་མགྲིན་པ་ལ་སོར་དྲུག །མགྲིན་པ་ནས་དཔྲལ་བའི་མཐའི་བར་དུ་སྟེ་ལུས་ལ་སོར་བཅུ་གཉིས་སོ་ཞེས་གསུངས་པ་ལྟར་མགྲིན་པའི་ཡ་མཐའ་ནས་དཔྲལ་བའི་མ་མཐའ་བར་ལ་སོར་བཅུ་གཉིས་ཡོད་པའི་མགྲིན་པའི་ཡ་མཐའ་ནས་སྣའི་བར་ལ་སོར་བཞི། སྣའི་རྩེ་ནས་སྨིན་མཚམས་བར་ལ་སོར་བཞི་སྟེ་དྲིལ་བས་ལྟེ་བའི་བུག་པ་ནས་སྨིན་མཚམས་བར་ལ་སོར་སུམ་ཅུ་རྩ་བརྒྱད་ཡོད་ཅིང་། འགྲེལ་ཆེན་ལས་གསུངས་པ་ལྟར་ལྟེ་བ་ནས་སྙིང་ག་དང༌། སྙིང་ག་ནས་མགྲིན་པ་དང་། མགྲིན་པ་ནས་དཔྲལ་བའི་བར་ལ་སོར་ཕྱེད་དང་བཅུ་གསུམ་རེ་ཡོད་པ་རྣམས་བསྡོམས་པས་སོར་ཕྱེད་དང་སོ་བརྒྱད་འོང་བས་ལྟེ་བ་ནས་སྙིང་ག་དང་། སྙིང་ག་ནས་མགྲིན་པ་དང་། མགྲིན་པ་ནས་དཔྲལ་བའི་བར་ལ་སོར་ཕྱེད་དང་བཅུ་གསུམ་རེར་བྱས་ཀྱང་ལྟེ་བ་ནས་དཔྲལ་བའི་མ་མཐའི་བར་ལ་སོར་སོ་བརྒྱད་ཡོད་པས་ད་དུང་དཔྲལ་བར་སོར་ཕྱེད་ཀྱིས་མ་སླེབ་པས་སོ།། དེ་ལྟར་ན་ལྟེ་བའི་བུག་པ་ནས་སྨིན་མཚམས་བར་ལ་ཆ་མཉམ་གསུམ་དུ་བྱས་པའི་ཆ་རེ་ལ་སོར་ཕྱེད་དང་བཅུ་གསུམ་རེ་མི་འོང་བའི་སྐྱོན་མེད་དོ།། དེ་ལྟར་ན་ཆ་རེ་ལ་སོར་ཕྱེད་དང་བཅུ་གསུམ་བྱས་ཀྱང་དཔྲལ་བར་སོར་ཕྱེད་ཀྱིས་མ་སླེབ་པའི་སོར་ཕྱེད་པ་དེ་ཆ་གསུམ་དུ་བྱས་པས་ནས་རེ་དང་ནས་ཀྱི་སུམ་ཆ་རེ་འོང་བ་ལྟེ་བ་ནས་སྙིང་གའི་བར་སོགས་ཀྱི་སོར་ཕྱེད་དང་བཅུ་གསུམ་རྣམས་ཀྱི་སྟེང་དུ་བསྣན་དགོས་སོ།།

མདོར་ན་འགྲེལ་ཆེན་གྱི་སྐབས་འདིར་རྩ་འཁོར་རྣམས་ཡོད་པའི་གནས་བཤད་པ་ནི་རྩ་འཁོར་གང་གི་ལྟེ་བའི་དབུས་སུ་གནད་དུ་བསྣུན་པའི་གནས་ཤེས་པར་བྱ་བའི་ཕྱིར་དུ་གསུངས་པ་ཡིན་པས་སྒྲ་ཇི་བཞིན་པར་ཤེས་པར་བྱ་ཞིང་། ལྟེ་བ་ནས་སྙིང་ག་བར་ལ་སོར་ཕྱེད་བཅས་བཅུ་གཉིས་སུ་བཤད་པ་སོགས་རགས་པ་ཐོབ་ཐང་བརྩིས་པའི་དབང་དུ་བྱས་པ་སོགས་སུ་ཤེས་པར་བྱ་དགོས་སོ།།

རླུང་གི་གནས་ཚུལ་བཤད་པ།

༈ གཉིས་པ་རླུང་གི་གནས་ཚུལ་བཤད་པ་ནི། རླུང་ནི་བཅུ་སྟེ་སྲོག་རླུང་ནམ་མཁའི་ཁམས་པ་དང་། མཉམ་གནས་རླུང་གི་ཁམས་པ་དང་། གྱེན་རྒྱུ་མེའི་ཁམས་པ་དང་། ཁྱབ་བྱེད་ཆུའི་ཁམས་པ་དང་། ཀླུ་སའི་ཁམས་པ་དང་། རུས་སྦལ་རླུང་གི་ཁམས་པ་དང་། རྩངས་པ་མེའི་ཁམས་པ་དང་། ལྷས་བྱིན་ཆུའི་ཁམས་པ་དང་། ནོར་ལས་རྒྱལ་སའི་ ཁམས་པ་དང་། ཐུར་སེལ་ཡེ་ཤེས་ཀྱི་ཁམས་པ་ དང་བཅུའོ། །སྲོག་རླུང་ལ་ཡང་རྒྱུ་ལམ་གྱི་སྒོ་ནས་ཕྱེ་ན་གསུམ་སྟེ། གཡོན་གྱི་རྩ་རྐྱང་མ་ལ་རྒྱུ་བ་དང་། གཡས་ཀྱི་རྩ་རོ་མ་ལ་རྒྱུ་བ་དང་། དབུ་མའི་རྩ་ལ་རྒྱུ་བ་སྟེ་གསུམ་མོ།། ཐུར་སེལ་ཡང་བྱེད་ལས་ཀྱི་སྒོ་ནས་གསུམ་སྟེ། འོག་སྒོ་གཉིས་ནས་བཤང་བ་དང་གཅི་བ་འདྲེན་པར་བྱེད་པ་དང་། མཆོག་གི་རྩ་དུང་ཅན་མ་ནས་ཁུ་བ་འདྲེན་པར་བྱེད་པ་དང་གསུམ་མོ།། དེ་ཡང་རླུང་བཅུའི་གནས་ནི། མཉམ་གནས་སོགས་བརྒྱད་ན་སྙིང་གའི་རྩ་འདབ་བརྒྱད་ལ་རིམ་པ་བཞིན་གནས་ཏེ། མཉམ་གནས་ནི་ཤར་གྱི་རྩ་འདབ་སྣར་མ་ལ་གནས་སོ།། གྱེན་རྒྱུ་ནི་ཤར་ལྷོའི་རྩ་འདབ་ལག་ལྡན་གྱི་ལྕེ་ལ་གནས་སོ།། དེ་བཞིན་དུ་ཁྱབ་བྱེད་ལྷོའི་རྩ་འདབ་དམར་སེར་ལ་དང་། ཀླུ་ནི་ལྷོ་ནུབ་ཀྱི་རྩ་འདབ་རྒྱལ་ལ་དང་། རུས་སྦལ་ནི་ནུབ་ཀྱི་རྩ་འདབ་རྒྱལ་བ་ལ་དང་། རྩངས་པ་ནི་ནུབ་བྱང་གི་རྩ་འདབ་འཕྱང་བ་ལ་དང་། ལྷས་བྱིན་ནི་བྱང་གི་རྩ་འདབ་ལུག་ལ་དང་། ནོར་ལས་རྒྱལ་ནི་བྱང་ཤར་གྱི་རྩ་འདབ་ཚུལ་འཆོས་པ་ལ་གནས་ཤིང་། རྩ་འདབ་དེ་རྣམས་ནི་རླུང་དེ་དག་རང་རང་གི་སྐྱེ་བའི་གནས་ཀྱང་ཡིན་ནོ།

དེ་ཡང་རྩ་དེ་རྣམས་རླུང་དེ་རྣམས་ཀྱི་སྐྱེ་བའི་གནས་ཀྱི་གཙོ་བོ་ཡིན་པ་ལ་དགོངས་པ་སྟེ། གཞན་དུ་ན་རླུང་རྣམས་ཀྱིས་རྩ་སྟོང་ཕྲག་བདུན་ཅུ་རྩ་གཉིས་པོ་ཐམས་ཅད་ལ་ཁྱབ་ནས་གནས་ཏེ། ནང་ལེའི་ཞེ་གཉིས་པའི་འགྲེལ་ཆེན་ལས། སྲོག་ལ་སོགས་པ་འདི་དག་རྩ་སྟོང་ཕྲག་བདུན་ཅུ་རྩ་གཉིས་པོ་རྣམས་ལ་ཁྱབ་པ་སྟེ་འོན་ཀྱང་གནས་བརྒྱད་ནས་རླུང་བརྒྱད་སྐྱེ་བའི་ཕྱིར་ཏེ། ཞེས་གསུངས་པ་ལྟར་རོ། རླུང་རྣམས་མགོན་པོ་གང་གི་རླུང་ཡིན་པ་ནི་སྲོག་འཛིན་མི་བསྐྱོད་པའི་རླུང་དང་། དེ་བཞིན་དུ་ཐུར་སེལ་རྡོར་སེམས་དང་། མཉམ་གནས་དོན་གྲུབ་དང་། གྱེན་རྒྱུ་རིན་འབྱུང་དང་། ཁྱབ་བྱེད་སྣང་བ་མཐའ་ཡས་དང་། ཀླུ་རྣམ་སྣང་དང་། རུས་སྦལ་དོན་གྲུབ་དང་། རྩངས་པ་རིན་འབྱུང་དང་། ལྷས་བྱིན་སྣང་མཐའ་དང་། ནོར་ལས་རྒྱལ་རྣམ་སྣང་གི་རླུང་ངོ་།།

ཐིག་ལེའི་གནས་ཚུལ་བཤད་པ།

༈ གསུམ་པ་ཐིག་ལེའི་གནས་ཚུལ་བཤད་པ་ནི། གོང་ཏུ་བཤད་པ་ལྟར་མངལ་དུ་ཆགས་པ་ནས་ཟླ་བ་བཅུ་གསུམ་སོང་བའི་མཐར་ཐིག་ལེ་དཀར་དམར་དང་པོར་འཕེལ་བའི་འགོ་རྩོམ་ཞིང་སྐྱེས་པས་ལོ་བཅུ་དྲུག་ལོན་གྱི་བར་དང་། བུད་མེད་ཀྱིས་ལོ་བཅུ་གཉིས་ལོན་གྱི་བར་ལ་འཕེལ་བར་འགྱུར་ལ། བུད་མེད་ལོ་བཅུ་གཉིས་ལོན་པའི་ཚེ་རྡུལ་གསང་གནས་ནས་འབྱུང་བས་རྡུལ་ལམ་ཐིག་ལེ་དམར་པོའི་འཕེལ་བ་གཏོང་ཞིང་། སྐྱེས་པ་ལ་ལོ་བཅུ་དྲུག་ལོན་པའི་ཚེ་ཁུ་བ་དབང་པོའི་སྒོ་ནས་འབྱུང་བས་ཐིག་ལེ་འམ་ཁུ་བའི་འཕེལ་བ་གཏོང་ངོ་།། དེ་ལྟ་བུའི་ཐིག་ལེ་དཀར་དམར་རྣམས་སྤྱིར་ལུས་ཀྱི་ཆ་ཐམས་ཅད་ལ་ཏིལ་ལ་ཏིལ་མར་གནས་པའི་ཚུལ་དུ་གནས་ཤིང་། དཀར་པོའི་ཆ་གཙོ་བོར་སྤྱི་བོ་བདེ་ཆེན་གྱི་འཁོར་ལོ་དང་། དམར་པོའི་ཆ་གཙོ་བོར་གསང་གནས་དང་ལྟེ་བའི་འཁོར་ལོ་ལ་གནས་པ་དང༌། ཡང་ཁུ་བ་བྱང་སེམས་དཀར་པོའི་ཆ་རྩ་རྐྱང་མ་ལ་གནས་ཤིང་རྐྱང་མ་ནས་འབྱུང་བ་དང་། རྡུལ་ལམ་བྱང་སེམས་དམར་པོའི་ཆ་རྩ་རོ་མ་ལ་གནས་ཤིང་རོ་མ་ནས་འབྱུང་བ་དང་། ལྟེ་བ་མན་ཆད་དུ་རྩ་གསུམ་གྱི་ནང་ཚན་གྱི་དུང་ཅན་མ་འམ་མཆོག་གི་རྩ་ནས་དཀར་དམར་གཉིས་ཀ་འབྱུང་ངོ་།།

ཡང་རྩ་འཁོར་གྱི་དབང་དུ་བྱས་ན་དཔྲལ་བའི་རྩ་འཁོར་གྱི་ལྟེ་བར་སད་པའི་གནས་སྐབས་སྐྱེད་པར་བྱེད་པའི་ཐིག་ལེ་དང་། མགྲིན་པའི་རྩ་འཁོར་གྱི་ལྟེ་བར་རྨི་ལམ་གྱི་གནས་སྐབས་སྐྱེད་པར་བྱེད་པའི་ཐེག་ལེ་དང༌། སྙིང་གའི་རྩ་འཁོར་གྱི་ལྟེ་བར་གཉིད་འཐུག་གི་གནས་སྐབས་སྐྱེད་པར་བྱེད་པའི་ཐིག་ལེ་དང་། ལྟེ་བའི་རྩ་འཁོར་གྱི་ལྟེ་བར་བཞི་པའི་གནས་སྐབས་སྐྱེད་པར་བྱེད་པའི་ཐིག་ལེ་གནས་ཤིང་། དེ་བཞིན་དུ་ལྟེ་བ་མན་ཆོད་ན་ཡིད་གནས་སྐབས་བཞི་སྐྱེད་པའི་ཐིག་ལེ་གནས་པའི་ལྟེ་བའི་ཐིག་ལེ་གཅིག་པུ་དེ་ཉིད་ལ་བཞི་པའི་གནས་སྐབས་སྐྱེད་པ་དང་སད་པའི་གནས་སྐབས་སྐྱེད་པའི་ནུས་པ་གཉིས་ཀ་ཡོད་པས་ཐིག་ལེ་གཅིག་པུ་དེ་ཉིད་གཉིས་ཀའི་བཞི་མཐུན་ཡིན་ཞེས་གསུང་ངོ་།། དེ་ལྟར་ན་ལྟེ་བ་ན་སད་པའི་གནས་སྐབས་སྐྱེད་པའི་ཐིག་ལེ་དང་། གསང་གནས་ན་རྨི་ལམ་གྱི་གནས་སྐབས་སྐྱེད་པའི་ཐིག་ལེ་དང་། ནོར་བུའི་དབུས་ན་གཉིད་འཐུག་གི་གནས་སྐབས་སྐྱེད་པའི་ཐིག་ལེ་དང་། ནོར་བུའི་རྩེ་ན་བཞི་པའི་གནས་སྐབས་སྐྱེད་པའི་ཐིག་ལེ་གནས་སོ།།

དེ་ཡང་དཔྲལ་བ་དང་ལྟེ་བ་ན་གནས་པའི་སད་པའི་གནས་སྐབས་སྐྱེད་པའི་ཐིག་ལེ་འདི་དག་གི་སྟེང་ན་ཐ་མལ་པ་རྣམས་ལ་གཉིད་སད་པའི་གནས་སྐབས་ཀྱི་རྣམ་རྟོག་གྲངས་མེད་པ་རྣམས་སྐྱེད་པའི་ནུས་པ་ཅིག་དང་། སངས་རྒྱས་པའི་ཚེ་སྤྲུལ་པའི་སྐུ་མཐའ་ཡས་པ་སྐྱེད་པའི་ནུས་པ་ཅིག་དང་གཉིས་ཡོད་དོ།། དེ་བཞིན་དུ་མགྲིན་པ་དང་གསང་གནས་གཉིས་ན་གནས་པའི་ཐིག་ལེ་འདིའི་སྟེང་ན་ཐ་མལ་པ་ལ་རྨི་ལམ་སྣ་ཚོགས་རྨི་བ་སྐྱེད་པའི་ནུས་པ་ཅིག་དང་། སངས་རྒྱས་པའི་ཚེ་ལོངས་སྤྱོད་རྫོགས་པའི་སྐུ་གསུང་རྣམ་པ་ཐམས་ཅད་པ་སྐྱེད་པའི་ནུས་པ་ཅིག་དང་གཉིས་ཡོད་ཅིང༌། ཡང་སྙིང་ག་དང་ནོར་བུའི་དབུས་ན་གནས་པའི་གཉིད་མཐུག་གི་གནས་སྐབས་སྐྱེད་པའི་ཐིག་ལེ་འདི་གཉིས་ཀྱི་སྟེང་ན་ཐ་མལ་པ་ལ་གཉིད་དྲན་མེད་སྐྱེད་པའི་ནུས་པ་ཅིག་དང༌། སངས་རྒྱས་པའི་ཚེ་ཆོས་ཀྱི་སྐུ་སྤྲོས་པའི་མཐའ་ཐམས་ཅད་དང་བྲལ་བའི་མི་རྟོག་པ་སྐྱེད་པའི་ནུས་པ་ཅིག་དང་གཉིས་ཡོད་དོ།། ཡང་ལྟེ་བ་དང་ནོར་བུའི་རྩེ་གཉིས་ན་གནས་པའི་བཞི་པའི་གནས་སྐབས་སྐྱེད་པའི་ཐིག་ལེ་འདི་གཉིས་ཀྱི་སྟེང་ན་ཐ་མལ་པ་ལ་འཛག་བདེ་སྐྱེད་པའི་ནུས་པ་ཅིག་དང་། སངས་རྒྱས་པའི་ཚེ་བདེ་བའི་སྐུ་མཆོག་ཏུ་མི་འགྱུར་བའི་བདེ་བ་སྐྱེད་པའི་ནུས་པ་ཅིག་དང་གཉིས་ཡོད་དོ།། དེ་བས་ན་སྦྱོར་བ་ཡན་ལག་དྲུག་ལ་སོགས་པ་བསྐྱེད་རྫོགས་ཀྱི་ལམ་རྣམས་ཀྱི་ཐིག་ལེ་བརྒྱད་པོ་དེ་རྣམས་ཀྱི་སྟེང་གི་ཐ་མལ་པའི་གནས་སྐབས་སུ་འབྱུང་བའི་སྐྱོན་གྱི་ཆ་རྣམས་སྐྱེད་པའི་ནུས་པ་རྣམས་སྦྱངས་ཏེ། སྐུ་བཞི་ལ་སོགས་པ་ཡོན་ཏན་གྱི་ཆ་རྣམས་སྐྱེད་པའི་ནུས་པ་རྣམས་ཡོན་ཏན་ཡར་ལྡན་དུ་སྐྱེད་པའི་སྒོ་ནས་མཐར་ཐུག་གི་འབྲས་བུ་མངོན་དུ་བྱེད་པ་ཡིན་ནོ།།

མདོར་ན་བཤད་མ་ཐག་པའི་ཐིག་ལེ་དཀར་དམར་འདི་དག་མངལ་སྐྱེས་ཀྱི་ལུས་སྐྱེད་པ་ལ་མེད་མི་རུང་གི་རྒྱུ་དང་། ཚེ་ཐོག་མ་མེད་པ་ནས་ཁམས་དཀར་དམར་འཛག་པའི་འཕོ་བའི་བག་ཆགས་ཡང་ཡང་བཞག་པའི་འཕོ་བའི་བག་ཆགས་ཁོ་ནས་འཁོར་བར་ཡང་ཡང་འཁྱམ་པ་ཡིན་པ་དང་རྡོ་རྗེའི་ལུས་ཀྱི་རྩ་རླུང་ལ་གནད་དུ་བསྣུན་པའི་རྡོ་རྗེའི་རྣལ་འབྱོར་གོམས་པ་ལས་ཁམས་དཀར་དམར་འཛག་པ་མེད་ཅིང་འཕོ་མེད་དུ་བཅིངས་པ་ཁོ་ན་ལས་སྟོང་གཟུགས་ཀྱི་གཟུགས་སྐུ་དང་མཆོག་ཏུ་མི་འགྱུར་བའི་བདེ་སྟོང་དབྱེར་མེད་ཆོས་སྐུ་གཉིས་ངོ་བོ་དབྱེར་མེད་དུ་སྦྱོར་བའི་ཟུང་འཇུག་མངོན་དུ་བྱེད་པ་ནི་སེམས་འགྲེལ་སྐོར་གྱིས་རྒྱུད་རྣམས་ཀྱི་དགོངས་པ་འགྲེལ་ཚུལ་ཡིན་པས་ལམ་གྱི་བགྲོད་ཚུལ་འདི་ལ་བརྟེན་ནས་མཆོག་སྒྲུབ་པར་འདོད་པ་རྣམས་ཀྱིས་ཁམས་བྱང་ཆུབ་ཀྱི་སེམས་ལ་གཅེས་སྤྲས་སུ་བྱ་དགོས་ཏེ། ཁམས་ལེའི་མདོར་བསྡུས་དང་པོ་ལས། ཤེས་རབ་འགྲོགས་ལས་གང་གི་དཀར་པོ་ཟག །དེ་ཡི་བདེ་བ་ཅི་ཡིས་འཕེལ་བར་འགྱུར། །དཔྱིད་དང་འགྲོགས་ལ་མེ་ཏོག་མ་རྒྱས་པ། །ལྷུང་ན་རྩུ་ཏའི་འབྲས་བུ་གང་གིས་འབྱུང༌། །ཞེས་དང་། ཇི་ལྟར་ལོ་ཡི་འཚམས་སུ་རྒྱ་ལམ་ན། །རི་དྭགས་ཟས་ཅན་འཁྲིག་པའི་བདེ་བ་ཚོལ། །རྡོ་ཡི་ཕྱེ་མ་དག་གི་ཁ་ཟས་ཅན། །ཕུག་རོན་རྣམས་ནི་རྟག་ཏུ་བྱེད་པ་སྟེ། །ལན་ཅིག་རྟག་ཏུ་ཁུ་བ་ལྟུང་བའི་ཕྱིར། །གཉི་ག་ལ་ཡང་མཆོག་གི་བདེ་བ་མེད། །དེ་བཞིན་དཀའ་ཐུབ་ཅན་དང་འདོད་ལྡན་ཡང་། །རྨི་ལམ་སད་པ་དག་ལ་འཛག་ཕྱིར་རོ།། ཇི་ལྟར་གཉིད་ལོག་ལ་ཡང་སྦྲུལ་གྱི་ནི། །སོས་བཏབ་མི་འཚོ་དེ་བཞིན་དཀའ་ཐུབ་པ། །ཁུ་བ་སྡུད་པ་མེད་ཕྱིར་སྟོབས་མེད་མའི། །སྐྱེ་གནད་དེ་ཡིས་ཉམས་པར་བྱས་པའོ། །ཞེས་སོགས་མང་དུ་གསུངས་པ་ལྟར་རོ།།

རྩ་རླུང་རྒྱུ་ཚུལ་བཤད་པ།

༈ གཉིས་པ་རྩ་རྣམས་ཀྱི་ནང་ནས་རླུང་རྣམས་ཀྱི་རྒྱུ་ཚུལ་བཤད་པ་ལ་གཉིས། འཁོར་ལོ་བཞིའི་རྩ་འདབ་རྣམས་ལ་རླུང་རྒྱུ་བའི་ཚུལ་དང་། སྣ་བུག་ལ་རླུང་རྣམས་ཀྱི་འཕོ་ཚུལ་ལོ།། དང་པོ་ནི། ནང་ལེའི་རེ་གཉིས་པའི་འགྲེལ་ཆེན་ལས། མངལ་ནས་སྐྱེས་པ་རྣམས་ཀྱིས་བཟུང་བའི་ཟླ་བ་ནི་ཆུ་སྲིན་ནོ།། དེ་ནས་བདུན་པ་ནི་སྲོག་སྐྱེ་བའི་ཟླ་བ་སྟེ་ཀརྐཊའོ།། ཞེས་གསུངས་པའི་དོན་ནི་མངལ་སྐྱེས་ཐམས་ཅད་ཆུ་སྲིན་གྱི་ཟླ་བ་མཚན་ཉིད་པ་ཁོ་ན་ལ་མངལ་འཛིན་པ་ཡིན་ན་ཧ་ཅང་ཐལ་བས་མངལ་སྐྱེས་ཀྱི་མིང་མངལ་བཟུང་བའི་ཟླ་བ་དེ་ཟླ་བ་གང་ཡིན་ཡང་ཆུ་སྲིན་གྱི་ཟླ་བའི་མིང་བཏགས་ཏེ། མངལ་བཟུང་བ་དེ་ནས་བགྲངས་པའི་ཟླ་བ་བདུན་པ་དེ་ལ་ཡང་ཀརྐཊའི་ཟླ་བའི་མིང་བཏགས་པའི་སྒོ་ནས་ཆུ་སྲིན་གྱི་ཟླ་བའི་མིང་བཏགས་པ་མངལ་བཟུང་བའི་ཟླ་བ་དེ་ནས་བགྲངས་པའི་ཟླ་བ་བདུན་པ་ཀརྐཊའི་མིང་ཅན་གྱི་ཟླ་བ་ལ་སྲོག་གི་རླུང་ཐོག་མར་སྐྱེའོ།། རླུང་སྐྱེས་པ་དེ་ནས་ཇི་སྲིད་མངལ་ན་གནས་ཀྱི་བར་ལ་རྩ་དབུ་མར་རླུང་དབྱུག་པའི་རྣམ་པ་ལྟར་འབྱུང་འཇུག་མི་བྱེད་པར་གནས་པ་ལས་ཕྱིས་མངལ་ནས་བཙས་མ་ཐག་པའི་ཚེ་དང་པོའི་རྩ་དབུ་མ་ལས་རླུང་ང་དྲུག་རྐང་བཅས་རྒྱུའོ།། དེ་ནས་གཡས་གཡོན་གང་རུང་གི་ཁྱིམ་གྱི་རྩ་རྣམས་ལ་རྒྱུ་བར་བྱེད་དོ།། དེ་ཡང་མངལ་ནས་སྐྱེས་པ་རྣམས་ཀྱི་མངལ་བཟུང་བའི་ཟླ་བ་ནི་ཆུ་སྲིན་ནོ།།

ཞེས་སོགས་ཀྱི་དོན་ལ་ཆུ་སྲིན་གྱི་ཟླ་བ་ཞེས་པ་མའི་ནང་གི་ཆུ་སྲིན་གྱི་ཁྱིམ་གྱི་རྩ་ལ་རླུང་རྒྱུ་བོ་ཆུ་སྲིན་གྱི་ཟླ་བར་བྱས་ནས་དེའི་དུས་སུ་མངལ་སྐྱེས་རྣམས་ཀྱིས་མངལ་བཟུང་བ་ལ་བྱེད་པ་ནི་མི་འཐད་དེ། དེ་ལྟར་ཡིན་ན་མའི་ཆུ་སྲིན་གྱི་ཁྱིམ་གྱི་རྩ་ནས་བགྲངས་པའི་བདུན་པ་མའི་ཀརྐཊའི་ཁྱིམ་གྱི་རྩ་ནས་རླུང་རྒྱུ་བའི་ཚེ་མངལ་དུ་ཞུགས་པའི་སེམས་ཅན་དེ་ལ་རླུང་སྐྱེ་དགོས་ལ། དེ་ལྟ་ཡིན་ན་མངལ་དུ་ཞུགས་པའི་ཞག་ངོ་དེ་ཉིད་ལ་རླུང་སྐྱེ་དགོས་པར་འགྱུར་ལ། དེ་ནི་མི་འཐད་དོ།། མངལ་དུ་ཞུགས་པའི་ཞག་ངོ་རེ་ལ་རླུང་གི་རྟེན་རྩ་ལ་སོགས་པའང་ཆགས་པའི་གཞི་མ་ཙམ་ཡང་མེད་པའི་ཕྱིར་རོ།། དེ་ལྟར་ན་ཆུ་སྲིན་གྱི་ཟླ་བ་དང་ཀརྐཊའི་ཟླ་བ་ཞེས་པ་ཡང་ཕྱིའི་ཟླ་བ་ལ་བྱེད་དགོས་སོ།། ཕྱིའི་ཟླ་བ་ལ་བྱེད་པ་ལ་ཡང་མི་མངལ་སྐྱེས་གང་ཞིག་ཆུ་སྲིན་གྱི་ཟླ་བ་མཚན་ཉིད་པ་ལ་མངལ་དུ་ཞུགས་པའི་གང་ཟག་ཅིག་གི་དབང་དུ་བྱས་ནས། མངལ་ནས་སྐྱེས་པ་རྣམས་ཀྱི་ཞེས་གསུངས་པ་ཡིན་གྱི།་མི་མངལ་སྐྱེས་ཐམས་ཅད་ཀྱི་དབང་དུ་བྱས་པ་མིན་ཞེས་གསུངས་ཡང་། ནང་ལེའི་སོ་བརྒྱད་པའི་འགྲེལ་ཆིན་ལས། དེ་ཡང་དུས་སྦྱོར་ཀརྐཊ་ནས་མིའི་དབང་པོ་ཞེས་པ་ཕྱི་རོལ་དུ་ཉི་མའི་སྐྱེ་བའི་ཁྱིམ་ནི་ཀརྐཊའོ།། དེ་བཞིན་དུ་སྐྱེས་པ་ཐམས་ཅད་ཀྱི་དུས་སྦྱོར་གང་དུ་སྐྱེས་པར་གྱུར་པའི་ཁྱིམ་དེ་ནི་ཀརྐཊའི་མིང་ཅན་དུ་རིག་པར་བྱ་སྟེ་སྲོག་སྐྱེ་བའི་གནས་སུ་འགྱུར་རོ།། ཞེས་པའི་རིགས་པས་ཏེ། ཞེས་གསུངས་པའི་སྐྱེས་པ་ཐམས་ཅད་ཅེས་པ་འདིས་མི་མངལ་སྐྱེས་ཐམས་ཅད་འཛིན་པ་ཡིན་པའི་ཕྱིར་ན་གོང་དུ་བཤད་པ་ལྟར་འཐད་དོ།།

དེ་ལྟར་ངེས་པར་བྱས་ནས་མངལ་ནས་བཙས་མ་ཐག་པའི་ཚེ་རླུང་འབྱུང་འཇུག་ཁུག་པ་རེ་དབུགས་རེར་བྱས་པའི་ལྔ་བཅུ་རྩ་དྲུག་རྐང་བཅས་དབུ་མར་རྒྱུས་ཏེ་སྣ་བུག་ཏུ་མཉམ་རྒྱུ་བྱས་ནས་དེའི་རྗེས་དེ་མ་ཐག་ཏུ་གཡོན་གྱི་ལུག་གི་ཁྱིམ་མམ་ལུག་གི་དུས་སྦྱོར་གྱི་རྩ་ལ་ནམ་མཁའི་དཀྱིལ་འཁོར་གྱི་རླུང་རྒྱུ་བ་ནས་མཐར་གཡས་ཀྱི་ཉའི་དུས་སྦྱོར་གྱི་རྩ་ལ་སའི་དཀྱིལ་འཁོར་གྱི་རླུང་རྒྱུས་ཟིན་པའི་བར་ལ་ཉིན་ [ཉ་ནི།] ཞག་གཅིག་དང་རླུང་ཉི་ཁྲི་ཆིག་སྟོང་དྲུག་བརྒྱ་རྒྱུས་ཟིན་དུས་མཉམ་དུ་འོང་ངོ་།།

དེ་ཡང་ཁྱིམ་མམ་དུས་སྦྱོར་གྱི་རྩ་རྣམས་ནི་ལྟེ་བའི་བར་སྐོར་གྱི་རྩ་འདབ་བཅུ་གཉིས་ཏེ། དེ་ཡང་ལུས་ཀྱི་མདུན་ཤར་དང་། གཡོན་བྱང་དང་། གཡས་ལྷོ་དང་།་རྒྱབ་ནུབ་ཏུ་བཤད་ཅིང་། ཕྱོགས་བཞིའི་ཆོས་གཞན་རྣམས་གྲངས་བགྲང་བའི་ཚེ་ཡང་ཤར་དང་པོར་བྱས་ནས་བགྲང་བ་བཞིན་དུ་འདིར་ཡང་ཤར་མདུན་གྱི་ཕྱོགས་ནས་བགྲང་བར་བྱ་བ་ཡིན་ལ། དེ་ལྟར་བྱས་པ་ན་ལུས་ཀྱི་གཡོན་ཕྱོགས་ཀྱི་མདུན་གྱི་རྩ་འདབ་དང་པོ་ལུག་གི་ཁྱིམ་དང་། དེ་ནས་རིམ་པ་བཞིན་གཉིས་པ་འཁྲིག་པ་དང་། གསུམ་པ་སེང་གེ་དང་། བཞི་པ་སྲང་དང་། ལྔ་པ་གཞུ་དང་། གཡོན་གྱི་རྩ་འདབ་དྲུག་པ་བུམ་པའི་ཁྱིམ་མམ་དུས་སྦྱོར་མིན་པའི་བར་རོ།། དེ་བཞིན་དུ་གཡས་ཕྱོགས་གྱི་མདུན་གྱི་རྩ་འདབ་དང་པོ་གླང་གི་ཁྱིམ་དང་། དེ་ནས་རིམ་པ་བཞིན་གཉིས་པ་ཀརྐཊ་དང་། གསུམ་པ་བུ་མོ་དང་། བཞི་པ་སྡིག་པ་དང་། ལྔ་པ་ཆུ་སྲིན་དང་། གཡས་ཀྱི་རྒྱབ་ཕྱོགས་ཀྱི་རྩ་འདབ་དྲུག་པ་ཉའི་ཁྱིམ་མམ་དུས་སྦྱོར་ཡིན་པའི་བར་དུ་ཡིན་ནོ།།

དེ་ལྟར་ཤེས་པར་བྱས་ནས་དེ་རྣམས་ལ་རླུང་རྒྱུ་བའི་ཚུལ་ནི། བཙས་མ་ཐག་གི་ཚེ་དབུ་མ་ནས་རླུང་ང་དྲུག་རྐང་བཅས་རྒྱུས་པའི་རྗེས་སུ་གཡོན་གྱི་རྩ་འདབ་དང་པོ་ལུག་གི་ཁྱིམ་ལ་ནམ་མཁའི་རླུང་དབུགས་འབྱུང་འཇུག་ཁུག་པ་རེ་ལ་གྲངས་རེ་རེར་བྱས་པའི་དབུགས་ང་དྲུག་རྐང་བཅས་ཀྱིས་དམན་པའི་སྟོང་བརྒྱད་བརྒྱ་རྒྱུ་ཞིང་། དེ་ནས་ཡེ་ཤེས་ཀྱི་རླུང་ང་དྲུག་རྐང་བཅས་གཡོན་གྱི་རྩ་འདབ་དང་པོ་ལུག་ཁྱིམ་གྱི་རྩ་འདབ་ནས་གཡས་ཀྱི་རྩ་འདབ་དང་པོ་གླང་ཁྱིམ་གྱི་རྩ་འདབ་ཏུ་འཕོ་བའི་འཕོ་འཚམས་སུ་དབུ་མ་ནས་རྒྱུའོ།། དེའི་རྗེས་སུ་གཡས་ཀྱི་རྩ་འདབ་དང་པོ་གླང་ཁྱིམ་གྱི་རྩ་འདབ་ནས་དབུགས་ང་དྲུག་རྐང་བཅས་ཀྱིས་དམན་པའི་སྟོང་བརྒྱད་བརྒྱ་རྒྱུ་ཞིང་། དཔེ་དེ་ཇི་ལྟ་བ་དེ་བཞིན་དུ་ཁྱིམ་གྱི་རྩ་འདབ་རྣམས་གྱི་འཕོ་འཚམས་རྣམས་སུ་ཡེ་ཤེས་ཀྱི་རླུང་ང་དྲུག་རྐང་བཅས་རེ་དབུ་མ་ནས་རྒྱུ་བ་དང་། གཡས་ཀྱི་རྩ་འདབ་དང་པོ་གླང་ཁྱིམ་ནས་ས་རླུང་རྒྱུ་བའི་རྗེས་སུ་གཡོན་གྱི་གཉིས་པ་ནས་རླུང་གི་རླུང་དང་། དེའི་རྗེས་སུ་གཡས་ཀྱི་གཉིས་པ་ནས་ཆུའི་རླུང་དང་དེ་ནས་གཡོན་གྱི་གསུམ་པ་ནས་མེའི་རླུང་དང་། དེ་ནས་གཡས་ཀྱི་གསུམ་པ་ནས་ཀྱང་མེའི་རླུང་དང་། དེ་ནས་གཡོན་ཀྱི་བཞི་པ་ནས་ཆུའི་རླུང་དང་། དེ་ནས་གཡས་ཀྱི་བཞི་པ་ནས་རླུང་གི་རླུང་དང་། དེ་ནས་གཡོན་གྱི་ལྔ་པ་ནས་སའི་རླུང་དང་། དེ་ནས་གཡས་ཀྱི་ལྔ་པ་ནས་ནམ་མཁའི་རླུང་དང་། དེ་ནས་གཡོན་གྱི་དྲུག་པ་ནས་ཀྱང་ནམ་མཁའི་རླུང་དང་། དེ་ནས་གཡས་ཀྱི་དྲུག་པ་ཉའི་ཁྱིམ་གྱི་རྩ་འདབ་ནས་སའི་རླུང་སྟོང་བརྒྱད་བརྒྱ་ལས་ང་དྲུག་རྐང་བཅས་ཀྱིས་དམན་པ་རྒྱུའོ།།

དེ་ལྟར་ན་ཁྱིམ་བཅུ་གཉིས་ཀྱི་རྩ་འདབ་འཕོ་ཆེན་བཅུ་གཉིས་ཀྱི་རྩ་རེ་རེ་ལ་ནམ་མཁའི་རླུང་ལ་སོགས་པ་དཀྱིལ་འཁོར་ལྔའི་རླུང་སྟོང་བརྒྱད་བརྒྱ་ང་དྲུག་རྐང་བཅས་ཀྱིས་དམན་པ་སྟོང་བདུན་བརྒྱ་དང་ཞེས་གསུམ་རྐང་པ་གསུམ་དང་བཅས་པ་རྒྱུན་རེ་ལ་རྒྱུ་ཞིང་འཕོ་འཚམས་བཅུ་གཉིས་སུ་ང་དྲུག་རྐང་བཅས་རེ་དབུ་མ་ནས་རྒྱུས་པས་རླུང་དྲུག་བརྒྱ་དང་དོན་ལྔ་རེ་ཉིན་ཞག་རེ་ལ་དབུ་མ་ནས་རྒྱུའོ།། འཕོ་ཆེན་བཅུ་གཉིས་པོ་རེ་རེ་ལ་སྟོང་བདུན་བརྒྱ་དང་ཞེ་གསུམ་རྐང་པ་གསུམ་དང་བཅས་པ་རྣམས་རྒྱུས་པ་བསྡོམས་པས་ཉི་ཁྲི་དགུ་བརྒྱ་ཉེར་ལྔ་འོང་བ་འཕོ་འཚམས་སུ་དབུ་མར་རྒྱུས་པའི་དྲུག་བརྒྱ་དོན་ལྔ་པོ་དང་བསྲེས་པས་དབུགས་ཉི་ཁྲི་ཆིག་སྟོང་དྲུག་བརྒྱ་འོང་སྟེ། ལྟེ་བའི་འཕོ་ཆེན་བཅུ་གཉིས་ཀྱི་ཉིན་ཞག་གཅིག་གི་རླུང་གི་རྒྱུ་ཚུལ་ལོ། དེ་ནས་ཉིན་ཞག་གཉིས་པའི་ཐོག་མར་གཡོན་གྱི་རྩ་འདབ་དང་པོ་ལུག་གི་འཕོ་བའི་རྩ་ལ་རླུང་གི་རླུང་དང་། དེ་ནས་གཡས་ཀྱི་རྩ་འདབ་དང་པོ་གླང་གི་འཕོ་བའི་རྩ་ལ་ཆུའི་རླུང་དང་། དེ་བཞིན་དུ་གཡོན་གྱི་གཉིས་པ་ནས་དྲུག་པའི་བར་ལ་རིམ་པ་བཞིན་མེའི་རླུང་། ཆུའི་རླུང་། སའི་རླུང་། ནམ་མཁའི་རླུང་། རླུང་གི་རླུང་རྒྱུ་བ་དང་།་དེ་བཞིན་དུ་གཡས་ཀྱི་འང་གཉིས་པ་ནས་དྲུག་པའི་བར་ལ་རིམ་པ་བཞིན་མེའི་རླུང་། རླུང་གི་རླུང་། ནམ་མཁའི་རླུང་། སའི་རླུང་། ཆུའི་རླུང་རྒྱུ་སྟེ་ཉིན་ཞག་གཉིས་པའི་རླུང་གི་རྒྱུ་ཚུལ་ལོ།།

དེ་ནས་ཉིན་ཞག་གསུམ་པའི་ཐོག་མར་གཡོན་གྱི་རྩ་འདབ་དང་པོ་ལ་མེའི་རླུང་། དེ་བཞིན་དུ་གཉིས་པ་ནས་དྲུག་པའི་བར་ལ་རིམ་པ་བཞིན་ཆུའི་རླུང་། སའི་རླུང་། ནམ་མཁའི་རླུང་། རླུང་གི་རླུང་། མེའི་རླུང་རྒྱུ་བ་དང་། གཡོན་གྱི་རྩ་འདབ་དང་པོ་ལ་མེའི་རླུང་རྒྱུས་པའི་རྗེས་སུ་གཡས་ཀྱི་རྩ་འདབ་དང་པོ་ལ་མེའི་རླུང་། གཉིས་པ་ལ་རླུང་གི་རླུང་། གསུམ་པ་ལ་ནམ་མཁའི་རླུང་། བཞི་པ་ལ་སའི་རླུང་། ལྔ་པ་ལ་ཆུའི་རླུང་། དྲུག་པ་ལ་མེའི་རླུང་རྒྱུ་བ་སྟེ་ཉིན་ཞག་གསུམ་པའི་རླུང་གི་རྒྱུ་ཚུལ་ལོ།།

དེ་ནས་ཉིན་ཞག་བཞི་པའི་ཐོག་མར་གཡོན་གྱི་རྩ་འདབ་དང་པོ་ལ་ཆུའི་རླུང་།་དེའི་རྗེས་སུ་གཡས་ཀྱི་རྩ་འདབ་དང་པོ་ལ་རླུང་གི་རླུང་། དེ་བཞིན་དུ་གཡོན་གྱི་རྩ་འདབ་གཉིས་པ་ལ་སའི་རླུང་། གསུམ་པ་ལ་ནམ་མཁའི་རླུང་། བཞི་པ་ལ་རླུང་གི་རླུང་།་ལྔ་པ་ལ་མེའི་རླུང་། དྲུག་པ་ལ་ཆུའི་རླུང་རྒྱུ་བ་དང་། དེ་བཞིན་དུ་གཡས་ཀྱི་འང་གཉིས་པ་ལ་ནམ་མཁའི་རླུང་། གསུམ་པ་ལ་སའི་རླུང་། བཞི་པ་ལ་ཆུའི་རླུང་། ལྔ་པ་ལ་མེའི་རླུང་། དྲུག་པ་ལ་རླུང་གི་རླུང་རྒྱུ་བ་སྟེ་ཉིན་ཞག་བཞི་པའི་རླུང་གི་རྒྱུ་ཚུལ་ལོ།།

དེ་ནས་ཉིན་ཞག་ལྔ་པའི་ཐོག་མར་གཡོན་གྱི་རྩ་འདབ་དང་པོ་ལ་སའི་རླུང་།་དེའི་རྗེས་སུ་གཡས་ཀྱི་རྩ་འདབ་དང་པོ་ལ་ནམ་མཁའི་རླུང་། དེ་བཞིན་དུ་གཡོན་གྱི་རྩ་འདབ་གཉིས་པ་ལ་ནམ་མཁའི་རླུང་། གསུམ་པ་ལ་རླུང་གི་རླུང་། བཞི་པ་ལ་མེའི་རླུང་། ལྔ་པ་ལ་ཆུའི་རླུང་། དྲུག་པ་ལ་སའི་རླུང་རྒྱུ་བ་དང་། དེ་བཞིན་དུ་གཡས་ཀྱི་རྩ་འདབ་གཉིས་པ་ལ་སའི་རླུང་། གསུམ་པ་ལ་ཆུའི་རླུང་། བཞི་པ་ལ་མེའི་རླུང་། ལྔ་པ་ལ་རླུང་གི་རླུང་། དྲུག་པ་ལ་ནམ་མཁའི་རླུང་རྒྱུ་བ་སྟེ། ཉིན་ཞག་ལྔ་པའི་རླུང་གི་རྒྱུ་ཚུལ་ལོ། །དེ་ནས་ཡང་ཉིན་ཞག་དྲུག་པའི་ཐོག་མར་གཡོན་གྱི་རྩ་འདབ་དང་པོ་ལ་ནམ་མཁའི་རླུང་རྒྱུ་བ་དང་། གཡས་ཀྱི་འང་རྩ་འདབ་དང་པོ་ལ་སའི་རླུང་རྒྱུ་བ་སོགས་ཉིན་ཞག་ལྔ་ལྔ་ལ་སྔ་འཁོར་བཞིན་དུ་འཁོར་ནས་རྒྱུ་བ་ཡིན་ཏེ། ནང་ལེའི་རེ་ལྔ་པའི་འགྲེལ་ཆེན་ལས། ལུག་ལ་སོག་པའི་མི་མཉམ་པའི་འདབ་མ་དྲུག་པོ་རྣམས་ལ་སྟོང་པའི་དཀྱིལ་འཁོར་རབ་ཏུ་འབབ་པ་སྲོག་གི་རླུང་གིས་འདོར་རོ། །གཡས་པ་ལ་རྒྱུ་བའི་ཉིན་ཞག་དྲུག་དང་། འཕོ་བའི་ཉིན་ཞག་དྲུག་རྣམས་ཀྱིས་གླང་ལ་སོགས་པའི་མཉམ་པའི་དུས་སྤྱོད་དྲུག་པོ་རྣམས་ལ་སའི་དཀྱིལ་འཁོར་གྱི་རབ་ཏུ་འབབ་པ་སྲོག་གིས་འདོར་རོ།། ཞེས་སོགས་ཀྱིས་རྩ་འདབ་བཅུ་གཉིས་པོ་རེ་རེ་ལ་ཡང་ནམ་མཁའི་རླུང་སོགས་དཀྱིལ་འཁོར་ལྔ་ཆར་གྱི་རླུང་རྒྱུ་བ་ཡོད་པར་གསུངས་ཤིང་། དེ་ཡང་རྩ་འདབ་རེ་རེ་ལ་དཀྱིལ་འཁོར་ལྔ་ཆར་གྱི་རྒྱུ་ཚུལ་སྔར་བཤད་པ་ལྟར་བྱེད་དགོས་པའི་ཕྱིར་དང་། གཡོན་གྱི་རྩ་འདབ་དང་པོ་ལ་ནམ་མཁའི་རླུང་རྒྱུས་པ་ནས་གཡོན་པའི་རྩ་འདབ་དྲུག་པ་ལ་ཡང་ནམ་མཁའི་རླུང་རྒྱུས་པའི་རྗེས་སུ། སླར་ཡང་གཡོན་པའི་རྩ་ལ་རླུང་རྒྱུ་བ་ན་རྩ་འདབ་དང་པོ་ལ་རྒྱུ་བ་དང་། རླུང་ཡང་ནམ་མཁའི་རླུང་གི་རྗེས་སུ་རླུང་གི་རླུང་རྒྱུ་བར་བྱེད་དགོས་པའི་ཕྱིར་རོ།། དེ་ལྟར་ན་གཡོན་དང་གཡས་ཀྱི་འཕོ་ཆེན་གྱི་རླུང་རྒྱུ་བའི་ཚེ་གོང་དུ་བཤད་པ་བཞིན་ཕན་ཚུན་སྤེལ་ནས་རྒྱུ་བ་ཡིན་ནོ།།

ཁྱིམ་གྱི་རྩ་རེ་རེར་རླུང་རྒྱུ་བའི་ཚེ་ནའང་རྩ་སྦུབས་ལ་ཕྱོགས་བཞི་དབུས་དང་ཆ་ལྔར་ཕྱེ་བའི་དབུས་མར་འབྱུང་བ་ཆུང་བའི་ནམ་མཁའི་དཀྱིལ་འཁོར་དང་། ཤར་དུ་རླུང་གི་དང་། ལྷོར་མེའི་དང་། བྱང་དུ་ཆུའི་དང་། ནུབ་ཏུ་སའི་དཀྱིལ་འཁོར་འབབ་སྟེ་རེ་རེ་ལ་དབུགས་སུམ་བརྒྱ་དྲུག་ཅུའི་སྟེང་ནས་བཅུ་གཅིག་རྐང་བཅས་རེས་དམན་པ་ཡོད་དོ།། འབྱུང་བ་ཆུང་བའི་དཀྱིལ་འཁོར་ནི་ཉེར་ལྔ་ཡོད་དོ།།

ནམ་མཁའི་ནམ་མཁའ། ནམ་མཁའི་རླུང་། ནམ་མཁའི་མེ། ནམ་མཁའི་ཆུ། ནམ་མཁའི་སའི་དཀྱིལ་འཁོར་དང་། དེ་བཞིན་དུ་རླུང་གི་ནམ་མཁའ། རླུང་གི་རླུང་། རླུང་གི་མེ། རླུང་གི་ཆུ། རླུག་གི་སའི་དཀྱིལ་འཁོར་དང་། དེ་བཞིན་དུ་མེའི་ནམ་མཁའ་ནས་མེའི་སའི་བར་ལྔ་དང་། ཆུའི་ནམ་མཁའ་ནས་ཆུའི་སའི་བར་ལྔ་དང་། སའི་ནམ་མཁའ་ནས་སའི་སའི་དཀྱིལ་འཁོར་གྱི་བར་ལྔ་སྟེ་ཉེར་ལྔའོ།།

དེ་ཡང་འབྱུང་བ་ཆུང་བའི་དཀྱིལ་འཁོར་ལྔ་རྒྱུ་བའི་ཚུལ་ནི་འཕོ་ཆེན་གྱི་རྩ་འདབ་བཅུ་གཉིས་པོ་གང་དང་གང་ལ་འབྱུང་བ་ཆེ་བའི་རླུང་གང་རྒྱུ་བ་དེ་ལ་འབྱུང་བ་ཆུང་བ་ལྔར་ཕྱེ་བ་རྣམས་རྒྱུ་བ་སྟེ། དེ་ལྟར་རྒྱུ་བ་ཡང་ལྔ་པོ་རིམ་ཅན་ཁོ་ནར་རྒྱུའོ།། དེ་ཡང་དཔེར་མཚོན་ན་གཡོན་གྱི་རྩ་འདབ་དང་པོ་ལ་འབྱུང་བ་ཆེ་བའི་ནམ་མཁའི་དཀྱིལ་འཁོར་རྒྱུ་བའི་ཚེ་ནམ་མཁའི་ནམ་མཁའ་ནས་ནམ་མཁའི་སའི་བར་ལྔ་རྒྱུ་བ་དང་། གཡས་ཀྱི་རྩ་འདབ་དང་པོ་ལ་འབྱུང་བ་ཆེ་བའི་སའི་དཀྱིལ་འཁོར་རྒྱུ་བའི་ཚེ་སའི་ས་ནས་སའི་ནམ་མཁའི་བར་ལྔ་རྒྱུ་བ་ལྟ་བུ་ཡིན་ནོ།། དེ་རྣམས་བྱང་རིམ་ཅན་དུ་རྒྱུ་ཚུལ་ནི་གཡོན་གྱི་རྩ་འདབ་རྣམས་ལ་རྒྱུ་བའི་ཚེ་འབྱུང་བ་ཆུང་བ་རྣམས་ཀྱང་ནམ་མཁའ་རླུང་མེ་ཆུ་སའི་རིམ་པས་རྒྱུ་བ་དང་། དེ་བཞིན་དུ་གཡས་ཀྱི་རྩ་འདབ་རྣམས་ལ་རླུང་རྒྱུ་བའི་ཚེ་ས་ཆུ་མེ་རླུང་ནམ་མཁའི་རིམ་པས་རྒྱུའོ།།

དེ་ལྟར་ན་འཕོ་ཆེན་གྱི་རྩ་འདབ་གཡོན་ནས་གཡས་སུ་རླུང་འཕོ་བའི་ཚེ་འབྱུང་ཆུང་གི་ས་ནས་སར་འཕོ་བ་དང་། གཡས་ནས་གཡོན་དུ་འཕོ་བའི་ཚེ་འབྱུང་ཆུང་གི་ནམ་མཁའ་ནས་ནམ་མཁར་འཕོ་བ་ནི་ངེས་པ་ཅན་ཡིན་ནོ།། ཡང་འཕོ་ཆེན་གྱི་རྩ་འདབ་བཅུ་གཉིས་པོ་རེ་རེ་ལ་འཕོ་ཆུང་གི་རྩ་འདབ་ལྔ་ལྔར་གྱིས་པའི་རྩ་འདབ་རྣམས་ལ་རླུང་རྒྱུ་ཚུལ་ནི་འཕོ་ཆེན་གྱི་རྩ་སྦུབས་རྣམས་ལ་ཤར་ནུབ་སོགས་ཆ་ལྔ་ལྔར་ཕྱེ་བའི་ཆ་རྣམས་སུ་འབྱུང་ཆུང་གི་ནམ་མཁའ་རླུང་མེ་ཆུ་ས་རྒྱུས་པ་རྣམས་འཕོ་ཆུང་གི་རྩ་འདབ་ལྔ་ཤར་ནུབ་ལྷོ་བྱང་དབུས་མ་དང་བཅས་པར་གནས་པ་རྣམས་སུ་ཡང་ཤར་ནུབ་སོགས་འཕོ་ཆེན་གྱི་ཇི་ལྟ་བ་བཞིན་རྒྱུ་ཞིང་འཕོ་ཆུང་གི་རྩ་འདབ་རེ་རེར་ཡང་དབུགས་སུམ་བརྒྱ་དྲུག་ཅུ་ལ་བཅུ་གཅིག་རྐང་བཅས་ཀྱིས་དམན་པ་སུམ་བརྒྱ་ཞེ་བརྒྱད་རྐང་པ་གསུམ་དང་བཅས་པ་རེ་རྒྱུའོ།།

དེ་ལྟར་ལྟེ་བའི་རྩ་འདབ་རྣམས་ལ་རྒྱུས་ཏེ་དེ་ནས་སྙིང་གའི་རྩ་འདབ་རྣམས་ལ་རྒྱུ་བའི་ཚུལ་ནི་ནང་ལེའི་ཞེ་གཅིག་པའི་འགྲེལ་ཆེན་ལས། སྙིང་གའི་ཆུ་སྐྱེས་རྩིབས་བརྒྱད་པ་འདི་ལ་ཐུན་ཚོད་འཕོ་བའི་རྩ་རྣམས་རིག་པར་བྱ་སྟེ་སྣའི་བུག་པར་དཀྱིལ་འཁོར་ལྔ་འབབ་པར་བྱེད་པ་ནི་འདི་རྣམས་སུ་འགྱུར་རོ།། རྩ་དང་རྩ་ཡི་དབུགས་འབྱུང་པ་དང་འཇུག་པ་བརྒྱ་ཕྲག་ཉི་ཤུ་རྩ་བདུན་གྱིས་སྲོག་ཡང་དག་པར་རྒྱུ་བར་འགྱུར་ཏེ་དབྱུག་གུ་ཕྱེད་དང་བཅས་པའི་བདུན་གྱིས་སོ།། ཞེས་སྙིང་གའི་རྩ་འདབ་རེ་རེ་ལ་དབུགས་ཉི་ཁྲི་ཆིག་སྟོང་དྲུག་བརྒྱ་ལ་བརྒྱད་ཀྱིས་བགོས་པའི་རྙེད་ནོར་དབུགས་ཉིས་སྟོང་བདུན་བརྒྱ་དང་། དེ་ཆུ་ཚོད་དུ་བྱས་ན་ཆུ་ཚོད་ཕྱེད་དང་བརྒྱད་རྒྱུ་བར་གསུངས་པ་ནི་ཉིན་ཞག་རེ་ལ་དབུགས་དྲུག་བརྒྱ་དོན་ལྔ་རེ་དབུ་མ་ལ་རྒྱུས་པ་ལོགས་སུ་མ་ཕྱེ་བའི་དབང་དུ་བྱས་པ་ཡིན་ལ། གནས་ཚོད་ལ་ནི་ལྟེ་བའི་འཕོ་ཆེན་བཅུ་གཉིས་ཀྱི་འཕོ་འཚམས་ནས་དབུགས་ང་དྲུག་རྐང་བཅས་རེ་དབུ་མ་ནས་རྒྱུ་བར་བཤད་པ་དེ་དག་ནི་ལྟེ་བའི་རྩ་འཁོར་གྱི་དབུ་མ་ནས་དབུ་མའི་ཡར་སྣའི་བར་དབུ་མ་ཉིད་ནས་རྒྱུ་བས་སྙིང་ག་དང་མགྲིན་པ་དང་དཔྲལ་བའི་རྩ་འདབ་རྣམས་ལ་མི་རྒྱུ་བར་ངེས་པ་ཡིན་ནོ།།

དེ་ལྟར་ན་དབུགས་ཁྲི་ཆིག་སྟོང་དྲུག་བརྒྱ་ལ་དྲུག་བརྒྱ་དང་དོན་ལྔས་དམན་པའི་ལྷག་ཉི་ཁྲི་དགུ་བརྒྱ་དང་ཉེར་ལྔ་ལ་བརྒྱད་ཀྱིས་བགོས་པའི་ཐོབ་ནོར་དབུགས་ཉིས་སྟོང་དྲུག་བརྒྱ་དང་བཅོ་ལྔ་དབུགས་ཀྱི་བརྒྱད་ཆ་ལྔ་རེ་རྣམས་སྙིང་གའི་རྩ་འདབ་རེ་རེ་ལ་ཉིན་ཞག་རེ་ལ་རྒྱུ་བ་ཡིན་ནོ།།

དེ་ཡང་རྒྱུན་རེ་ལ་རྒྱུ་བ་ནི་མ་ཡིན་ཏེ། རྒྱུན་རེ་ལ་རྒྱུ་བའི་དབང་དུ་བྱས་ན་ལྟེ་བའི་འཕོ་ཆེན་གྱི་རྩ་འདབ་རེ་ལ་རྒྱུན་ཇི་ཙམ་ཞིག་རྒྱུས་པ་དེ་ཉིད་སྙིང་ག་དང་མགྲིན་པ་དང་དཔྲལ་བའི་རྩ་འདབ་རེ་རེ་ལ་ཡང་རྒྱུན་རེ་ལ་རྒྱུ་དགོས་ཏེ། ལྟེ་བའི་གཡོན་གྱི་འཕོ་ཆེན་གྱི་རྩ་འདབ་གཅིག་ལ་དབུགས་སྟོང་བརྒྱད་བརྒྱ་ལ་ང་དྲུག་རྐང་བཅས་ཀྱིས་དམན་པ་རྒྱུས་པ་དེ་ཉིད་སྣ་བུག་གིའང་སྣ་གཡོན་པ་ལ་རྒྱུས་ཏེ་དེ་ནས་ལྟེ་བའི་རྩ་འདབ་གཡས་ལ་འཕོས་ནས་གཡས་ཀྱི་རྩ་འདབ་གཅིག་ནས་དབུགས་སྟོང་བརྒྱད་བརྒྱ་ལ་ང་དྲུག་རྐང་བཅས་ཀྱིས་དམན་པ་རྒྱུ་བ་དང་དུས་མཉམ་དུ་སྣ་བུག་གི་རྒྱུ་བ་ཡང་གཡོན་ནས་གཡས་སུ་འཕོས་ཏེ་གྲངས་དེ་དང་མཚུངས་པ་དེ་རྒྱུ་བ་ཡིན་ལ། དེ་བཞིན་དུ་སྙིང་ག་མགྲིན་པ་དཔྲལ་བ་རྣམས་ཀྱི་རྩ་འདབ་གཡོན་དང་གཡས་ལ་ཡང་དབུགས་རྒྱུ་ཐེངས་རེ་ལ་ལྟེ་བའི་འཕོ་ཆེན་རེ་དང་སྣ་བུག་ལ་རྒྱུན་རེ་ལ་ཇི་ཙམ་རེ་རྒྱུ་བ་མཉམ་པར་བྱ་དགོས་པས་སོ།།

དེ་ལྟར་ན་ལྟེ་བའི་གཡོན་གྱི་རྩ་འདབ་དང་པོ་ལ་རླུང་ཐོག་མར་རྒྱུ་བ་དང་དུས་མཉམ་དུ་སྙིང་གའི་གཡོན་གྱི་རྩ་འདབ་དང་པོ་ལ་ཐོག་མར་རླུང་རྒྱུ་བའི་དབང་དུ་བྱས་ན་སྙིང་གའི་གཡོན་གྱི་རྩ་འདབ་དང་པོ་ལ་དབུགས་སྟོང་བརྒྱད་བརྒྱ་པ་ཚན་པ་གཅིག་རྒྱུས། དེའི་རྗེས་སུ་གཡས་ཀྱི་རྩ་འདབ་དང་པོ་ལ་སྟོང་བརྒྱད་བརྒྱ་པ་ཚན་པ་གཅིག་རྒྱུས། དེ་ནས་ཡང་གཡོན་གྱི་རྩ་འདབ་དང་པོ་དེ་ཉིད་ལ་དགུ་བརྒྱ་རྒྱུས། དེའི་རྗེས་སུ་ཡང་གཡོན་གྱི་རྩ་འདབ་གཉིས་པ་ལ་དགུ་བརྒྱ་རྒྱུས་ཏེ། དེའི་རྗེས་སུ་གཡས་ཀྱི་རྩ་འདབ་དང་པོ་དེ་ཉིད་ལ་དགུ་བརྒྱ་རྒྱུས། དེའི་རྗེས་སུ་གཡས་ཀྱི་རྩ་འདབ་གཉིས་པ་ལ་དགུ་བརྒྱ་རྒྱུས། དེའི་རྗེས་སུ་གཡོན་གྱི་རྩ་འདབ་གཉིས་ པ་ལ་སྟོང་བརྒྱད་བརྒྱ་རྒྱུས། ཡང་དེའི་རྗེས་སུ་གཡས་ཀྱི་རྩ་འདབ་གཉིས་པ་དེ་ཉིད་ལ་ཡང་སྟོང་བརྒྱད་བརྒྱ་རྒྱུས། དེ་བཞིན་དུ་གཞན་རྣམས་ལ་རིགས་པས་བསྒྲེ་ཞིང་། དེ་དག་ཀྱང་དབུ་མ་ལ་རྒྱུ་བ་ལོགས་སུ་མ་ཕྱེ་བའི་དབང་དུ་བྱས་པ་སྟེ། དེ་ལྟར་ན་སྙིང་གའི་རྩ་འདབ་རེ་ལ་དབུགས་ཉིས་སྟོང་བདུན་བརྒྱ་རེའི་རྒྱུ་ཚུལ་དེ་ལྟར་དུ་ཤེས་པར་བྱ་ཞིང་། མགྲིན་པའི་རྩ་འཁོར་རྩ་འདབ་སོ་གཉིས་ཡོད་པའི་བཞི་སྟོང་པའི་རྩ་ཡིན་པས་རླུང་མི་རྒྱུ་ཞིང་ཉེར་བརྒྱད་ལ་རྒྱུ་བའི་ཚུལ་ཡང་འདི་ཉིད་ཀྱི་འགྲེལ་ཆེན་ལས། འདབ་མ་ཉི་ཤུ་རྩ་བརྒྱད་པོ་རྣམས་ལ་ཉིན་མཚན་གྱི་སྲོག་ཡང་དག་པར་རྒྱུ་སྟེ། དབྱུག་གུ་དྲུག་ཅུ་ལ་ཆ་ཡིས་ཐོབ་པ་ནི་འདབ་མ་སོ་སོ་ལ་སྲོག་ཡང་དག་པར་རྒྱུ་བའོ།།

ཞེས་ཆུ་ཚོད་དྲུག་ཅུའམ་དབུགས་ཉི་ཁྲི་ཆིག་སྟོང་དྲུག་བརྒྱ་ལ་རླུང་རྒྱུ་བའི་རྩ་འདབ་ཀྱི་གྲངས་ཉེར་བརྒྱད་ཀྱིས་ཐོབ་པའི་ནོར་དབུགས་བདུན་བརྒྱ་དང་དོན་གཅིག་དབུགས་ཀྱི་བདུན་ཆ་གསུམ་འོང་བ་དེ་མགྲིན་པའི་རྩ་འདབ་རེ་ལ་ཉིན་ཞག་རེ་རེ་དབུགས་སམ་རླུང་རྒྱུ་བའི་གྲངས་དང་། དེ་བཞིན་དུ་འདི་ཉིད་ཀྱི་འགྲེལ་ཆེན་ལས། དཔྲལ་བའི་པདྨ་འདབ་མ་བཅུ་དྲུག་པ་ལ་འདབ་མ་གཉིས་དོར་ནས་འདབ་མ་བཅུ་བཞི་པོ་རྣམས་ལ་ཉིན་མཚན་གྱི་སྲོག་ཡང་དག་པར་རྒྱུ་སྟེ་དབྱུག་གུ་དྲུག་ཅུ་ལས་བཅུ་བཞིའི་ཆ་ཐོབ་པ་འདབ་མ་སོ་སོར་འདོར་རོ།། ཞེས་ཆུ་ཚོད་དྲུག་ཅུའི་དབུགས་ཀྱི་གྲངས་ཉི་ཁྲི་ཆིག་སྟོང་དྲུག་བརྒྱ་ལ་དཔྲལ་བའི་རྩ་འདབ་བཅུ་དྲུག་གི་སྟོང་པའི་རྩ་འདབ་གཉིས་མ་གཏོགས་པའི་རླུང་རྒྱུ་བའི་རྩ་འདབ་བཅུ་བཞིས་བགོས་པའི་སྟོང་ལྔ་བརྒྱ་དང་ཞེ་གཉིས། དབུགས་ཀྱི་བདུན་ཆ་དྲུག་རྣམས་ཐོབ་པ་དེ་དཔྲལ་བའི་རྩ་འདབ་རེ་ལ་ཞག་རེའི་རླུང་རྒྱུ་བའི་གྲངས་སོ།། དེ་དག་ཀྱང་དབུ་མ་ལ་རྒྱུ་བའི་རླུང་ལོགས་སུ་མ་ཕྱེ་བའི་དབང་དུ་བྱས་པ་ཡིན་གྱི། ལོགས་སུ་ཕྱེ་བ་གནས་ཚོད་ཀྱི་དབང་དུ་བྱས་ན་ཞག་རེ་ལ་དབུ་མར་རྒྱུ་བའི་གྲངས་དྲུག་བརྒྱ་དོན་ལྔས་དབུགས་ཉི་ཁྲི་ཆིག་སྟོང་དྲུག་བརྒྱ་ལ་དམན་པའི་ལྷག་ཁྲི་དགུ་བརྒྱ་ཉེར་ལྔ་ལ་བགོ་བ་སོགས་གོང་གི་རིགས་པས་ཤེས་པར་བྱའོ།།

༈ གཉིས་པ་སྣ་བུག་ལ་རླུང་གི་རྒྱུ་ཚུལ་བཤད་པ་ནི། མའི་མངལ་ནས་བཙས་མ་ཐག་གི་ཚེ་དབུ་མ་ནས་རྒྱུས་པའི་རླུང་ང་དྲུག་རྐང་བཅས་སྣ་བུག་གཉིས་ཀ་ལ་མཉམ་རྒྱུ་བྱས་ཏེ་དེ་ནས་ལྟེ་བའི་གཡོན་གྱི་འཕོ་ཆེན་དེ་ལ་རླུང་གི་གྲངས་ཇི་ཙམ་རྒྱུས་པ་དེ་ཉིད་སྣ་བུག་གཡོན་ཁོ་ན་ལ་རྒྱུ་བ་དང་། རྩ་འདབ་གཡས་གཡོན་གྱི་འཕོ་འཚམས་སུ་དབུ་མ་ལ་རྒྱུས་པའི་གྲངས་ཇི་ཙམ་ཡོད་པ་དེ་ཉིད་སྣ་བུག་གཉིས་ཀ་ལ་མཉམ་རྒྱུ་བྱེད་པ་དང་། དེ་བཞིན་དུ་གཡས་ཀྱི་འཕོ་ཆེན་གྱི་རྩ་འདབ་རེ་ལ་རླུང་གི་གྲངས་ཇི་ཙམ་རེ་རྒྱུས་པ་དེ་ཉིད་སྣ་བུག་གཡས་ཁོ་ནར་རྒྱུ་བ་ཡིན་ནོ།། དེ་ཡང་འཕོ་ཆེན་གྱི་རླུང་རེ་རེ་ལ་འཕོ་ཆུང་གི་རླུང་འབྱུང་བ་ཆུང་བ་ལྔ་ལྔ་ཡོད་པའི་ནམ་མཁའི་རླུང་རྣམས་ནི་སྣ་བུག་གི་བུ་གའི་དབུས་ནས་རྒྱུ་བ་དང་། དེ་བཞིན་དུ་རླུང་གི་རླུང་རྣམས་བུ་གའི་སྟེང་ཕྱོགས་ངོས་ནས་རྒྱུ་བ་དང་། མེའི་རླུང་རྣམས་གཡས་གཡོན་གཉིས་ཀའི་མཁུར་ཚོས་ངོས་ནས་རྒྱུ་བ་དང་། ཆུའི་རླུང་རྣམས་ནི་སྣ་བུག་གཉིས་ཀྱི་དབུས་ཀྱི་རེ་ཁའི་ཕྱོགས་གཉིས་ནས་རྒྱུ་བ་དང་། སའི་རླུང་རྣམས་ནི་བུ་གའི་འོག་ངོས་ཡ་མཆུ་ལ་བདར་ནས་རྒྱུའོ།།

ཡང་རླུང་རྣམས་སྣ་བུག་གི་ཕྱི་དང་ནང་དུ་ཇི་ཙམ་འགྲོ་བ་ནི། སའི་དཀྱིལ་འཁོར་གྱི་རླུང་སྣ་བུག་གི་ཕྱི་རོལ་དུ་སོར་བཅུ་གཉིས་ཀྱི་བར་དུ་འགྲོ་བ་ནས། ཆུའི་དཀྱིལ་འཁོར་སོར་བཅུ་གསུམ་དང་། མེའི་དཀྱིལ་འཁོར་སོར་བཅུ་བཞི་དང་། རླུང་གི་དཀྱིལ་འཁོར་སོར་བཅོ་ལྔ་དང་། ནམ་མཁའི་དཀྱིལ་འཁོར་སོར་བཅུ་དྲུག་གི་བར་དུ་འགྲོ་ཞིང་། དེ་ནས་ལྡོག་གོ། ནང་དུ་ནི་ཕྱི་རོལ་དུ་རིང་དུ་རྒྱུས་པ་དེ་ནང་དུ་ཐུང་ངུ་དང་ཕྱི་རོལ་དུ་ཐུང་ངུ་རྒྱུས་པ་དེ་ནང་དུ་རིང་བས་རྒྱུ་བས་ནམ་མཁའི་དཀྱིལ་འཁོར་ལྟེ་བའི་དབུས་དང་། རླུང་གི་དཀྱིལ་འཁོར་ལྟེ་བ་ནས་སོར་གཅིག་གི་འོག་དང་། མེའི་དཀྱིལ་འཁོར་ལྟེ་བ་ནས་སོར་གཉིས་ཀྱི་འོག་དང་། དེ་བཞིན་དུ་མེའི་དཀྱིལ་འཁོར་སོར་གསུམ་གྱི་འོག་དང་། སའི་དཀྱིལ་འཁོར་སོར་བཞིའི་འོག་ཏུ་ཕྱིན་ནས་ཡང་ཕྱིར་འགྲོའོ། །རླུང་ལྔ་ཆར་ཡང་ལྟེ་བའི་དབུས་བར་དུ་འགྲོ་དགོས་ཏེ། རླུང་ལྔ་གའི་འཕོ་འཚམས་སུ་དབུ་མར་འཇུག་པའི་ཚེ་ལྟེ་བའི་རྩ་འཁོར་གྱི་ལྟེ་བ་ནས་འཇུག་དགོས་ཤིང་། རླུང་ལྔ་པོ་གང་གི་མཇུག་ཏུ་དབུ་མར་ཞུགས་པའི་ཡེ་ཤེས་ཀྱི་རླུང་དེ་དང་དེའི་སྔོན་མའི་རླུང་ལྔ་པོ་གང་ཡིན་པ་དེ་ཕྱི་རོལ་དུ་འགྲོ་བ་དང་ནང་དུ་འགྲོ་བ་ཚད་མཉམ་པའི་ཕྱིར་ཏེ། ནང་ལེའི་ཞེ་བདུན་པའི་འགྲེལ་ཆེན་ལས། ཡེ་ཤེས་ཀྱི་དཀྱིལ་འཁོར་གྱི་རླུང་ནི་སའི་དཀྱིལ་འཁོར་གྱི་མཐར་དེ་དག་གི་དབུས་སུ་རབ་ཏུ་ཞུགས་པ་ནི་སྣ་བུག་གཉིས་ནས་སོར་བཅུ་གཉིས་འབབ་བོ། །ནམ་མཁའི་མཐར་དབུ་མར་ཞུགས་པ་ནི་སོར་བཅུ་དྲུག་འབབ་བོ། །ཞེས་གསུངས་པས་སོ།། །།

༈ གཉིས་པ་འདིར་བཤད་པའི་རྩ་རླུང་གི་རྣམ་གཞག་དང་རྒྱུད་སྡེ་གཞན་ནས་བཤད་པའི་རྣམ་གཞག་མི་མཐུན་པར་བྱུང་བའི་དགོངས་པ་དཔྱད་པ་ལ་གཉིས། རྒྱུད་སྡེ་གཞན་ནས་བྱུང་བའི་རྩ་རླུང་གི་རྣམ་གཞག་དང་རྒྱུད་འགྲེལ་འདི་ནས་བཤད་པ་གཉིས་མི་མཐུན་པའི་ཚུལ་མདོ་ཙམ་ཞིག་བཤད་པ་དང་། འདིར་བཤད་པ་དང་དེ་དག་ཏུ་བཤད་པའི་དགོངས་པ་ཇི་ལྟར་ཡིན་པ་བཤད་པའོ།།

དང་པོ་ནི། བརྟག་གཉིས་ལས། སྤྲུལ་པའི་འཁོར་ལོ་ལ་པདྨ་འདབ་མ་དྲུག་ཅུ་རྩ་བཞི་དང་། ཆོས་ཀྱི་འཁོར་ལོ་ལ་འདབ་མ་བརྒྱད་དང་། ལོངས་སྤྱོད་རྫོགས་པའི་འཁོར་ལོ་ལ་འདབ་མ་བཅུ་དྲུག་དང་། བདེ་བ་ཆེན་པོའི་འཁོར་ལོ་ལ་འདབ་མ་སུམ་ཅུ་རྩ་གཉིས་སོ།། ཞེས་གསུངས་པའི་དོན་སྒྲ་ཇི་བཞིན་པར་མཛད་དེ་མགྲིན་པའི་རྩ་འཁོར་རྩ་འདབ་བཅུ་དྲུག་དང་། སྤྱི་བོའི་རྩ་འདབ་སུམ་ཅུ་རྩ་གཉིས་པར་བཤད་ཅིང་དེ་ཡང་བདེ་ཆེན་འཁོར་ལོར་བཤད་དོ།། རྡོ་རྗེ་སྙིང་འགྲེལ་ལས་ནི་འགྲེལ་ཆེན་ལྟར་མགྲིན་པའི་རྩ་འཁོར་རྩ་འདབ་སོ་གཉིས་པ་དང་། དཔྲལ་བའི་རྩ་འཁོར་རྩ་འདབ་བཅུ་དྲུག་པར་བཤད་ནས། དེ་ཡང་རྒྱུད་ལས་དེ་གཉིས་བཟློག་ནས་གསུངས་པ་བླ་མའི་མན་ངག་གིས་སོ་གཉིས་དང་བཅུ་དྲུག་དེ་ལྟར་དུ་ཤེས་པར་བྱ་ཡི། རྒྱུད་དུ་ནི་ལུགས་ལས་བཟློག་པས་གསུངས་པས་སོ་ཞེས་བཤད་པས། བདེ་བ་ཆེན་པོའི་འཁོར་ལོ་ལ་འདབ་མ་སུམ་ཅུ་རྩ་གཉིས་སོ་ཞེས་པ་དེས་དཔྲལ་པའི་རྩ་འཁོར་བསྟན་པར་ཡང་མཛད་དོ།། དེ་ལྟར་ན་སྦས་རྒྱུད་ཀྱི་ཆེད་དུ་བྱ་བའི་གདུལ་བྱ་རྣམས་ཀྱི་བདེ་བ་ཆེན་པོའི་འཁོར་ལོ་སྤྱི་བོ་འམ་གཙུག་ཏོར་གྱི་རྩ་འཁོར་ཡིན་པ་དང་། དེ་རྩ་འདབ་སོ་གཉིས་པ་དང་། དཔྲལ་བའི་རྩ་འཁོར་རམ་སྨིན་མཚམས་ཀྱི་རྩ་འཁོར་རྩ་འདབ་བཅུ་དྲུག་པ་རླུང་གི་འཁོར་ལོ་ཞེས་བཤད་དོ།། དེ་དག་ནི་རྩའི་རྣམ་གཞག་མི་མཐུན་པའི་ཚུལ་མདོར་བསྡུས་པ་ཙམ་མོ། རླུང་གི་རྣམས་གཞག་ནི་སྲོག་འཛིན་སོགས་གྲངས་བཅུར་བྱེད་པར་ནི་འདྲ་ལ། དེ་ཡང་སྲོག་འཛིན་ཐུར་སེལ་གྱེན་རྒྱུ་མཉམ་གནས་ཁྱབ་བྱེད་དེ་རྩ་བའི་རླུང་ལྔ་གནས་གང་ན་གནས་པ་དང་མགོན་པོ་གང་གི་རླུང་གང་ཡིན་པ་ནི་བཤད་རྒྱུད་རྡོར་འཕྲེང་ལས། སྲོག་གི་རླུང་ནི་སྙིང་གར་གནས། །མི་བསྐྱོད་བྱེ་བྲག་རིགས་ལས་སྐྱེས། །འདོམས་ན་གནས་པའི་ཐུར་སེལ་ནི། །རིན་ཆེན་འབྱུང་ལྡན་བྱེ་བྲག་སྐྱེས། །སྟེང་དུ་རྒྱུ་བར་ལྐོག་མར་གནས། །འོད་དཔག་མེད་ཀྱི་རང་བཞིན་ནོ། །མཉམ་གནས་ལྟེ་བའི་པདྨར་གནས། །དོན་ཡོད་གྲུབ་པའི་རང་བཞིན་ནོ། །ཁྱབ་བྱེད་ཡན་ལག་ཀུན་ལ་གནས། །རྣམ་སྣང་མཛད་ཀྱི་ངོ་བོའོ། །ཞེས་སྲོག་འཛིན་སྙིང་གར་གནས་ཤིང་མི་བསྐྱོད་པའི་རླུང་དང་། ཐུར་སེལ་གསང་གནས་ན་གནས་ཤིང་རིན་འབྱུང་གི་རླུང་དང་། གྱེན་རྒྱུ་མགྲིན་པའི་རྩ་འཁོར་ལ་གནས་ཤིང་འོད་དཔག་མེད་ཀྱི་རླུང་དང་། མཉམ་གནས་ལྟེ་བའི་རྩ་འཁོར་ལ་གནས་ཤིང་དོན་གྲུབ་ཀྱི་རླུང་དང་། ཁྱབ་བྱེད་ཡན་ལག་གི་ཚིགས་ལ་སོགས་པའི་ཚིགས་ཀུན་ལ་གནས་ཤིང་རྣམ་སྣང་གི་རླུང་དུ་གསུངས་སོ། །

དེ་ཡང་སྲོག་འཛིན་སྙིང་གར་གནས་པར་བཤད་པ་ནི་སྲོག་འཛིན་ལ་ཕྲ་རགས་གཉིས་སུ་ཡོད་པའི་རགས་པ་ནི་གཞི་དུས་ལ་སྣ་བུག་ལ་འབྱུང་འཇུག་བྱེད་ཅིང་སྙིང་གའི་རྩ་འཁོར་ལ་གནས་ཀྱང་སྙིང་གའི་རྩ་མདུད་ཀྱི་དྷཱུ་ཏཱིའི་ནང་ན་གནས་པ་མིན་ལ། སྲོག་འཛིན་ཕྲ་བ་ནི་འོད་གསལ་གྱི་སེམས་ཤིན་ཏུ་ཕྲ་བ་དང་ངོ་བོ་དབྱེར་མེད་ཅིང་དེའི་བཞོན་པར་གྱུར་པ་མི་ཤིགས་པ་ཞེས་པ་སྙིང་གའི་རྩ་འཁོར་གྱི་ལྟེ་བ་རྩ་མདུད་ཀྱི་དྷཱུ་ཏཱིའི་ནང་ན་གནས་པ་སྟེ། བཤད་རྒྱུད་རྡོར་འཕྲེང་ལས། སྙིང་གི་པདྨའི་སྦུབས་མཁའ་ལ། ཡེ་ཤེས་རྡོ་རྗེ་རྟག་ཏུ་བཞུགས། །ཞེས་དང༌། གཙོ་བོ་ཆེན་པོ་མི་བསྐྱོད་པའི། །འཇིག་རྟེན་ཁམས་ནི་དེ་ཉིད་དོ། །དེར་ནི་རྟག་ཏུ་བཞུགས་པའི་ས། །སྲོག་གི་ཡེ་ཤེས་མིང་ཅན་ཏེ། །ཞེས་གསུངས་པ་དང་། བཤད་རྒྱུད་ལྷ་མོ་བཞིས་ཞུས་པ་ལས། ཕྱེད་ཚད་ཙམ་གྱི་ཕྲ་མོ་མཆོག །ཡིད་ཀྱི་དངོས་པོ་ཐིག་ལེའི་གཟུགས། །རྟག་ཏུ་སྙིང་གི་དབུས་གནས་པ། །འོད་ཟེར་ཆེན་པོ་འབར་བ་ཅན། །ཞེས་པ་ཡང་འོད་ཟེར་ལྔ་འབར་བའི་མི་ཤིགས་པའི་རླུང་ཤིན་ཏུ་ཕྲ་བ་ཡིན་པ་དང་། རྡོ་རྗེ་དཀྱིལ་འཁོར་རྒྱན་གྱི་རྒྱུད་ལས་ཀྱང་། སྙིང་གི་དབུས་ན་མི་ཤིགས་པ། །གསལ་ཞིང་མར་མེ་དག་དང་མཚུངས། །མི་འགྱུར་མཆོག་ཏུ་ཕྲ་བ་སྟེ། །ཨ་ནི་གཙོ་བོ་དམ་པའོ།།

ཞེས་པས་ཀྱང་མི་ཤིགས་པའི་རླུང་ཤིན་ཏུ་ཕྲ་བ་སྟོན་ཅིང་། དེ་ཁོ་ན་ཉིད་གྲུབ་པ་ལས་རླུང་གཞན་རྣམས་ཐིམ་ནས་ལྷན་ཅིག་སྐྱེས་པའི་རླུང་རང་གནས་སུ་གནས་པ་ན་དེ་ཁོ་ན་ཉིད་རྟོགས་པར་གསུངས་པའི་ལྷན་ཅིག་སྐྱེས་པའི་རླུང་ཞེས་པ་ཡང་སྲོག་འཛིན་གྱི་རླུང་ཤིན་ཏུ་ཕྲ་བ་འདི་ཡིན་ཞིང་། རླུང་ཤིན་ཏུ་ཕྲ་བ་འདི་དང་འོད་གསལ་གྱི་སེམས་ཤིན་ཏུ་ཕྲ་བ་འདི་འཁོར་བའི་ཆོས་ཐམས་ཅད་ཀྱི་གཞི་དང་། སྐུ་གཉིས་ཀྱི་ཐུན་མོང་མ་ཡིན་པའི་བསྒྲུབ་གཞི་དང་། ཁྱད་པར་དུ་ཡང་རླུང་འདི་ལོངས་སྐུའི་བསྒྲུབ་གཞི་ཐུན་མོང་མ་ཡིན་པ་སྦས་རྒྱུད་རྣམས་ཀྱི་དགོངས་པར་དེའི་ཆེད་དུ་བྱ་བའི་གདུལ་བྱ་རྣམས་ཀྱིས་འཆད་པར་བྱེད་ཅིང་། འགྲེལ་ཆེན་ལས་འོད་གསལ་གྱི་སེམས་ཉིད་འཁོར་འདས་ཐམས་ཅད་ཀྱི་གཞིར་གསུངས་པ་མ་གཏོགས་ཤིན་ཏུ་ཕྲ་བའི་རླུང་གི་བཤད་པ་ཟུར་ཙམ་ཡང་མ་བྱུང་བ་དང་། རླུང་རྣམས་ཀྱི་གནས་ཀྱི་གཙོ་བོ་ཡང་སྙིང་གའི་རྩ་འདབ་རྣམས་ཡིན་པར་བཤད་པས་ཐུར་སེལ་ནས་ཁྱབ་བྱེད་ཀྱི་བར་གྱི་རླུང་བཞིའི་གནས་ཀྱང་མི་མཐུན་པ་དང་། སྲོག་འཛིན་དང་མཉམ་གནས་མགོན་པོ་གང་གི་རླུང་ཡིན་པ་མཐུན་ནའང་། འགྲེལ་ཆེན་ལས་གྱེན་རྒྱུ་རིན་འབྱུང་དང་། ཐུར་སེལ་རྡོར་སེམས་དང་། ཁྱབ་བྱེད་སྣང་མཐར་བཤད་ཅིང་རྣམ་སྣང་གི་རླུང་དུ་མ་བཤད་པས་རླུང་གསུམ་མགོན་པོ་གང་གི་རླུང་ཡིན་པ་ཡང་མ་མཐུན་ནོ།།

གཞན་ཡང་རླུང་རྣམས་འགྲོ་འོང་བྱེད་པའི་ཚེ་སྣ་བུག་གང་ལས་རྒྱུ་བ་དང་། འབྱུང་བའི་དཀྱིལ་འཁོར་གང་གི་རླུང་གང་ཡིན་པ་དང་། རླུང་རྣམས་ཀྱི་ཁ་དོག་ཇི་ལྟར་ཡིན་པ་ནི་བཤད་རྒྱུད་རྡོར་འཕྲེང་ལས། སངས་རྒྱས་ལྔ་ཡི་རིགས་གནས་པ། །སྣ་ཡི་བུ་ག་ལས་བྱུང་ཞིང་། །རླུང་ལྔ་སྟེང་དུ་ཡང་དག་རྒྱུ། །ལུས་ལ་སྤྱོད་པར་རྟག་ཏུ་འགྱུར །ཀུན་རྫོབ་སྣར་ནི་རྒྱུ་བ་ཡི། །སྒོ་ང་ལས་ནི་རྣམ་པར་འབྱུང༌། །གཡོན་དང་གཡས་དང་གཉིས་ཀ་དང༌། །ངལ་བར་རྒྱུ་དང་རྣམ་པ་བཞི། །གཡས་པ་ནས་ནི་འབྱུང་བའི་ཁམས། །མེ་ཡི་དཀྱིལ་འཁོར་ཉིད་ཡིན་ཏེ། །ཁ་དོག་དམར་པོ་བཟང་པོ་འདི། །པདྨ་མགོན་པོའི་རྒྱུ་བའོ། །གཡོན་པ་ནས་ནི་འབྱུང་བའི་ཁམས། །རླུང་གི་དཀྱིལ་འཁོར་ལ་བརྟེན་པ། །ལྗང་སེར་དག་ཏུ་སྣང་བ་སྟེ། །ལས་ཀྱི་མགོན་པོའི་རྒྱུ་བའོ། །གཉིས་ཀ་ལས་ནི་འབྱུང་བའི་ཁམས། །གསེར་གྱི་མདོག་ཏུ་སྣང་བ་སྟེ། །དབང་ཆེན་གྱི་ནི་དཀྱིལ་འཁོར་ཉིད། །རིན་ཆེན་མགོན་པོའི་རྒྱུ་བའོ། །དལ་ཞིང་རྒྱུ་བ་མེད་པའི་ཁམས། །དག་པའི་ཤེལ་ལྟར་སྣང་བ་ནི། །འདི་ནི་ཆུ་ཡི་དཀྱིལ་འཁོར་ཏེ། །རྡོ་རྗེ་མགོན་པོའི་རྒྱུ་བའོ། །ཁམས་ཀུན་ལས་ནི་ཡང་དག་བྱུང༌། །རྟེན་དང་བརྟེན་པའི་གཟུང་བ་ནི། །རྣམ་པར་སྣང་མཛད་རང་བཞིན་ཏེ། །འཆི་བའི་མཐར་ནི་འབྱུང་བར་འགྱུར། །དཀྱིལ་འཁོར་བཞི་པོ་འདི་དག་ནི། མཉམ་པར་གཞག་པས་རྟག་ཏུ་ཟློས། །སྔགས་པའི་ཟློས་པའི་གྲངས་ཉིད་ཀྱིས། །ཉིན་མཚན་རྟག་ཏུ་ཟློས་པ་ཡིན། །ཞེས་སངས་རྒྱས་ལྔའི་རིགས་སུ་གནས་པའི་རླུང་ལྔ་སྟེང་དུ་སྣའི་བུ་ག་ལས་བྱུང་ཞིང་ཡང་དག་པར་རྒྱུའོ།།

དེ་ཡང་ཇི་ལྟར་ཀུན་རྫོབ་ཀྱི་སྣ་གཡོན་ནས་རང་དབང་དུ་རླུང་མཉམ་གནས་ཁོ་ན་རྒྱུ་ཞིང་མཉམ་གནས་ཁ་དོག་ལྗང་སེར་འབྱུང་བ་རླུང་གི་ཁམས་པ་དང་། གྱེན་རྒྱུ་ནི་རང་དབང་དུ་སྣ་བུག་གཡས་ཁོ་ན་ལ་རྒྱུ་ཞིང་ཁ་དོག་དམར་པོ་འབྱུང་བ་མེའི་ཁམས་པ་དང་། ཐུར་སེལ་ནི་རང་དབང་དུ་སྣ་བུག་གཉིས་ཀ་ལ་དྲག་ཏུ་མཉམ་རྒྱུ་ཁོ་ན་བྱེད་ཅིང་ཁ་དོག་སེར་པོ་འབྱུང་བ་སའི་ཁམས་པ་དང་། སྲོག་འཛིན་ནི་རང་དབང་དུ་སྣ་བུག་གཉིས་ཀ་ལ་དལ་བུས་མཉམ་རྒྱུ་ཁོ་ན་བྱེད་ཅིང་ཁ་དོག་དཀར་པོ་འབྱུང་བ་ཆུའི་ཁམས་པ་དང་། ཁྱབ་བྱེད་ནི་འཆི་ཀའི་དུས་སུ་མ་གཏོགས་གཞི་དུས་སུ་རང་དབང་དུ་སྣ་བུག་ནས་རྒྱུ་བ་མེད་ཅིང་ཁ་དོག་སྔོ་བསངས་འབྱུང་བ་ནམ་མཁའི་ཁམས་པ་ཡིན་པར་གསུངས་ཤིང་། འགྲེལ་ཆེན་ལས་སྲོག་འཛིན་ནམ་མཁའི་ཁམས་པ་ཁ་དོག་ལྗང་གུ་དང་། ཐུར་སེལ་ཡེ་ཤེས་ཀྱི་ཁམས་པ་ཁ་དོག་སྔོན་པོ་དང་། མཉམ་གནས་རླུང་གི་ཁམས་པ་ཁ་དོག་ནག་པོ་དང་། ཁྱབ་བྱེད་ཆུའི་ཁམས་པ་ཁ་དོག་དཀར་པོར་གསུངས་པས་རླུང་བཞི་པོ་དེའི་ཁ་དོག་མ་མཐུན་ཞིང་། མཉམ་གནས་མ་གཏོགས་པ་གསུམ་གྱི་འབྱུང་བའི་ཁམས་ཀྱང་མ་མཐུན་ནོ། །དེ་བཞིན་དུ་འགྲེལ་ཆེན་ལས་འབྱུང་བའི་ཁམས་ལྔ་ཆར་གྱི་རླུང་རང་དབང་དུ་ཡང་སྣ་བུག་གཡས་གཡོན་གཉིས་ཀ་ལས་རིམ་ཅན་དུ་རྒྱུ་བར་གསུངས་པས་རླུང་སྣ་བུག་ལ་རྒྱུ་ཚུལ་ཡང་མ་མཐུན་ནོ།།

གཞན་ཡང་དགོངས་པ་ལུང་སྟོན་སོགས་སྦས་རྒྱུད་དགོངས་འགྲེལ་དང་བཅས་པ་རྣམས་ལས་གཞི་དུས་སུ་སྣ་བུག་ལས་རང་དབང་དུ་རྒྱུ་བའི་རླུང་ལ་མེ་རླུང་ཆུའི་རླུང་ས་རླུང་རླུང་གི་རླུང་དང་བཞི་པོ་འདི་ལས་མ་བཤད་ཅིང་། བཞི་པོ་འདི་རེ་རེ་རྒྱུ་བ་ལ་ཡང་རྒྱུ་ཐེངས་རེ་ལ་དགུ་བརྒྱ་པ་ཕྲག་རེ་རྒྱུས་ཏེ་རླུང་རྒྱུ་བ་ཕྱི་མའི་འགོ་རྩོམ་པ་སོགས་བྱས་པའི་སྒོ་ནས་རླུང་བཞི་རེ་རེ་ཡང་ཞག་རེ་ལ་དགུ་བརྒྱ་པ་ཕྲག་དྲུག་དྲུག་རྒྱུ་ཞིང་། དགུ་བརྒྱ་པ་ཕྲག་རེ་རེ་ལ་ཡང་ལྷ་མོ་བཞིའི་རླུང་ཉིས་བརྒྱ་ཉེར་ལྔ་རེར་ཕྱེ་ནས་རྒྱུ་བ་ཡིན་ཏེ། གྲོལ་བའི་ཐིག་ལེ་ལས། ཕྱག་རྒྱ་བཞི་འབྲེལ་རེ་རེ་ཞིང་། །ཉིས་བརྒྱ་ཉི་ཤུ་རྩ་ལྔ་སྟེ །དེ་བཞི་བསྒྲེས་པས་དགུ་བརྒྱའོ། །དེ་ནི་འཕོ་བ་ཉི་ཤུ་བཞིས། །བརྩིས་པས་ཁྲི་ཕྲག་གཉིས་དང་ནི། །ཆིག་སྟོང་དང་ནི་དྲུག་བརྒྱའོ།། ཞེས་གསུངས་ཤིང་། ལྷ་མོ་བཞིའི་རླུང་ལ་འབྱུང་བ་ཆུང་བའི་རླུང་ཞེས་ཐ་སྙད་མཛད་དོ། །དེ་བཞིན་དུ་འཆི་བའི་དུས་མ་གཏོགས་གཞི་དུས་ལ་རྩ་དབུ་མ་ལ་རླུང་རྒྱུ་བ་མེད་པར་ཡང་བཤད་དོ།།

འགྲེལ་ཆེན་ལས་སྣ་བུག་ལ་འབྱུང་བ་ལྔའི་རླུང་རེ་རེ་ཡང་རྒྱུ་ཐེངས་རེ་ལ་ང་དྲུག་བཞི་ཆས་དམན་པའི་སྟོང་བརྒྱད་བརྒྱ་རེ་རྒྱུན་རེ་ལ་རྒྱུ་བར་བཤད་ཅིང་། ལྟེ་བའི་འཕོ་ཆེན་གྱི་རྩ་འདབ་དང་། སྣ་བུག་གཡས་གཡོན་གྱི་འཕོ་འཚམས་སུ་རླུང་དྲུག་བཞི་ཆ་རེ་དབུ་མ་ནས་རྒྱུ་བར་བཤད་དོ།། དེ་ལྟར་ན་སྦས་རྒྱུད་དུ་རང་དབང་ངམ་གཙོ་བོ་བྱས་ནས་སྣ་བུག་ནས་འབྱུང་བཞིའི་རླུང་མ་གཏོགས་ནམ་མཁའི་རླུང་མ་རྒྱུ་བར་བཤད་པ་དང་འགྲེལ་ཆེན་ལས་ནམ་མཁའི་རླུང་རྒྱུ་བར་བཤད་པ་མ་མཐུན། སྦས་རྒྱུད་ལས་རླུང་བཞི་པོ་རྒྱུན་རེ་ལ་དགུ་བརྒྱ་རེ་རྒྱུས་ནས་དཀྱིལ་འཁོར་གཞན་དུ་འཕོ་ཐེངས་དྲུག་དྲུག་སྟེ་དྲིལ་བས་འཕོ་བ་ཉི་ཤུ་རྩ་བཞིར་བྱེད་པར་བཤད་པ་དང་འགྲེལ་ཆེན་ལས་འབྱུང་བ་ལྔའི་རླུང་རེ་རེ་རྒྱུན་རེ་ལ་སྟོང་བདུན་བརྒྱ་དང་ཞེ་གསུམ་དབུགས་ཀྱི་བཞི་ཆ་གསུམ་རེ་རྒྱུས་ནས་དཀྱིལ་འཁོར་བཞིན་དུ་འཕོ་བའི་འཕོ་བ་བཅུ་གཉིས་སུ་བཤད་པས་རླུང་རྒྱུ་བའི་གྲངས་དང་འཕོ་བའི་གྲངས་མ་མཐུན། སྦས་རྒྱུད་ལས་འཆི་ཁ་དང་ལམ་དུས་མ་གཏོགས་གཞི་དུས་སུ་རླུང་དབུ་མ་ནས་རྒྱུ་བ་མེད་པར་བཤད་པ་དང་འགྲེལ་ཆེན་ལས་གཞི་དུས་སུ་ཡང་རླུང་དབུ་མ་ནས་རྒྱུ་བ་ཡོད་པར་བཤད་པ་མ་མཐུན་པ་རྣམས་སོ།། །།

༈ གཉིས་པ་འདིར་བཤད་པ་དང་དེ་དག་ཏུ་བཤད་པའི་དགོངས་པ་ཇི་ལྟར་ཡིན་པ་བཤད་པ་ལ་གཉིས། ཨ་བྷ་ཡས་ཇི་ལྟར་བཤད་པའི་ཚུལ་དང་། མཁས་པ་དག་གིས་ཇི་ལྟར་གསུངས་པ་བཀོད་དེ་དེའི་དགོངས་པའི་དོན་བཤད་པའོ།། དང་པོ་ནི། སྦས་རྒྱུད་ནས་བཤད་པ་རྣམས་ངེས་དོན་དང་། དུས་འཁོར་སོགས་སེམས་འགྲེལ་རྣམས་ནས་བཤད་པ་རྣམས་སྒྲ་ཇི་བཞིན་པར་བཤད་དུ་མི་རུང་བའི་དྲང་དོན་དུ་འཆད་དེ། སྙེ་མ་ཉེར་གཅིག་པ་ལས། ནམ་མཁའི་དཀྱིལ་འཁོར་གྱི་རླུང་རླུང་གཞན་བཞིའི་འཁོར་དུ་རྒྱུ་བ་ཙམ་མ་གཏོགས་རང་དབང་དུ་འབྱུང་བ་བཞིའི་རླུང་ལས་ལོགས་སུ་རྒྱུ་བ་སྤྱོད་བསྡུས་དང་དེའི་ཤེས་བྱེད་དུ་བཤད་རྒྱུད་རྡོར་འཕྲེང་དང་དགོངས་པ་ལུང་སྟོན་དང་གཉིས་མེད་རྣམ་རྒྱལ་གྱི་རྒྱུད་རྣམས་དྲངས་ནས་བཀག་ཅིང་། དུས་འཁོར་ནས་དེ་ལྟར་གསུངས་པ་རྣམས་ཉི་མའི་ཤིང་རྟ་སོགས་ཀྱི་གདུལ་བྱའི་བསམ་ངོ་ལ་ལྟོས་པའི་དྲང་དོན་དུ་བཤད་དོ། །དེ་ཡང་ཇི་ལྟར་བཤད་ན། སྙེ་མ་ཉེར་གཅིག་པ་ལས། འབྱུང་བ་ལྔ་པ་ནམ་མཁའི་ཁམས་ནི་ཁྱབ་པར་བྱེད་པ་ཉིད་ཀྱིས་གནས་བཞི་རྣམས་སུ་ཡང་དཀྱིལ་འཁོར་བཞི་ཡང་དག་པར་རྒྱུ་བའི་དུས་ཁོ་ནར་ཡང་དག་པར་རྒྱུའོ་ཞེས་པ་ལོགས་སུ་མ་གསུངས་སོ།། དེ་སྐད་དུ་ཡང་འཕགས་པ་ལྷའི་ཞབས་ཀྱིས་གསུངས་པ། རྡོ་རྗེ་པདྨ་དག་གི་སྣ་དག་ལས་འོད་ཟེར་བྱུང་ཞིང་གྱེན་དུ་སོང་སྟེ་རབ་ཏུ་གྲགས་པའི་སྣའི་རྩེ་མོ་ནས་རྒྱུའོ།། དེ་ལ་ས་དང་ཆུ་དང་མེ་དང་རླུང་ཞེས་ཁམས་ཀྱི་བྱ་བ་དཀྱིལ་འཁོར་བཞི་རྣམས་ཕྱིར་འབྱུང་ཞིང་ཁྱབ་བྱེད་ནི་ཁྱབ་པར་བྱེད་པའི་རླུང་མི་འབྱུང་བ་ཁྱབ་པའི་འོད་ཟེར་ཅན་ཏེ། ཞེས་པ་ནས། ཁམས་ཀྱི་དཀྱིལ་འཁོར་གཅིག་གིས་ཁམས་བཞི་རྣམས་ལ་ཁྱབ་པའོ་ཞེས་པའི་བར་དྲངས་ཤིང་། དེ་དག་གི་སྒྲུབ་བྱེད་དུ་དགོངས་པ་ལུང་སྟོན་གྱི་རྒྱུད་དྲངས་པ་ནི། དགོངས་པ་ལུང་སྟོན་པའི་རྒྱུད་དུ། གོས་དཀར་ལ་སོགས་བཟླས་བཤད་པ། །བརྒྱ་ཕྲག་གཉིས་དང་ཉི་ཤུ་རྩ་ལྔ། །བཞི་ཡིས་ཡང་དག་སྒྱུར་བ་ནི། །སྦྱོར་བ་བཞི་ལ་བརྒྱ་ཕྲག་དགུ །ཞེས་པ་དང་། དགུ་བརྒྱ་རྣམས་སུ་གང་བསྟན་པ། ཉི་ཤུ་རྩ་བཞིའི་རིགས་རྣམས་ཀྱིས། །དེ་ནི་སོ་སོར་འབྱུང་བ་ལས། ཉི་ཁྲི་ཚིག་སྟོང་དྲུག་བརྒྱའོ།། ཞེས་འཕོ་བའི་དབུགས་ཀྱི་གྲངས་གསུངས་པ་ཅི་ལྟར། ཞེས་བཤད་པ་དང་། ཡང་སྒྲུབ་བྱེད་དུ་བཤད་རྒྱུད་རྡོར་འཕྲེང་དྲངས་པ་ནི། དཔལ་རྡོ་རྗེ་འཕྲེང་བའི་རྒྱུད་དུ་ཡང་ནམ་མཁའ་ནང་དུ་འདུས་པ་ཁོ་ནས་དཀྱིལ་འཁོར་བཞི་རྣམས་ཁོ་ནའི་རྒྱུ་བ་གསུངས་པ། སྣ་རྩེ་ཡུངས་དཀར་ཞེས་བྱ་བ། །སྲོག་དང་རྩོལ་བར་བཏགས་པ་སྟེ། །སྲོག་དང་རྩོལ་བ་ལ་གནས་པ་དང་། །འོད་ལྔ་སངས་རྒྱས་རྣམས་སུ་བསྒོམ། །སྟེང་དུ་སྣ་ལས་ངེས་འབྱུང་བ། །ཞེས་པ་ནས། ཡེ་ཤེས་ལྔ་ཡི་ངོ་བོ་ཉིད། །ཅེས་པའི་བར་དྲངས་པ་རྣམས་སོ། །

ཡང་སྒྲུབ་བྱེད་དུ་གཉིས་མེད་རྣམ་རྒྱལ་གྱི་རྒྱུ་དྲངས་པ་ནི། དེ་བཞིན་དུ་གཉིས་སུ་མེད་པ་མཉམ་པ་ཉིད་རྣམ་པར་རྒྱལ་བའི་རྒྱུད་དུ། ཡ་ཡིག་དོན་གྱི་གང་ཅིའང་རུང་། །དངོས་གྲུབ་འདོད་པས་བྱ་བའོ། །ར་ལ་སོགས་པ་གསུམ་གྱིས་ཀྱང་། །འགྲོ་བའི་དོན་ལ་འཇུག་པར་བྱ། །མེ་དང་རླུང་དང་དབང་ཆེན་དང་། ཆུ་སྟེ་སོ་སོའི་དཀྱིལ་འཁོར་དུ། །ཐུན་ནི་ཕྱེད་ཕྱེད་དུ་རྣམས་སུ། །ལས་དག་གཉིས་གཉིས་གནས་པར་འགྱུར། །ཞེས་པ་རྣམས་དྲངས་ཏེ་འབྱུང་བ་བཞིའི་དཀྱིལ་འཁོར་གྱི་རླུང་རྒྱུ་བ་ལ་སོགས་སུ་ནམ་མཁའི་དཀྱིལ་འཁོར་གྱི་རླུང་རང་དབང་ངམ་དེས་གཙོ་བོ་བྱས་ནས་གཞི་དུས་ལ་རྒྱུ་བ་མེད་པར་བསྒྲུབས་སོ། །དེ་ལ་དཔགས་ནས་རྩ་བཤད་ཀྱི་སྦས་རྒྱུད་རྣམས་དང་མི་མཐུན་པའི་བསྡུས་རྒྱུད་སེམས་འགྲེལ་སྐོར་གསུམ་དང་བཅས་པ་ལས་བཤད་པའི་རྩ་དང་རླུང་གི་རྣམ་གཞག་གཞན་རྣམས་ཀྱང་སྒྲ་ཇི་བཞིན་པར་ཨ་བྷ་ཡ་མི་བཞེད་པར་གོ་ནུས་སོ།།

དེ་ལྟར་ན་དུས་འཁོར་རྒྱུད་འགྲེལ་སོགས་སེམས་འགྲེལ་རྣམས་ལས་དེ་ལྟར་གསུངས་པ་རྣམས་ནི་དྲང་དོན་དུ་འཆད་དེ་མན་སྙེའི་དེའི་འཕྲོ་ཉིད་ལས། གང་དུས་ཀྱི་འཁོར་ལོར་ནམ་མཁའི་དཀྱིལ་འཁོར་ལོགས་སུ་བཏོན་ནས་གསུངས་པ་དེ་ནི་མུ་སྟེགས་པའི་ལྟ་བ་མངོན་པར་ཞེན་པའི་ཉི་མའི་ཤིང་རྟ་ལ་སོགས་པ་གདུལ་བྱ་རྣམས་ངེས་པའི་དོན་ལ་གཞུག་པ་ལ་ལྡེམ་པོར་དགོངས་པས་དྲང་བའི་དོན་ཁོ་ན་ཏེ། ཕག་ལ་སོགས་པའི་འདོད་པའི་རྗེས་སུ་འཇུག་པས་རི་རབ་ཀྱི་སྟེང་གི་མཚམས་སུ་ཁམས་གསུམ་པའི་སྣོད་ཀྱི་འཇིག་རྟེན་གྱི་བཀོད་པ་ལ་སོགས་པ་བསྟན་པ་བཞིན་ནོ།། འོ་ན་དུས་ཀྱི་འཁོར་ལོ་དང་དེའི་རྗེས་སུ་འབྲང་བའི་གཞུང་རྣམས་སུ་ཐེག་པ་གསུམ་དང་འགལ་བའི་རྣམ་པར་གཞག་པ་མང་པོ་རྣམས་བྱས་ཏེ། དེའི་གཞུང་བྱེད་པ་གྲགས་པ་དང་པདྨ་དཀར་པོ་དང་རྡོ་རྗེ་སྙིང་པོ་དང་ཕྱག་ན་རྡོ་རྗེའི་མིང་ཅན་དེ་རྣམས་བྱང་ཆུབ་སེམས་དཔའ་རྣམས་མ་ཡིན་པ་ཁོ་ནའོ།།

ཞེས་མང་དུ་ཤེས་པ་རྣམས་སྨྲའོ།། འདིའི་ཕྱིར་འགལ་བ་ཐམས་ཅད་མ་སྤངས་པས་ན་འགའ་ཞིག་ཏུ་འགལ་བ་སྤོང་བའི་འབད་བརྩོན་གྱིས་ཅི་བྱ་ཞེ་ན། དུས་ཀྱི་འཁོར་ལོར་བསྟན་པ་རྒྱུད་གཞན་དང་མི་འགལ་བའི་དོན་གྱི་ཆ་འགའ་ཞིག་ནི་ཁོ་བོས་རང་གི་གཞུང་གི་ཕྱོགས་སུ་རྗེས་སུ་འབྲངས་ཤིང་། གདུལ་བྱ་འགའ་ཞིག་གི་བསམ་པའི་རྗེས་སུ་འཇུག་པས་འགལ་བའང་ཁ་ཅིག་སྤངས་སོ།།

དེ་ལས་གཞན་ལ་ནི་འགལ་བ་མ་སྤངས་ན་ཡང་འདི་རྣམས་ལ་ཉེས་པ་ཅི་ཡང་མེད་དོ་ཞེས་པ་ཤིན་ཏུ་རྒྱས་པར་བརྗོད་པས་ཆོག་གོ། ཞེས་གསུངས་པའི་མང་དུ་ཤེས་པ་ཞེས་སློན་དཔོན་ཤཱནྟི་པ་དང་། རྣམས་ཞེས་པས་རྒྱ་གར་བ་གཞན་ཡང་ཡོད་པར་བསྟན་ཅིང་། འདིའི་ཕྱིར་ཞེས་པ་ནས། ཅི་བྱ་ཞེ་ན་ཞེས་པའི་བར་གྱིས་ནི་དུས་འཁོར་གྱི་རྒྱུད་དང་སེམས་འགྲེལ་དུ་གྲགས་པ་རྣམས་ཤཱནྟི་པ་སོགས་མཁས་པ་རྣམས་ཀྱིས་བཀག་པ་འདིའི་ཕྱིར་འགལ་བ་ཐམས་ཅད་མ་སྤངས་པ་དེ་བས་ན་ཨ་བྷ་ཡ་ཁྱེད་ཀྱི་གཞུང་གི་ཆ་འགའ་ཞིག་ཏུ་འགལ་བ་སྤོང་བའི་འབད་རྩོལ་གྱིས་ཅི་བྱ་ཞེ་ན་ཞེས་པའི་དོགས་པ་བཀོད་ནས། དོགས་པ་སེལ་བ་ནི་དུས་ཀྱི་འཁོར་ལོར་བསྟན་པ་ཞེས་སོགས་སོ།། །།

༈ གཉིས་པ་མཁས་པ་དག་གིས་ཇི་ལྟར་གསུངས་པ་བཀོད་དེ་དེའི་དགོངས་པའི་དོན་བཤད་པ་ནི། སྣོད་ཀྱི་འཇིག་རྟེན་གྱི་རྣམ་གཞག་དང་རྩ་རླུང་སོགས་ཀྱི་རྣམ་གཞག་དུས་འཁོར་ནས་བཤད་པ་མངོན་པའི་སྡེ་སྣོད་དང་སྦས་རྒྱུད་རྣམས་དང་མ་མཐུན་པ་རྣམས་དྲང་དོན་དུ་བཤད་དུ་མི་རུང་སྟེ། དེ་ལྟར་རུང་ན་འཇིག་རྟེན་ཁམས་ལེའི་མདོར་བསྡུས་བརྒྱད་པ་དང་དགུ་པ་དང་བཅུ་པ་གསུམ་ནས་བསྟན་པ་ཕལ་མོ་ཆེ་སྒྲས་ཟིན་ལྟར་གཞི་མ་གྲུབ་པའི་དགོངས་པ་ཅན་དུ་འགྲེལ་དགོས་ཤིང་། ནང་ལེའི་ཡང་རྩ་རླུང་གི་རྣམ་གཞག་སོགས་མང་པོ་ཞིག་སྒྲ་ཇི་བཞིན་པར་ཁས་བླང་དུ་མི་རུང་བར་འགྱུར་ལ། དེ་ལྟ་ན་དེས་ཤན་བརྒྱབ་སྟེ་ལེའུ་ལྷག་མ་གཞན་རྣམས་ལ་ཡང་སྒྲ་ཇི་བཞིན་དུ་ཁས་བླངས་པས་ཆོག་པ་ཉུང་ཟད་ཙམ་ཞིག་ཀྱང་གཞག་དཀའ་བར་འགྱུར་རོ་ཞེས་གསུངས་ནས། དུས་འཁོར་སྐོར་ནས་བཤད་པ་དང་སྦས་རྒྱུད་རྩ་བཤད་རྣམས་ནས་བཤད་པ་གཉིས་མ་མཐུན་ཡང་གཉིས་ཀ་ངེས་དོན་ཉིད་དུ་ཁས་བླང་བར་བྱའོ་ཞེས་གསུངས་པ་ལྟར་བཤད་པར་བྱའོ།།

དེ་ཡང་ཇི་ལྟར་འཆད་ན། གསལ་སྒྲོན་ལས། འོ་ན་འདུས་པའི་བཤད་རྒྱུད་ལྟར་ན་ཞག་གཅིག་གི་རླུང་གི་ཕྱེད་ལ་སྣ་བུག་གི་འཕོ་བ་བཅུ་གཉིས་དང་། སྡོམ་འབྱུང་ལྟར་ན་བརྒྱད་དང་། དུས་འཁོར་ལྟར་ན་དྲུག་བརྒྱ་དང་དོན་ལྔ་མ་གཏོགས་པ་ཞག་གཅིག་གི་རླུང་རིལ་པོ་ལ་སྣ་བུག་གི་འཕོ་བ་བཅུ་གཉིས་པ་གསུངས་པ་རྣམས་འགལ་མི་འགལ་ཇི་ལྟར་ཡིན་སྙམ་ན། འདུས་པའི་ལུགས་དེ་ནི་འཇམ་དཔལ་ཞལ་ལུང་དང་འཕགས་པ་ཡབ་སྲས་ཀྱིས་བཀྲལ་བ་ན་ཡང་སོར་བཞག་ཏུ་མཛད་ཅིང་། སྡོམ་འབྱུང་གི་དེ་ཡང་རྒྱུད་དེའི་དོན་དུ་སྣང་བས་ལུང་དེ་དག་གི་དོན་གཅིག་ཏུ་བཤད་དུ་མི་རུང་ལ། སྣ་བུག་ཏུ་རྒྱུ་བ་ལ་ལུགས་འདི་མངོན་སུམ་གྱིས་འགྲུབ་ལ་གཞན་མི་འགྲུབ་པའི་ཁྱད་པར་ཡང་གཞག་དཀའ་བར་སྣང་བའི་ཕྱིར་གདུལ་བྱའི་དབང་གིས་གསུངས་པ་མི་འགལ་བར་བྱའོ།། ཞེས་གསུངས་པ་ལྟར་ཤེས་པར་བྱ་སྟེ། དེ་ཡང་འདུས་པའི་བཤད་རྒྱུད་རྡོར་འཕྲེང་དང་ལུང་སྟོན་ནས་གསུངས་པ་ལྟར་འཐད་པ་ནི་རིམ་པ་ལྔ་གསལ་བའི་སྒྲོན་མེར་གསུངས་པ་ལྟར་ཡིན་ལ། དུས་འཁོར་ནས་གསུངས་པའི་ཚུལ་ནི་དུས་འཁོར་གྱི་རྒྱུད་སེམས་འགྲེལ་སྐོར་གསུམ་དང་བཅས་པ་ཚད་མར་མི་འདོད་པ་དག་ལྟ་ཞོག །དེ་དག་ཚད་མར་འདོད་ཕྱིན་ཆད་ཨ་བྷ་ཡཱ་ཀ་ར་ལྟར་རླུང་གི་རྒྱུ་ཚུལ་སོགས་དུས་འཁོར་ནས་གསུངས་པ་རྣམས་སྒྲ་ཇི་བཞིན་པ་མ་ཡིན་པའི་དྲང་དོན་དུ་འཆད་པ་མི་འཐད་དེ། ཁམས་ལེའི་མདོར་བསྡུས་གཉིས་པ་ལས། རྡོ་རྗེ་ཐེག་པ་འདིར་སེམས་ཅན་གྱི་བསམ་པའི་དབང་གིས་རྒྱུད་ཀྱི་རྒྱལ་པོ་ཐམས་ཅད་ལ་རྡོ་རྗེའི་ཚིག་ཏུ་སྦས་ཏེ། ཞེས་སྦས་པའི་རྩ་རྒྱུད་རྣམས་སུ་རྒྱུད་དོན་རྣམས་མི་གསལ་བར་སྦས་ནས་བསྟན་པར་གསུངས་ཤིང་། དེའི་འཕྲོ་ཉིད་ལས། དང་པོའི་སངས་རྒྱས་འདི་ལ་རྡོ་རྗེའི་ཚིག་དེ་དག་ཉིད་རབ་ཏུ་གསལ་བར་བསྟན་པ་བཤད་པ་དང་རབ་ཏུ་བཤད་པ་དག་གིས་བཅོམ་ལྡན་འདས་ཀྱིས་གསལ་བར་མཛད་དོ།། དེ་ཉིད་སྒྲུབ་པ་ལ་ཕྱག་རྒྱ་ཆེན་པོ་སྒོམ་པ་དུ་བ་སོགས་པ་མཚན་མའི་ལམ་རབ་ཏུ་གསལ་བར་མཛད་དེ། ཞེས་སོགས་ཀྱིས་སྦས་རྒྱུད་གཞན་དུ་སྦས་པའི་ཟབ་དོན་དང་པོ་ལ་སངས་རྒྱས་ཀྱི་རྒྱུད་དུ་གསལ་བར་བསྟན་པ་སྒྲ་ཇི་བཞིན་པའི་དོན་ཅན་དུ་བཤད་པ་འདི་ཉིད་ཀྱིས་རྩ་རླུང་ལ་སོགས་པ་བསྟན་པ་རྣམས་ཀྱང་སྒྲ་ཇི་བཞིན་པའི་དོན་ཅན་དུ་ཁས་བླང་དགོས་པར་གྲུབ་བོ།།

འོ་ན་མི་མཐུན་པ་གཉིས་ཀ་སྒྲ་ཇི་བཞིན་པར་འཆད་ཚུལ་ཇི་ལྟ་བུ་སྙམ་ན། དེ་ལྟར་རྒྱུད་གཉིས་ལས་རྩ་དང་རླུང་གི་རྣམ་གཞག་སོགས་གཞིའི་གནས་ཚུལ་དང་བསྐྱེད་རྫོགས་ཀྱི་ལམ་བགྲོད་པའི་རིམ་པ་རྣམས་མི་འདྲ་བར་གསུངས་པ་ནི་རང་རང་གི་ཆེད་དུ་བྱ་བའི་གདུལ་བྱའི་གཙོ་བོའི་དབང་དུ་བྱས་ནས་གསུངས་པ་ཡིན་ལ། འདི་ལ་གཉིས་ལས་དང་པོ་ནི་དཔལ་དུས་ཀྱི་འཁོར་ལོའི་ཆེད་དུ་བྱ་བའི་གདུལ་བྱའི་གཙོ་བོ་རྣམས་ཀྱི་ལས་ཀྱི་སྤྱི་མཐུན་གྱི་བདག་འབྲས་ལ་གླིང་བཞི་པའི་སྣོད་ཀྱི་འཇིག་རྟེན་འདིའི་ཚད་དབྱིབས་དང་ཁ་དོག་སོགས་མངོན་པ་དང་རྒྱུད་སྡེ་གཞན་ནས་བཤད་པ་དང་མི་འདྲ་བར་བྱུང་བའི་ཚུལ་འགྲེལ་ཆེན་ཉིད་ལས་བཤད་པའི་དོན་གོང་དུ་བཤད་ཟིན་པ་ལྟར་ཡིན་ཞིང་། དེ་བཞིན་དུ་དེ་འདྲ་བའི་གདུལ་བྱའི་གཙོ་བོ་རྣམས་ཀྱི་ལས་ཀྱི་རྣམ་སྨིན་གྱི་འབྲས་བུ་ལ་ཡང་སྣོད་ཀྱི་འཇིག་རྟེན་དང་ཆོས་མཐུན་པའི་ལུས་ཀྱི་ཚད་དང་ལུས་ཀྱི་ཆ་ཤས་སོ་སོའི་ཁ་དོག་དང་། ལུས་ཀྱི་ནང་གི་རྩ་དང་རླུང་དང་རླུང་རྣམས་རྩ་འཁོར་སོ་སོ་དང་སྣའི་བུག་པ་ལ་རྒྱུ་ཚུལ་རྣམས་བྱུང་བ་ཡིན་པས་གནས་ཚུལ་ལ་གྲུབ་པ་ཡིན་ཞིང་། དེ་ལྟ་བུའི་སྣོད་ཀྱི་འཇིག་རྟེན་དང་བཅུད་ཀྱི་སེམས་ཅན་གྱི་ལུས་ངག་སེམས་དང་བཅས་པ་སྦྱང་གཞིར་བྱས་ནས་དེ་དག་དང་རྣམ་པ་མཐུན་པའི་ལམ་གྱི་རྣམ་གཞག་དང་། དེ་འདྲ་བའི་གདུལ་བྱའི་གཙོ་བོ་རྣམས་ཀྱི་རྩ་རླུང་ཐིག་ལེ་རྣམས་རྒྱུད་འགྲེལ་ལས་ཇི་ལྟར་གསུངས་པ་བཞིན་གྲུབ་པ་གཞིར་བཞག་སྟེ་དེ་དག་ལ་གནད་དུ་བསྣུན་པའི་རྫོགས་རིམ་གྱི་ལམ་སྒོམ་ཚུལ་བྱས་པ་ལས་རོ་རྐྱང་གི་རླུང་དབུ་མར་ཞུགས་པ་སོགས་ཀྱིས་སྟོང་གཟུགས་དང་མི་འགྱུར་བའི་བདེ་ཆེན་འདྲེན་པའི་ཚུལ་རྣམས་ནི་དཔལ་དུས་ཀྱི་འཁོར་ལོ་ལས་ཇི་ལྟར་གསུངས་པ་བཞིན་གནས་ཚོད་ལ་གྲུབ་པའི་ཚུལ་ལོ།།

དེ་ལྟར་ཡང་ནང་ལེའི་ང་དགུ་པའི་འགྲེལ་ཆེན་ལས། དེ་ལྟར་ན་ལྔ་བཅུ་རྩ་དྲུག་ལྷག་པའི་བརྒྱ་ནི་དུས་ཀྱི་འཁོར་ལོའི་རྩ་ལྷ་དང་ལྷ་མོའི་རང་བཞིན་གྱིས་གནས་པ་བྱིས་པ་རྣམས་ལ་འཆི་བ་སྟེར་བར་བྱེད་པ་སྟེ། རིགས་དྲུག་གི་རྩ་དང་ལྷན་ཅིག་དྲུག་ཅུ་རྩ་གཉིས་ལྷག་པའི་བརྒྱའི་དུས་ཀྱི་འཁོར་ལོ་འཁོར་ལོ་དྲུག་གི་རྩའི་བདག་ཉིད་ཅན་བསྒོམས་པར་གྱུར་བ་ན་རྣལ་འབྱོར་པ་རྣམས་ལ་བདེ་བ་སྟེར་བ་བྱེད་པའོ།།

ཞེས་གསང་གནས་ཀྱི་རྩ་འདབ་སོ་གཉིས། ལྟེ་བའི་རེ་བཞི། སྙིང་གའི་བརྒྱད། མགྲིན་པའི་སོ་གཉིས། དཔྲལ་བའི་བཅུ་དྲུག །གཙུག་ཏོར་གྱི་རྩ་འདབ་བཞི་སྟེ། རྩ་བརྒྱ་དང་ལྔ་བཅུ་རྩ་དྲུག་པོ་དེ་པདྨ་གདན་ཅན་གྱི་ལྷ་དང་ལྷ་མོ་ལྔ་བཅུ་རྩ་དྲུག་གི་ངོ་བོར་མོས་ནས་སྒོམ་པ་དང་། དེ་བཞིན་དུ་སྟེང་གི་རྩ་རོ་རྐྱང་དབུ་མ་གསུམ་དང་འོག་གི་ཁུ་བ་བཤང་གཅིའི་རྩ་གསུམ་སྟེ་དྲུག་པོ་རིགས་དྲུག་གི་ངོ་བོར་མོས་ཏེ་སྒོམ་པ་སོགས་ཀྱི་བསྐྱེད་རིམ་གྱིས་རྒྱུད་སྨིན་པར་བྱས་ནས་རྩ་རླུང་ཐིག་ལེ་གསུམ་ལ་གནད་དུ་བསྣན་པའི་སྦྱོར་བ་ཡན་ལག་དྲུག་གི་རྫོགས་རིམ་བསྒོམས་པ་ལས་རྣལ་འབྱོར་པ་ལ་མཐར་ཐུག་གི་བདེ་བ་སྟེར་བར་གསུངས་པ་དང༌། དེ་བཞིན་དུ་ང་བརྒྱད་པའི་འགྲེལ་ཆེན་འདི་ཉིད་ལས། འཁོར་ལོ་དྲུག་ལ་དུས་ཀྱི་རྩ་བརྗོད་པ་རྣམས་བླ་མའི་མན་ངག་གིས་བསྒོམས་པར་གྱུར་ན་འཆི་བའི་འཇིགས་པ་འཕྲོག་སྟེ་རྣལ་འབྱོར་པ་རྣམས་ཀྱིས་འདི་ལ་མཚར་མེད་དོ།། ཞེས་གསུངས་པའི་བླ་མའི་མན་ངག་ནི་སྦྱོར་བ་ཡན་ལག་དྲུག་ཡིན་ཏེ། ནང་ལེའི་དྲུག་ཅུ་པའི་འགྲེལ་ཆེན་ལས། སྟེང་དུ་ཟླ་བ་དང་ཉི་མ་དང་སྒྲ་གཅན་ཏེ་གཡོན་དང་གཡས་དང་དབུ་མའི་ལམ་ལ་གནས་པ་དང་། འོག་ཏུ་ཟླ་བ་དང་ཉི་མ་དང་མེའི་དབྱེ་བས་བཤད་པ་དང་གཅིག་དང་ཁུ་བའི་ལམ་ལ་གནས་པའོ།། དེས་ནི་རྣལ་འབྱོར་མའི་ལུས་ལ་བསྲུང་བར་བྱའོ།། གང་གིས་ཞེ་ན། བླ་མའི་ངེས་པའི་དབང་གིས་ཞེས་པ་ལ་བླ་མའི་ངེས་པ་ནི་སྦྱོར་བ་ཡན་ལག་དྲུག་སྟེ་དེས་འཆི་བ་ལས་བསྲུང་བར་བྱའོ། །གང་ཞིག་སྲོག་ཆགས་རྣམས་ལ་འཆི་བ་སྟེར་བ་ནི་དྲུག་པོ་འདི་རྣམས་ལ་སྲོག་ཞུགས་པའོ། །དྲུག་པོ་རྣམས་ལ་གལ་ཏེ་སྲོག་ནི་རབ་ཞུགས་གྱུར་ན་དེའི་ཚེ་མི་རྣམས་དུས་ཐམས་ཅད་དུ་འཆི་བས་འཇོམས་པར་ངེས་ཏེ་མཐའ་གཅིག་ཏུའོ། །དྲུག་པོ་འདི་རྣམས་ཀྱི་ནང་ནས་ཕྲ་མོ་ནི་དབུ་མ་ལ་ཨ་ཝ་དྷཱུ་ཏཱི་སྟེ་ཕྲ་མོ་དེ་ལ་སྲོག་མ་ཞུགས་པར་གྱུར་ན་རྣལ་འབྱོར་པ་རྣམས་ཀྱི་འཆི་བའི་ཡུལ་ནི་གང་དུ་གཅོད་པར་བྱེད་དེ་ངེས་པར་འཆི་བའི་ཡུལ་གཅོད་པར་མི་བྱེད་དོ།། ཞེས་སྦྱོར་བ་ཡན་ལག་དྲུག་གི་རྣལ་འབྱོར་གྱིས་རླུང་དབུ་མར་གཞུག་པར་མ་བྱས་ན་མཐར་ཐུག་གི་འབྲས་བུར་གྱུར་བའི་འཆི་བ་མེད་པ་འཐོབ་པའི་ཐབས་མེད་པར་གསུངས་སོ།།

གཉིས་པ་སྦས་རྒྱུས་རྩ་བཤད་རྣམས་ལས་རྩ་དང་རླུང་གི་རྣམ་གཞག་སོགས་གཞིའི་གནས་ཚུལ་དང་། བསྐྱེད་རྫོགས་ཀྱི་ལམ་བགྲོད་པའི་རིམ་པ་རྣམས་རང་གི་ཆེད་དུ་བྱ་བའི་གདུལ་བྱའི་དབང་དུ་བྱས་པས་སྒྲ་ཇི་བཞིན་པ་ཡིན་ཚུལ་ནི་སྦས་རྒྱུད་རྩ་བཤད་ཀྱི་ཆེད་དུ་བྱ་བའི་གདུལ་བྱའི་གཙོ་བོ་རྣམས་ཀྱི་སྤྱི་མཐུན་གྱི་ལས་ཀྱི་བདག་འབྲས་ལ་གླིང་བཞི་པ་འདི་ཉིད་ཀྱི་ཚད་དབྱིབས་སོགས་མངོན་པ་དང་སྦས་རྒྱུད་རྩ་བཤད་དང་དེ་དག་གི་དགོངས་པ་འགྲེལ་བའི་མཁས་གྲུབ་རྣམས་ཀྱིས་བཤད་པ་ལྟར་དངོས་གནས་ལ་གྲུབ་པ་མདོ་རྒྱུད་སོགས་དེ་དག་གི་དགོངས་པ་ཡིན་པ་ལྟ་ཅི་སྨོས། དུས་འཁོར་གྱི་དགོངས་པ་ཡིན་པར་ཡང་ཕུག་ཁྲུ་ལྔ་པ་ཞེས་སོགས་ཀྱི་འགྲེལ་ཚིག་དེ་རྣམས་ཀྱིས་བསྟན་པར་གོང་དུ་བཤད་ཟིན་པ་ལྟར་ཡིན་ཞིང་། དེ་བཞིན་དུ་སྦས་རྒྱུད་རྩ་བཤད་རྣམས་ཀྱི་ཆེད་དུ་བྱ་བའི་གདུལ་བྱའི་གཙོ་བོ་རྣམས་ཀྱི་རང་རང་གི་ལས་ཀྱི་རྣམ་སྨིན་གྱི་འབྲས་བུའི་ཕུང་ཁམས་བསྐྱེད་མཆེད་རྣམས་དང་། ཁྱད་པར་དུ་རྩ་དང་རླུང་དང་རླུང་རྣམས་རྩ་འདབ་དང་སྣ་བུག་ལ་རྒྱུ་ཚུལ་རྣམས་སྦས་རྒྱུད་དགོངས་འགྲེལ་དང་བཅས་པ་ལས་ཇི་ལྟར་དུ་གསུངས་པ་ལྟར་དངོས་གནས་ལ་གྲུབ་ཅིང་ཇི་ལྟར་གྱི་སྣོད་ཀྱི་འཇིག་རྟེན་དང་ཆོས་མཐུན་པར་གཞལ་ཡས་ཁང་སྒོམ་པ་དང༌། ཕུང་ཁམས་བསྐྱེད་རྣམས་ལྷ་དང་ལྷ་མོའི་ངོ་བོར་སྒོམ་ཞིང་། ཁྱད་པར་དུ་ཡང་རྩ་རླུང་ཐིག་ལེ་རྣམས་དཔའ་བོ་དང་དཔའ་མོའི་ངོ་བོར་སྒོམ་པ་སོགས་ཀྱི་བསྐྱེད་རིམ་གྱིས་རྒྱུད་སྨིན་པར་བྱས་ཏེ་ཇི་སྐད་བཤད་པའི་རྩ་རླུང་ཐིག་ལེ་རྣམས་ལ་གནད་དུ་བསྣུན་པའི་རྫོགས་རིམ་སྒོམ་པ་མཐར་ཕྱིན་པ་ལས་འབྲས་བུ་སྐུ་གཉིས་ཐོབ་པར་འགྱུར་གྱི། གཞི་མ་གྲུབ་པའི་སྣོད་དང་བཅུད་ཀྱི་རྩ་རླུང་སོགས་དང་ཆོས་མཐུན་པ་དང་དམིགས་པར་བྱས་ཀྱང་འབྲས་བུ་ཇི་ལྟ་བ་བཞིན་འཐོབ་པར་དཀའ་འོ།།

དེ་ལྟར་ན་ཆེད་དུ་བྱ་བའི་གདུལ་བྱ་གཉིས་ཀྱི་ལས་རིགས་མི་འདྲ་བ་ཐ་དད་པའི་དབང་གིས་སྣོད་ཀྱི་འཇིག་རྟེན་དང་ནང་གི་རྩ་རླུང་སོགས་མི་འདྲ་བའི་ཁྱད་པར་བྱུང་ཞིང་དེ་ལྟར་བྱུང་བ་ཉིད་ཀྱིས་སྦས་རྒྱུད་རྣམས་ཀྱི་དགོངས་པ་འཕགས་ཡུལ་གྱི་མཁས་གྲུབ་རྣམས་ཀྱིས་བཀྲལ་བའི་ལམ་གྱི་བགྲོད་ཚུལ་དང་སེམས་འགྲེལ་སྐོར་གསུམ་རྗེས་འབྲང་དང་བཅས་པ་རྣམས་ཀྱིས་བཤད་པའི་ལམ་གྱི་བགྲོད་ཚུལ་ལ་ཁྱད་པར་མི་འདྲ་བའི་ཚུལ་བྱུང་བར་ཤེས་པར་བྱའོ།། དེ་ལྟར་ནང་གི་རྣམ་གཞག་ཅུང་ཟད་ཙམ་ཞིག་བཤད་ཟིན་ཏོ།། །།

ཟུར་འདོན་གནང་ཡུལ། དུས་འཁོར་འགྲེལ་ཆེན་དྲི་མེད་འོད་ཀྱི་རྒྱན།

མཛད་པ་པོ། མཁས་གྲུབ་ནོར་བཟང་རྒྱ་མཚོ།

རྩོམ་སྒྲིག་པ། སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་།

མཐའ་མའི་འདོན་ཐེངས་།: 10.01.2025 ཉིན། 11:02 AM